Əliyev “Şərq Tərəfdaşlığı”nda Azərbaycanın gələcəyi ilə bağlı yeni mesajlar verdi - “fərqlər artıb”...
Prezident İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda sualları cavablandırarkən dedi ki, “Şərq Tərəfdaşlığı”nın üzvü olan altı dövlətə indi nəzər salsanız, həmin ölkələr arasında əvvəlkindən daha böyük fərqlər görəcəksiniz. Ukrayna müharibəsindən sonra fərqliliklər daha da dərinləşib.
Müşahidələr göstərir ki, həqiqətən də “Şərq Tərəfdaşlığı”na üzv olan ölkələr arasında fərqliliklər daha da dərinləşib. Ukraynanın NATO-ya üzv olmasına prinsipial razılıq var. Moldova və Gürcüstanın Avropa İttifaqına üzv olmasına razılıq verilib. Azərbaycan bunlardan kənardır. Ermənistan Avrasiya İqtisadi İttifaqında, KTMT-də təmsil olunur. Belarus isə bütün bunlardan kənarda qalan ölkəyə çevrilib. Bütün bunlar bir daha “Şərq Tərəfdaşlığı”na üzv ölkələr arasında fərqliliklərin daha da artığını göstərir. Belə şəraitdə Prezident İlham Əliyevin “Şərq Tərəfdaşlığı” ilə bağlı hazırkı mövqeyini dünyaya, Avropaya nə kimi mesajlar kimi qəbul etmək olar?
- “Prezidentin bununla bağlı hazırkı mövqeyi ölkəmizin bu sahədə islahatyönümlü imicini bir daha ortaya qoydu”
Sözügedən məsələyə aydınlıq gətirən politoloq Tural İsmayılov bununla bağlı bir sıra məqamlara toxundu: “Əvvəla, Azərbaycan hər zaman “Şərq Tərəfdaşlığı” proqramına öz sadiqliyini nümayiş etdirib. Ölkəmiz bu prosesdə məqsədyönlü irəliləyişlərin olması üçün daim öz təşəbbüslərini göstərib. Ancaq təəssüflər olsun ki, Azərbaycanın “Şərq Tərəfdaşlığı” ilə bağlı ortaya qoyduğu mövqeyə baxmayaraq, hələ də bəzi Qərb ölkələri Ermənistanın regionda aqressiya yaradan siyasətinə qarşı bir mövqe ortaya qoymurlar. Üstəlik, Ermənistanın praktiki seçimi bəllidir. Bu dövlət Avropaya əks mövqedə olan qurumlarda təmsil olunur. Eyni zamanda nəzərə almaq lazımdır ki, Azərbaycanın onsuz da Avropa İttifaqı ilə yüksək münasibətləri var. Azərbaycan Avropanın enerji təhlükəsizliyində mühüm rollardan birini oynayır. Mərkəzi və Şərqi Avropanın alternativ enerji bazarı baxımından Azərbaycana böyük ehtiyacı var. Məhz ölkəmizin bu sahədə mövqelərinin güclənməsi, eyni zamanda qlobal siyasi çəkisinin artması Avropanın Azərbaycana marağının da artmasına səbəb olur. O baxımdan hesab edirəm ki, Azərbaycan-Avropa münasibətləri inkişaf edəcək, amma bu başqa formada olacaq. 2023-cü ildə bu münasibətlərin fərqli məcraya daxil olacağı gözlənilir. Cənab Prezidentin “Şərq Tərəfdaşlığı” ilə bağlı hazırkı mövqeyi də ölkəmizin bu sahədə islahatyönümlü imicini bir daha ortaya qoydu. Yəqin ki, bu sahədə bundan sonra çox böyük irəliləyişlər əldə ediləcək”.
Vidadi ORDAHALLI
