05/02/2023 15:48
728 x 90

Bakı-Astara-Cəbrayıl üçbucağında Azərbaycan-Türkiyə təlimləri İrana dərs olacaq...

Məhəmməd Əsədullazadə: “Bu təlimlər daha çox İranın təhdidlərinə cavab məqsədi daşıyır”

img

Məlum olduğu kimi, Azərbaycan və Türkiyə ordularının birgə təlimləri davam edir. İki qardaş ölkənin hərbçiləri təlimlərin dekabrın 5-də reallaşdırılan növbəti mərhələsində planda nəzərdə tutulan tapşırıqları həyata keçiriblər.

Türkiyənin milli müdafiə naziri, ordu generalı Hulusi Akar birgə təlimləri izləmək üçün dekabrın 5-də Azərbaycana səfərə gəlib. Azərbaycan Ordusu və Türkiyə Silahlı Qüvvələrinin müxtəlif qoşun növlərinin şəxsi heyəti, döyüş və xüsusi təyinatlı mühəndis-istehkam texnikası, həmçinin hərbi aviasiya vasitələrinin cəlb olunması ilə keçirilən təlim Bakı şəhərini, eləcə də Astara, Cəbrayıl və İmişli rayonlarının ərazilərini əhatə edir. Əsasən də İranla sərhəddə təlimlərə xüsusi önəm verilir. Ssenariyə uyğun olaraq, Azərbaycan Ordusunun Quru Qoşunları, Hərbi Hava Qüvvələri, Xüsusi Təyinatlı Qüvvələr, Mühəndis Qoşunları, Raket və Artilleriya Qoşunlarının bölmələri Türkiyə Silahlı Qüvvələrinin hərbçiləri ilə birgə müxtəlif təlim döyüş tapşırıqlarını yerinə yetirirlər. Təlimdə müasir döyüş üsullarından istifadə etməklə artilleriya, aviasiya və digər qoşun növlərinin hərbi əməliyyatlarda tətbiqi, onların qarşılıqlı əlaqədə fəaliyyətinin təşkili, çaylar üzərindən keçid açmaq məqsədilə panton körpülərin salınması, şərti düşmənin dərinliyinə desant endirilməsi üzrə müxtəlif tapşırıqlar da icra edilir. Birgə təlimdə əsas diqqət qoşunların qarşılıqlı əlaqədə fəaliyyətləri zamanı döyüş uzlaşmasının təmin edilməsi, idarəetmənin təkmilləşdirilməsi, təcrübə mübadiləsi və şəxsi heyətin peşəkarlığının artırılmasına yönəldilib.

Yeri gəlmişkən onu da qeyd edək ki, Prezident İlham Əliyev bu günlərdə ADA Universitetində birgə hərbi təlimlərin əhəmiyyətini xüsusi vurğuladı: “Bizim Türkiyə ilə dövri əsaslarla bir il ərzində 10-dan artıq birgə hərbi təlimlərimiz olub. Onlar həm Türkiyədə, həm də Azərbaycanda təşkil olunub. Bu, regional sabitliyin və təhlükəsizliyimizin mühüm meyarıdır. Azərbaycana və ya Türkiyəyə qarşı məkrli planları olanlar bilməlidirlər ki, türk ordusu tək deyil, orada, həmçinin bizim ordu da var. Bizim ordu isə tək deyil, o cümlədən orada türk ordusu da var. Sərhədimizdə təxribatları planlaşdıranlar, bizi qorxutmağa çalışanlar bu planlarını yaddan çıxarmalıdırlar”.

Görünən odur ki, təlimlərin keçirildiyi coğrafiya çox maraqlı regionu əhatə edir. Maraqlıdır, sözügedən təlimlərin məqsədi nədən ibarətdir?

  • “Bu təlimləri NATO-Azərbaycan təlimləri kimi də xarakterizə etmək olar”

Sözügedən məsələni “Bakı-Xəbər”ə şərh edən politoloq Məhəmməd Əsədullazadə təlimlərin məqsədləri ilə bağlı bır sıra məqamlara aydınlıq gətirdi: “Bu təlimlər daha çox İranın təhdidlərinə cavab məqsədi daşıyır. İranın Azərbaycana hərbi təhdilldlərinə qarşı Şuşa deklarasiyasına uyğun olaraq Ankara-Baki birgə genişmiqyaslı hərbi təlimləri İrana ciddi mesajdır. Lakin təkcə İrana deyil, Rusiya da bu təlimlərdən nəticə çıxarmalıdır. Çünki Qarabağda Rusiya sülhməramlı qüvvələrinin "fəaliyyəti" Azərbaycanın təhlükəsizliyini təhdid edir. Bu təlimləri həm də NATO-Azərbaycan təlimləri kimi xarakterizə etmək olar. Vaşinqton da bu təlimlərə dəstək verir. Azərbaycan Baş Qərargah rəisi bir neçə gün Pentaqonda görüşlər keçirdi. Azərbaycana ABŞ dəstəyi yeni müstəvidə davam edir. Türkiyə və Azərbaycan birgə hərbi təlimləri ssenarisinə uyğun olaraq, Azərbaycan Ordusunun Quru Qoşunları, Hərbi Hava Qüvvələri, Xüsusi Təyinatlı Qüvvələr, Mühəndis Qoşunları, Raket və Artilleriya Qoşunlarının bölmələri Türkiyə Silahlı Qüvvələrinin hərbçiləri ilə birgə müxtəlif təlim döyüş tapşırıqlarını yerinə yetirirlər. İranın Azərbaycana qarşı hərbi təhdidləri fonunda keçirilən bu təlimlər Tehranın Zəngəzur dəhlizi ilə bağlı spekulyasiyalarina da cavabdır. Bu təlimlərdən sonra Türkiyə qoşunları müəyyən müddətdə Azərbaycanda qalacaq”.

Bir sözlə, politoloq sözügedən hərbi təlimlərin Azərbaycan üçün böyük əhəmiyyət kəsb etdiyi qənaətindədir.

Vidadi ORDAHALLI

Peşə etikası

Son xəbərlər