Naxçıvan Dövlət Gömrük Komitəsində aparılan yoxlamalar ictimaiyyətin diqqət mərkəzindədir. DTX-nın muxtar respublikada yüksək vəzifə tutan iki nəfəri saxlamasından sonra bütün diqqət Naxçıvana yönəlib.
Hazırda hadisələrin inkişafını proqnozlaşdırmaq çətin olsa da, cəzalandırılacaq rəsmi şəxslərin sayının artacağı heç kimdə şübhə doğurmur.
DTX-nın muxtar respublikada keçirdiyi əməliyyat nəticəsində Naxçıvan Muxtar Respublikasının Maliyyə naziri Rafael Əliyev və DGK-nın tariflərin tənzimlənməsi və ödənişlər şöbəsinin müdiri Mənsur Əsgərov saxlanılıb. Diqqətçəkən məqam isə odur ki, Naxçıvandan seçilən və həmişə siyasi fəallığı ilə diqqət mərkəzində olan deputatlar ciddi cəhdlə və ən müxtəlif bəhanələrlə bu hadisələrə münasibət bildirməkdən yayınırlar. Dəfələrlə Naxçıvandan seçilən deputatlarla əlaqə saxlamağa çalışsaq da, bütün cəhdlərimiz nəticəsiz qalıb. Eldar İbrahimov, İsa Həbibbəyli, Səttar Möhbalıyev, Ülviyyə Həmzəyeva mövzuda danışmaqdan yayınırlar.
- Siyavuş Novruzov: “Həssas bölgə ilə bağlı ermənilərin öyrətdiyi adamlar fikir söyləyirlər”
Milli Məclisin Naxçıvandan seçilən deputatı Siyavuş Novruzov uzun sükutdan sonra məsələyə münasibət bildirib. O deyib ki, Naxçıvan Azərbaycanın həssas bölgəsidir: “Həssas bölgə ilə bağlı ermənilərin öyrətdiyi adamlar fikir söyləyirlər. Digər rayonlarda da hüquq-mühafizə orqanları əməliyyat aparır, tutulanlar var. Böyütməyə ehtiyac yoxdur. Naxçıvan dövlətin arxasındadır, şəhid olmağa hazırdır. Xahiş edirəm ki, bu mövzuya həssaslıqla yanaşılsın. Burada hər hansı siyasi oyunbazlığın qurulmasına heç bir ehtiyac yoxdur. Hüquq-mühafizə orqanları Naxçıvanı da yoxlayırlar. Burada da neçə nazirlikdə yoxlamalar aparılır. Hüquq-mühafizə orqanları harada korrupsiya var, oranı yoxlayır”.
4 saylı Naxçıvan şəhər seçki dairəsindən bir neçə dəfə deputat seçilən Eldar İbrahimovun isə məsələyə münasibəti çox maraqlı olub:
“Mənim Naxçıvanda baş verən hər hansı hadisə haqqında məlumatım yoxdur. Mən də sizin kimi bəzi xəbərləri mətbuatdan oxuyuram. Ona görə də bilmədiyim şey haqqında danışmaq istəmirəm”.
Naxçıvan Muxtar Respublikasının Gömrük Xidmətinin rəisi Səhət Həbibbəylinin saxlanması barədə xəbərlərə dair suala onun AMEA prezidenti və Naxçıvandan seçilən deputat olan atası İsa Həbibbəyli deyib ki, oğlu ilə əlaqəli Naxçıvanda baş verənlərlə bağlı deməyə sözü yoxdur.
“Oğlunuz haradadır, ondan xəbəriniz varmı” sualına isə İsa Həbibbəyli ”Bilmirəm ki, haradadır, xəbərim də yoxdur” deyərək cavab verib.
- Cəbi Quliyev: “İndiki vəziyyətdə bu məsələlərlə bağlı ətraflı fikir bildirsək, prosesləri qabaqlamış olarıq”
7 saylı Ordubad-Culfa dairəsindən Yeni Azərbaycan Partiyasından deputat olan Cəbi Quliyev isə “Bakı-Xəbər”ə açıqlamasında bildirdi ki, baş verənlərdən düzgün nəticə çıxarmaq lazımdır: “Hesab edirəm ki, Naxçıvanda yaşanan hadisələri başqa istiqamətə yozmağa ehtiyac yoxdur. Ölkənin müxtəlif regionlarında, müxtəlif dövlət qurumlarında analoji halların şahidi olmuşuq. Kimin bu cür əməllərdə iştirakı varsa, onlar da məsuliyyətə cəlb edilir. Korrupsioner fəaliyyətlə mütləq mübarizə aparılmalıdır. Bəli, bu gün Muxtar Respublikada yoxlamalar var. Bununla bağlı həbs edilənlərin, dindirilənlərin olması təbiidir. Biz bunu dəstəkləyirik. Çünki korrupsiyanın qarşısını almaq üçün belə addımlara mütləq ehtiyac var. İndiki vəziyyətdə bu məsələrlə bağlı ətraflı fikir bildirsək, prosesləri qabaqlamış olarıq. Çünki həm istintaq gedir, həm də yoxlamaların nəticəsi yekunlaşmayıb. İstinaqı aparan DTX bu barədə cəmiyyəti lazımı qədərdə məlumatlandırır. Xüsusi bir fikrə ehtiyac qalmır. Cənab Prezidentin iradəsinə uyğun olaraq, belə yoxlamalar ölkə boyu həyata keçirilir. Məsələnin yekunu ilə bağlı aidiyyəti qurumlar ətraflı məlumat verəcək. Bir daha qeyd edim ki, burada hansısa fərqli çalarlar axtarmağa ehtiyac yoxdur. İstənilən halda, ustintaqın və yoxlamaların son nəticəsini gözləməliyik”.
Məhəmmədəli QƏRİBLİ
