Azərbaycan ərazisində müvəqqəti yerləşdirilən Rusiya sülhməramlı qüvvələrinin komandanı, general-mayor Andrey Volkov azərbaycanlı jurnalistlərə açıqlamasında deyib ki, Ermənistanı Qarabağla birləşdirilən yolda gömrük postu quraşdırıla bilər:
“Azərbaycan tərəfi ilə razılaşdırmışıq ki, giriş postunda mini gömrük postu quraşdıraq”.
Onun sözlərinə görə, girişdəki nəzarət-buraxılış məntəqəsinə müasir avadanlıqlar gətirmək barədə razılıq əldə olunub:
“Bizim bugünə qədər yoxlanış üçün texniki vasitələrimiz yox idi. Oradan hansısa yüklərin altında nə isə keçirə bilərlər”.
O qeyd edib ki, belə olan halda işin effektivliyini artıracaqlar və bura hər hansı qadağan edilmiş yüklərin daşınmamasına zəmanət təmin olunacaq.
Rusiya sülhməramlı kontingentinin komandanı Volkovun Laçın yolunda Azərbaycan gömrükçülərinin iştirakı və xüsusi avadanlıqlarla təchiz olunmaqla post yaradılacağı haqda dedikləri erməni separatçıları arasında təşvişə səbəb olub.
Erməni separatçıları bildiriblər ki, artıq mediada və sosial şəbəkələrdə Rusiyanın Qarabağdakı sülhməramlı kontingentinin rəhbəri Andrey Volkovun müsahibəsi yayılıb və bunun əsasında Qarabağı Ermənistanla birləşdirən dəhlizdə Azərbaycan postunun quraşdırılacağı qənaətinə gəlinib. Bildirilir ki, qondarma qurumun oyuncaq “milli təhlükəsizlik xidməti” bu məsələ ilə bağlı məlumat yayıb:
“Volkovla müzakirələr aparılıb və o, dəhlizdə heç bir nəzarət-buraxılış məntəqəsinin olmayacağını, ora azərbaycanlıların nəzarət etməyəcəyini və orada azərbaycanlıların olmayacağını bildirib”.
Yaranmış vəziyyət Azərbaycanın uğuru sayıla bilərmi? Ekoloqların yolu bağlamasından sonra bu addımın atılması Azərbaycanın Ermənistanı birləşdirən yolu tam nəzarətə götürəcəyi anlamına gəlirmi?
Politoloq Elşən Mustafayev “Bakı-Xəbər”ə açıqlamasında bildirdi ki, onsuz da proses ona doğru gedir: “Ermənistan həmin dəhlizdən istədiyi kimi istifadə edir. Hətta üçtərəfli bəyanatdan sonra həmin yolla silah-sursat da daşıyıb. Bugünlərdə məlum oldu ki, həmin yol vasitəsilə İrandan olan terrorçular Qarabağa keçib. Onların adları da mediaya təqdim edildi. Bununla yanaşı, Ermənistan üzərinə götürdüyü öhdəliyi yerinə yetirib, Zəngəzur dəhlizini açmır. Belə olan təqdirdə, hansı haqla bizim ərazimizdəki dəhlizdən istifadə edə bilər? Ekoloqlarımızın yolda nümayiş etdirdiyi fədakarlıq onlara ciddi siqnal oldu. Anladılar ki, Azərbaycan istədiyi vaxt yola nəzarəti təmin edə bilər. Separatçıların təşvişdən doğan təkzib bəyanatına baxmayın. Generalın dediklərini səmimi qəbul etməliyik. Bəli, artıq Azərbaycan yolla bağlı hərəkətə keçib. Ermənilər bunun ciddiliyini anlayırlar. Biz öz ərazimizdə istənilən əməliyyatı keçirə bilərik. Bakı üçün Xankəndi daxili mövzudur, onu mərhələli həll etməyi planlaşdırır. Biz Zəngəzur dəhlizi tələb edirik və çox strateji bir nəticə əldə etməyi hədəfləmişik. Ona görə Xankəndi mövzusu artıq lokal, məhəlli problem kimi qalıb və onu həll etməyə çalışırlar. Azərbaycan qısa müddətdə bütün ərazilərdə öz yurisdiksiyasını bərpa etmək istiqamətində hərəkətə keçəcək. Buna rus sülhməramlılar heç cür mane ola bilməz. Bunun üçün də biz ilk növbədə yola nəzarəti ələ keçirməliyik. Bundan sonra digər addımların atılması asanlaşacaq. Silah-sursat gəlməyəndən sonra separatizm meylləri tam sıfıra enəcək”.
Məhəmmədəli QƏRİBLİ
