07/02/2023 02:03
728 x 90

Ermənilər sülhməramlı general Volkovu öldürəcəklər…

Samir Adıgözəlli: “Erməni millətçiləri Viktor Polyaniçkonun erməni terroru nəticəsində həlak olduğunu xüsusi vurğulamaqla, Volkovu da onun taleyi gözlədiyini demək istəyiblər”

img

Rus sülhməramlılarının himayəsi altına sığınıb yaşayan separatçıların, erməni revanşistlərinin, şovinsitlərinin növbəti hədəfinin Rusiyanın Qarabağdakı sülhməramlı kontingentinin komandiri general Andrey Volkov olduğu üzə çıxıb.

Azərbaycan mediasının əldə etdiyi məlumata görə, bu barədə informasiya ermənilərə məxsus Telegram kanallarında yayılıb. Qeyd edilib ki, erməni millətçiləri Rusiyanın Qarabağdakı sülhməramlı kontingentinin komandiri general Andrey Volkovu öldürməklə hədələyiblər.

Məlumatlara görə, radikal erməni millətçiləri Volkovun sülhməramlıların Azərbaycan yer adlarından istifadə etdiyini bildirdiyi müsahibəsindən narazılıqlarını bildiriblər.

Onlar generala eyham vurublar ki, 1988–1991-ci illərdə Azərbaycan Kommunist Partiyası Mərkəzi Komitəsinini ikinci katibi vəzifəsində çalışan Viktor Polyaniçko 1 avqust 1993-cü ildə Şimali Osetiyada bir qrup erməni yaraqlısının hücumu nəticəsində həlak olub.

  • Bu sırf erməni xislətinə xasdır ki, bir insandan, bir vəzifəli şəxsdən istədiklərini əldə edə bilməyəndə ona qarşı terror edirlər

Mövzuya şərh verən İSBAM sədri Samir Adıgözəlli “Bakı-Xəbər”ə şərhində qeyd etdi ki, Rusiya sülhməramlıları separatçılara həddən artıq açıq dəstək verir və onları qanadları altına alır, bu da onların daha çox separatçılığa, təxribata əl atmasına səbəb olur. Volkovun Azərbaycan toponimləri ilə bağlı verdiyi açıqlamanın ermənilərdə qıcıq yaratmasının səbəblərinə toxunan S.Adıgözəllinin fikrincə, sülhməramlı kontingent həmişə onlara xoş gələn ifadələrdən istifadə edib, bu dəfə isə Volkov Azərbaycan jurnalistləri qarşısında reallığı etiraf edib, etməkdən başqa  çarəsi də olmayıb, bu da erməniləri qıcıqlandırıb ki, o niyə toponimlərin Rusiya müdafiə nazirliyində saxtalaşdırıldığını deyib.

“Erməni millətçilərinin sülhməramlı kontingentinin komandiri Volkovu ölümlə hədələməsi gözlənilməz deyildi. Bu sırf erməni xislətinə xasdır ki, bir insandan, bir vəzifəli şəxsdən istədiklərini əldə edə bilməyəndə ona qarşı terror edirlər. Ermənilər indiyə qədər nə qədər tarixi şəxsiyyətə, vəzifə adamına qarşı terror törədiblər. Terror ermənilərin əsas silahıdır ki, bunu Volkova da, başqalarına qarşı da istifadə edə bilərlər. Bütövlükdə, onların Volkova hədə-qorxu gəlməsinin səbəbi bir qabaqdangəlmişlik də ola bilər. Digər tərəfdən də, erməni millətçiləri Viktor Polyaniçkonun erməni terroru nəticəsində həlak olduğunu xüsusi vurğulamaqla Volkovu da onun taleyi gözlədiyini demək istəyiblər.  Yayılan məlumatdan belə qənaətə gəlmək olar. Ermənilər sülhməramlıların komandanını ölümlə hədələyirsə, onda sülhməramlıların orada nə işi var, niyə erməniləri müdafiə edirlər? Rusiya dövləti sülh yaratmağı bacarmırsa, bu missiyadan imtina etməlidir, ya da onu doğru-dürüst şəkildə həyata keçirmək məcburiyyətindədir”.

Son yayılan məlumatın ermənilərin terrorçu mahiyyətini ortaya qoyduğunu deyən S.Adıgözəlli hesab edir ki, Ermənistanın radikal qüvvələrinin cavabı veriləcək və onlar bizim toponimlərimizə qarşı “səlib yürüşünü” dayandıracaqlar.         

S.Adıgözəllinin bildirdiyinə görə, Ermənistan hökuməti də, müxalifəti də, bütün millətçi, radikal, şovinist, separatçı qüvvələr də konkret bilməlidir ki, Azərbaycan Respublikası öz ərazisini işğaldan azad etdiyi kimi, beynəlxalq qanunvericiliyə və 10 noyabr razılaşmasına əsasən bu gün Qarabağın ermənilər yaşayan hissəsində də suveren hüquqlarını bərpa edəcək.  O vurğuladı ki, Azərbaycan onların Laçın dəhlizindən istifadə etməklə istədikləri təxribatları, qanunsuz fəaliyyətləri həyata keçirmələrinə imkan verməyəcək. S.Adıgözəlli hesab edir ki, ermənilərin nə deməsindən, Rusiya sülhməramlılarının hansı hərəkət etməsindən asılı olmayaraq Qarabağın ermənilər yaşayan hissəsində Azərbaycan toponimləri olduğu kimi bərpa ediləcək və hər kəs bu toponimləri təhrif etmədən, saxtalaşdırmadan ifadə edəcək.

İradə SARIYEVA

Peşə etikası

Son xəbərlər