Məhərrəm Zülfüqarlı: “Lavrovun dediklərinin səmimiliyinə inanmaq olmaz”
“İkinci Qarabağ müharibəsi başa çatdıqdan sonra Rusiya Federasiyası, Azərbaycan və Ermənistan liderləri səviyyəsində belə bir anlayış var idi ki, Qarabağın statusunu sonraya saxlamaq olar”.
Bu barədə keçirilən videokonfransda Rusiya xarici işlər naziri Sergey Lavrov bildirib.
Lavrovun sözlərinə görə, Rusiya öz sülh müqaviləsi variantını hazırlayıb, bu sənəd yazda tərəflərə təqdim edilib və orada bu ideya yer alırdı: “Azərbaycan bildirib ki, onu dəstəkləməyə hazırdır, amma status məsələsi üzərində əlavə olaraq işləmək lazımdır. Oktyabrın sonlarında Soçidə keçirilən görüşdə biz bu məsələyə qayıtmaq və tərəfdaşlarımızın həmin centlmen anlayış əsasında hərəkət etməyə - bütün məsələləri həll etməyə, Qarabağın statusunu isə sonraya saxlamağa nə dərəcədə hazır olduqlarını başa düşmək istəyirdik. Amma prezident Əliyev və baş nazir Paşinyan Praqadan Soçiyə BMT Nizamnaməsini və Almatı bəyannaməsini rəhbər tutaraq sülh müqaviləsi imzalamaq istədiklərini əks etdirən sənədi gətiriblər. BMT-nin yaradılması haqqında Almatı bəyannaməsində açıq şəkildə deyilir ki, yeni dövlətlər arasında sərhədlər keçmiş SSRİ-nin ittifaq ölkələri arasındakı sərhədlərə əsaslanacaq, burada Dağlıq Qarabağ Muxtar Vilayəti birmənalı olaraq Azərbaycan SSR-in bir hissəsidir”.
Daha sonra Lavrov bunları əlavə edib: “Ermənistan Praqada bu sənədi imzaladıqdan sonra erməni həmkarlarımız deyirlər ki, qoy Rusiya Qarabağın statusu ilə bağlı təkliflərini (sonraya saxlamaq) təsdiq etsin, amma belə danışıqlar aparılmır”.
- “Rusiya status məsələsini hansısa vasitələrlə saxlamaqla erməni separatçılarından alət kimi istifadə edir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Lavrovun dediklərinin səmimiliyinə inanmaq olmaz: “Bu həmin Lavrovdur ki, 2017-ci ildə Qarabağın Azərbaycanın daxili işi olmadığını dedi. Başımıza erməni bəlasını tarix boyu Rusiya gətirib. İndi də Cənubi Qafqaz uğrunda vəkalət savaşı gedir. Rusiya istəmir ki, Azərbaycanla Ermənistan arasında Qərb vasitəçilik etsin. İstəmir ki, iki ölkə arasında dayanıqlı sülh olsun. Çünki belə olarsa, o zaman Cənubi Qafqazda Rusiyanın qalmasına ehtiyac olmayacaq. Lavrov elə görüntü yaradır ki, guya Rusiya Qarabağın Azərbaycan daxilində olmasına qarşı deyil. Ancaq qətiyyən bu belə deyil. Rusiya status məsələsini hansısa vasitələrlə saxlamaqla erməni separatçılarından alət kimi istifadə edir. Belə olmasaydı, o zaman Azərbaycan Ordusunun Xankəndiyə daxil olmasına mane olmazdı. Halbuki, bununla da məsələ birdəfəlik həll olunacaqdı. Rusiya 10 noyabr razılaşmasından sonra erməniləri Qarabağa qaytardı, onlar üçün evlər tikdi və s. İndi də Qarabağa silah daşınmasına göz yumur. Bu baxımdan Lavrova inanmaq olmaz”.
Vidadi ORDAHALLI
