07/02/2023 12:05
728 x 90

Molla rejimindən Azərbaycana daha bir düşmənçilik - "Bakı respublikası", "Zorxana"...

“Tehran rejiminin Azərbaycanı “Bakı Respublikası” adlandırması onun öz taleyinə bədgümanlığından, narahatlığından, nigarançılığından irəli gəlir”

img

Tehran rejimi və onun tabeliyində olan cızmaqaraçılar müstəqil Azərbaycan dövlətinin bütün uğurlarına qara yaxmaqla, qısqanc yanaşmaqla məşğuldur. Kor yapalaq Günəşi sevməyən kimi, mollakratiya rejimi də heç cür Azərbaycanı qəbul edə, onun uğurlarına sevinə bilmir. Nəticədə də az qala hər gün Azərbaycana qarşı təxribata yol verirlər.

"Azfront"un yaydığı məlumata görə, İran hökumətinin rəsmi qəzeti olan “Iran Newspaper” növbəti dəfə təxribat xarakterli yazı ilə çıxış edərək, Azərbaycanı “Bakı Respublikası” adlandırıb. Eyni zamanda məqalə müəllifləri Azərbaycanın irəli sürdüyü “Pəhləvanlıq, ənənəvi oyunlar” “zorxana və idman” nominasiyasının UNESCO-nun bəşəriyyətin qeyri-maddi mədəni irs siyahısına daxil edilməsindən də yaman narazı qalıblar.

Görsəndiyi kimi, molla rejiminin bizə qarşı  paxıllığı, təxribatı hər gün təkrarlanır, yeni-yeni formalarda üzə çıxır.

Fars rejiminin qəzeti Azərbaycanı niyə “Bakı Respublikası” adlandırır, dəyərlərimizin UNESCO ya daxil edilməsindən niyə narahat olurlar? Bu təxribat, qısqanclıq nədən doğur? Zorxana bizim qədim oyunumuzdur və tarixi çox qədimdir, bunun  molla rejiminə nə aidiyyəti var ki, belə qıcıqlanırlar?

  • “...Molla rejiminin etirazı çox gülüncdür”

Müstəqil siyasətçi Bünyamin Qəmbərli “Bakı-Xəbər”ə şərhində bildirdi ki, molla rejiminin məqsədi bəllidir. “Tehran rejiminin Azərbaycanı “Bakı Respublikası” adlandırması onun öz taleyinə bədgümanlığından, narahatlığından, nigarançılığından irəli gəlir. Bu rejim təbii olaraq düşünür ki, Qərbi Azərbaycan və Şərqi Azərbaycan ostanlarının da adları Azərbaycanla bağlı olduğuna görə Qərbi və Şərqi Azərbaycan ostanları istiqlaliyyət uğrunda mübarizə aparacaq və Azərbaycan dövləti ilə birləşmək istəyəcək. Buna görə də Azərbaycan Respublikasını hər zaman “Bakı respublikası” adlandırırlar və çalışırlar ki, Azərbaycan sözünü işlətməsinlər. Konkret olaraq zorxana oyunlarına gəldikdə isə, xatırladım ki, elmi işimin mövzusu “Azərbaycanlıların ənənəvi həyat tərzində fiziki mədəniyyətin rolu”dur. Mən bu elmi işi yazarkən araşdırmalar apardım və araşdırmalar zamanı bir daha əmin oldum ki, zorxana Şərqdə çox geniş yayılıb, amma  onun bir çox növləri ilkin olaraq Azərbaycanda formalaşıb. Məsələn, orada oxatmanı ifadə edən kəbbadə, şeşpər, toppuz atmanı göstərən mil oyunu, güləş oyunu var. Bunların bir çoxu ilkin olaraq Azərbaycanda formalaşıb və buradan da dünyaya yayılıb. Mən elmi işimdə də bunları elmi mənbələrə əsaslanaraq tədqiq edib yazmışam. İranın konkret olaraq bu məsələyə etirazına gəlincə, molla rejiminin etirazı çox gülüncdür. Yaxşı olar ki, bu rejim özünün mövcudluğunun dərdinə qalsın, Azərbaycanın UNESCO-ya daxil etdiyi qeyri-maddi irs onu maraqlandırmasın. Bu gün rejimin özünün taleyi sual altındadır. Başqa şeylər barədə düşünməyə onun vaxtı, macalı olmamalıdır”.

B.Qəmbərli hesab edir ki, bu gün Tehran rejiminin Azərbaycanın bir çox maddi və qeyri-maddi irsinə sahiblənməyinin, tariximizə əl uzatmağının səbəbi bizim özümüzük. Onun fikrincə, biz dövlət, xalq olaraq öz dəyərlərimizə lazımı səviyyədə sahib çıxa bilmirik, nəticədə molla rejimi belə əsassız iddialar ortaya qoymağa başlayır. “Azərbaycan hökuməti tarixinə, mədəniyyətinə yetərincə sahib çıxmır, çıxa bilmir. Əgər Azərbaycan öz tarixinə, tarixi dövlətlərinə sahib çıxsa, İran, zorxana da daxil olmaqla, nə maddi və qeyri-maddi irsimizə, nə də tarixi dövlətlərimizə, tarixi şəxsiyyətlərimizə, dahi yazıçılarımıza sahib çıxa bilər”-deyə B.Qəmbərli qeyd etdi.   

Əli TURABOV

Peşə etikası

Son xəbərlər