Yadigar Məmmədli: “Bütün bunlar Tehran rejiminin Azərbaycanla bağlı məkrli siyasətindən irəli gəlir”
Adətən İran hakimiyyəti Azərbaycana dövlət tədbirlərinə göndərdiyi media mənsublarına xüsusi təlimat verir. Yəni həmin media təmsilçiləri əsası olmayan məsələlərlə bağlı qərəzli, provokativ suallar verirlər. İran tərəfi 44 günlük müharibə zamanı da, ondan sonra da Azərbaycana qarşı bənzər mövqedən çıxış edib.
Söhbət ondan gedir ki, 2021-ci ilin fevralında Prezident İlham Əliyev yerli və xarici media nümayəndələri üçün mətbuat konfransı keçirib. Həmin tədbirdə İrandan olan jurnalist qərəzli sual ünvanlasa da ölkə başçısı tutarlı arqumentlərlə onu susdurdu. Belə ki, İranın Mehr agentliyini təmsil edən jurnalist “Qarabağ müharibəsi zamanı regionda terrorçu qrupların fəaliyyət göstərməsi barəsində xəbərlər yayılırdı. Bu isə region üçün böyük təhlükədir. Burada hansı kollektiv səylər göstərilməlidir? Bununla bağlı Azərbaycan Respublikası tərəfindən hansı addımlar atılacaq” sualına Prezidentin cavabı belə oldu: “Bir məsələni aydınlaşdırmaq istəyirəm. Siz müharibə zamanı terrorçu qrupların fəaliyyət göstərməsi haqqında danışırsınız, hansı məlumatlara, kim tərəfindən verilən məlumatlara istinad edirsiniz? Bilirsiniz, sualınız bir növ ittiham formasındadır. İstənilən məlumat haqqında danışmaq olar, ancaq mənbə qeyd edilməlidir. Siz deyirsiniz ki, məlumatlar yayıldı, onların mənbəyini də qeyd edin. Terrorçu qruplar haqqında məlumatın mənbəyini qeyd edin. Hansı regiondan və ya ölkədən söhbət gedir? Siz mənbə göstərə bilmirsiniz. Kimisə ittiham etmək asandır. Siz onu sual formasında verə bilərsiniz, ancaq, burada mahiyyət dəyişmir. Dediyinizin arxasında dayanmaq daha çətindir. Xəbər deyirsiniz, yəni hansı mənbələrə istinad edirsiniz? Sualınızda mənbəni qeyd edə bilsəniz, daha geniş cavab verə bilərdim”.
Bütün bunlar ayrı-ayrı medianın və ya jurnalistin yox, onları təlimatlandıran rejimin Azərbaycana və azərbaycanlılara münasibətidir. Bunlar hətta Azərbaycan Prezidentinə də təxribat, pozuculuq məzmunlu sual verirlər. Bu gün İran hökumətinin özünü belə aparması bir daha təsdiq edir ki, jurnalistlərin o cür sual verməsinin səbəbkarı İran rejimidir. Çünki onlar jurnalisti bu cür pozucu suallar verməklə bağlı təlimatlandırırlar.
- “Bunlar özlərini jurnalist kimi yox, xəfiyyə kimi aparırlar”
Məsələyə münasibət bildirən media eksperti Yadigar Məmmədlinin fikrincə, belə təxribat xarakterli suallar İran rejiminin sifarişləri əsasında yaranır: “Dəfələrlə belə olub. İranla yanaşı, ölkəmizi sevməyən dövlətlərin media nümayəndələri cənab Prezidentə qərəzli suallar verirlər. Xüsusən də İrandan olan media mənsubları daha çox təxribatçı suallar verirlər. Hər vasitə ilə çalışırlar ki, qarşı tərəfi pis mövqedə qoysunlar. Bütün bunlar Tehran rejiminin Azərbaycanla bağlı məkrli siyasətindən irəli gəlir. Onlar bilərəkdən belə suallar verirlər. Çünki onlar özlərini jurnalist kimi yox, xəfiyyə kimi aparırlar. İnformasiyanın mənbəyini, onun nə dərəcədə düzgün olmasını yoxlamadan provokativ suallar verirlər. Məqsədləri odur ki, ölkəmiz barəsində mənfi imic formalaşsın. Bir növ bizi pis vəziyyətdə qoymaq üçün belə hazırlanmış emissarlar dövlət tədbirlərinə göndərilir. Ancaq nə etsələr də məqsədlərinə çata bilmirlər. Hər zaman Prezident İlham Əliyev tutarlı arqumentlərlə onları susdurur”.
Vidadi ORDAHALLI
