Naxçıvana illik dövlət büdcəsindən ayrılan 500 milyon manatın taleyi yavaş-yavaş açılır...

Məlum olduğu kimi, son vaxtlar Naxçıvanda baş verənlər ən çox müzakirə olunan məsələlərdən biridir. Söhbət Muxtar Respublikada korrupsiya ilə bağlı aparılan mübarizənin doğurduğu ajiotajdan gedir. Bəziləri ciddi əsas olmadan buna siyasi rəng, çalar verməyə çalışır. Ancaq belə yanaşma reallığı əks etdirmir.

Məsələ ondadır ki, korrupsiya bütün dünyada mövcud olan bir bəladır. O cümlədən, Azərbaycanda da illərdir bu problem var və son illər bununla mübarizə güclənməkdədir. Bir sıra icra başçılarının, yüksək vəzifəli məmurların korrupsiya əməllərinin Dövlət Təhlükəsizliyi Xidməti tərəfindən ifşa olunması cəmiyyətdə böyük rəğbətlə qarşılanır. Belə olan halda Naxçıvan korrupsiya ilə mübarizə tədbirlərindən niyə kənarda qalmalıdır ki? Nəzərə alsaq ki, Naxşıvan anklav ərazidə yerləşir və Azərbaycanın materik hissəsi ilə birbaşa quru əlaqəsinə malik deyil, o zaman bu kimi məsələlər xüsusi diqqət mərkəzində olmalıdır. Azərbaycanın digər bölgələrində olduğu kimi, Naxçıvanda da korrupsiya, dövlət vəsaitinin mənimsənilməsi hallarına qarşı sərt tədbirlər gücləndirilməlidir. Bu baxımdan oradakı həbslər ölkənin digər bölgələrində və strukturlarda analoji pozuntularla bağlı tədbirlərdən heç nə ilə fərqlənmir. Ölkə üzrə korrupsiyaya qarşı aparılan mübarizənin tərkib hissəsidir. Müşahidələr göstərir ki, indiyə qədər Naxçıvanda korrupsiyaya qarşı mübarizə çox zəif olub. Belə ki, 30 il ərzində Naxçıvanda korrupsiyaya görə cəmi 2 yüksək rütbəli məmur həbs olunub - daxili işlər naziri və milli təhlükəsizlik naziri. Onları da bir neçə ildən sonra həbsdən azad ediblər. Halbuki, hər il Naxçıvana dövlət büdcəsindən 500 milyon manat dotasiya ayrılırdı. Naxçıvanın öz gəlirlərinin guya 180 milyon manat olduğu deyilirdi. Ancaq əslində bu belə deyildi. Çünki həqiqətən də belə olsaydı, o zaman bir belə dotasiyanın Naxçıvana ayrılmasına ehtiyac olmazdı. İnsanlar sosial problemlər üzündən oranı tərk etməzdilər. Təkcə həbs olunan 2 gömrük və maliyyə məmuru 276 milyon manat pul mənimsəyib. Bütün bunlar onu sübut edir ki, ötən otuz il ərzində dövlət əmlakının mənimsənilməsi və korrupsiya ilə mübarizə yarıtmaz vəziyyətdə olub. Bu səbəbdən Azərbaycanın mərkəzi hakimiyyət orqanları buna müdaxilə etmək məcburiyyətində qaldılar. Otuz ildə Naxçıvandakı müvafiq qurumlar, təəssüf ki, sözügedən neqativ hallarla mübarizə aparmayıblar. Halbuki, onlara etimad göstərilmişdi. Yerli hakimiyyət bunu yarıtmadığına və əksinə, buna qurşandığına görə Bakıdan buna ciddi müdaxilə olunması zərurətə çevrildi. Ona görə də Naxçıvanda görülən tədbirlər Azərbaycanda ümumən korrupsiyaya qarşı aparılan ümumi mübarizənin təzahürüdür. Çünki Naxçıvan korrupsiya ilə mübarizədə kənarda qalmamalıdır. O üzdən burada qəribə heç nə yoxdur.

• “Oradakı yerli idarəçilik orqanları bu illər ərzində üzərlərinə düşən vəzifəni yerinə yetirməyiblər”

Məsələyə münasibət bildirən Yeni Yol Partiyasının sədri Ramil Hüseynovun fikrincə də, baş verənlərə siyasi çalar qatmaq doğru deyil: “Reallıq ondan ibarətdir ki, Naxçıvanın anklav vəziyyətindən sui-istifadə edən oradakı yerli idarəçilik orqanları bu illər ərzində üzərlərinə düşən vəzifəni yerinə yetirməyiblər. Ayrılan vəsaitlər təyinati üzrə xərclənməyib. Xərclənsəydi, təbii ki, bir belə pozuntular baş verməzdi. Sosial çətinliklər üzündən əhali Naxçıvanı tərk etməzdi. İşsizlik üzündən minlərlə insan Bakıya və digər şəhərlərə axın etməzdi. Halbuki, Naxçıvan zəngin təbii resurslara malikdir. Əgər büdcədən ayrılan vəsaitlər, gömrükdən toplanan vəsaitlər mənimsənilməsəydi, o zaman orada inkişaf fərqli olardı. Miqrasiya səviyyəsi aşağı olardı. Bu baxımdan hesab edirəm ki, Naxçıvanda korrupsiya ilə mübarizə müsbət dəyərləndirilməlidir”.

Partiya sədri onu da əlavə etdi ki, bütün bunlar ölkə üzrə korrupsiyaya qarşı mübarizənin bir hissəsidir.

Vidadi ORDAHALLI