Bu günlərdə Prezident İlham Əliyevin “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda səsləndirdiyi fikirlər bəzi Rusiya media orqanları tərəfindən qərəzli şəkildə təqdim olunur. Rus mediası çalışır ki, bütün vasitələrlə Əliyevin ADA çıxışını anti-Rusiya çıxışı kimi təqdim etsin.
Məsələn, Prezidentin çıxışında belə bir məqam var: “Bizim Türkiyə ilə dövri əsaslarla bir il ərzində 10-dan artıq birgə hərbi təlimlərimiz olub. Onlar həm Türkiyədə, həm də Azərbaycanda təşkil olunub. Bu, regional sabitliyin və təhlükəsizliyimizin mühüm meyarıdır. Azərbaycana və ya Türkiyəyə qarşı məkrli planları olanlar bilməlidirlər ki, türk ordusu tək deyil, orada, həmçinin bizim ordu da var. Bizim ordu isə tək deyil, o cümlədən orada türk ordusu da var. Sərhədimizdə təxribatları planlaşdıranlar, bizi qorxutmağa çalışanlar bu planlarını yaddan çıxarmalıdırlar”.
Bunu Azərbaycanın Türkiyə ilə konfederasiya şəklində birləşməsi kimi təqdim edirlər. Guya bununla Əliyev nəinki İrəvanı, Moskvanı da hədələyir.
Bundan başqa, Prezidentin həmin tədbirdə belə bir sitatı var: “Bu kiçik, yoxsul, asılı, Rusiyadan asılı olan və ya hətta Rusiyanın qulu olan bir ölkə deyir ki, bir gün gələcək, onlar Türkiyənin ərazisini işğal edəcəklər. Bu, zəhərli şüurdur”. Burada söhbət Ermənistanın məkrli niyyətlərindən gedir.
O baxımdan bütün bunlarda anti-Rusiya məzmunlu nə var ki?
“Biz hər zaman öz düşmənimizin nə qədər hiyləgər olmasının fərqində olmalıyıq”
Məsələyə münasibət bildirən İrəvan Azadllıq Təşkilatının sədri Təbriz Musayevin fikrincə, priinsipcə bütün bu deyilənlərdə Rusiyaya yönəlik hansısa siyasət yoxdur: “Sadəcə, Rusiyanın bəlli mətbuat orqanları davamlı olaraq Azərbaycana qarşı kampaniya aparır. Xüsusən də o mətbuat orqanları ki, orada çoxsaylı erməni kökənli şəxslər fəaliyyət göstərir. Çünki ermənilərin əsas istəyi odur ki, Rusiya ilə Azərbaycanı qarşı-qarşıya qoysunlar. Bunun nəticəsində də Ermənistan Azərbaycan ərazilərini işğal etsin, Qarabağda separatçılar yenidən təşəbbüsü ələ alsınlar. Davamlı olaraq erməni maraqlarından çıxış edən bir sıra rus media orqanları belə bir rəy formalaşdırmağa çalışırlar ki, Rusiya-Türkiyə yaxınlaşması situativ xarakterlidir. Bəlli bir müddətdən sonra iki ölkə arasında düşmənçilik dərinləşəcək. Azərbaycan Turan birliyinə dəstək verməklə Rusiyanın guya strateji maraqlarına toxunur və s. Yəni biz hər zaman öz düşmənimizin nə qədər hiyləgər olmasının fərqində olmalıyıq. Azərbaycan hər zaman belə təxribatlara hazır olmalıdır”.
Vidadi ORDAHALLI
