“Əgər biz uduzsaq, Haaqa hətta Kremldə təmizlik işləri aparan qapıçını da gözləyir”. Bunu Rusiya televiziyasının efirində Kremlin təbliğatçısı Marqarita Simonyan deyib.
O, “Rossiya-1” kanalında gözlənilməz faktlar səsləndirib. M.Simonyan açıq şəkildə ifadə edib ki, Rusiya müharibəni uduzsa, prosesin bütün iştirakçıları Haaqada məhkəməyə çıxarılacaq: “Onlar Ukraynaya qarşı müharibədə uduzduqdan sonra onları nələrin gözlədiyini yaxşı bilirlər. Özləri də etiraf edirlər ki, rus ordusu döyüş meydanında Ukrayna ordusuna müqavimət göstərə bilmir. Ona görə də onların edə biləcəyi yeganə şey infrastrukturu bombalamaqdır. Onlar bizim Krımı almağa hazırlaşırlar, biz də bu vəziyyətdə edə biləcəyimiz tək şeyi edirik, bombalayırıq, hər gün bombalayırıq. Biz onların infrastrukturunu bombalayırıq. Allah bilir, biz bunu etmək istəmirdik”.
Daha sonra o, müharibədə məğlubiyyətdən sonra onları nə gözlədiyini dilə gətirib: “Biz itirməkdən qorxmalıyıq, biabırçılıqdan qorxmalıyıq və xalqımıza xəyanət etməkdən qorxmalıyıq. Əgər uduzmağı ağlımıza gətirsək, Haaqa hətta Kremldə təmizlik aparan qapıçını da gözləyir”.
Görünən odur ki, erməninin xisləti dəyişən deyil. Putin Simonyana mediada böyük şərait yaratsa da, o, Rusiyanın məğlum olacağına eyham vurur.
“Onlar yaxşı bilirlər ki, ukraynalılara qarşı törədilən hər bir hərbi cinayət cavabsız qalmayacaq”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, Simonyan kimi Kreml aqitropları artıq özlərini sığortalamağa başlayıblar: “Fakt budur ki, Rusiya açıq-aşkar Ukraynada başlatdığı hərbi əməliyyatlarında ciddi uğursuzluqlara məruz qalmaqdadır və hələ ötən il fevralın 24-də başlayan müharibədəki “qalibiyyət ruhundan” əsər-əlamət belə qalmayıb. Məhz həmin dövrlərdə Rusiya telekanallarında çıxış edən əsas aqitroplar, yaxud Kremlin sifarişləri ilə danışan təbliğatçılar tamamilə fərqli münasibətlər nümayiş etdirirdilər. Misal üçün, bəyan edirdilər ki, rus tankları cəmi bir həftəyə Kiyevin mərkəzi küçələrində mövqelənəcəklər, yaxud dünyanın ikinci ən güclü ordusu NATO-ya müharibə dərsi verəcək və sübut edəcək ki, bu ordu əslində dünyanın birinci ordusudur və s. Amma nə oldu? Bu gün Rusiyanın təbliğat maşınları nə qədər ört-basdır etməyə cəhdlər göstərsələr də. artıq Ukrayna çöllərində muzdluları çıxmaqla 100 minə yaxın hərbçi həyatını itirib. Rusiyanın hərbi-texniki bazası, demək olar ki, tükənmək üzrədir. Üstəlik, cəbhəyə rezervdə qalan və hələ ötən əsrin ortalarında istehsal edilmiş köhnə tanklar, toplar, zenit-raket kompleksləri göndərilir. Eləcə də biz son vaxtlar Rusiyanın İrandan nəinki ucuz PUA-lar, həm də zirehli yeləklər, dəbilqələr aldığını müşahidə etməkdəyik. Bütün bunlar reallıqda Rusiya ordusunun nə qədər acınacaqlı vəziyyətdə olduğunu açıq-aşkar isbatlamaqdadır. O cümlədən, artıq cəbhəyə zorən göndərilən insanlar da onlara vəd edilən məvaciblərini ala bilmirlər. Bu isə həm də onu göstərir ki, Rusiya nə qədər güclü iqtisadiyyata malik olmasına rəğmən, artıq bu ölkənin iqtisadi cəbhəsi də laxlamağa başlayıb. Əlbəttə ki, bütün bunlar Marqarita Simonyan və onun kimi digər aqitropların artıq fərqli düşüncələrlə çıxış etmələrinə zəmin yaradır. Hətta deyərdim ki, onlar, necə deyərlər, valı dəyişməyə başlayıblar və bu vasitə ilə artıq özlərini sığortalamağa cəhd edirlər”.
B.Quliyev hesab edir ki, Rusiya TV-lərində ölkənin Ukrayna cəbhəsində uduzması mümkünlüyü barədə səslənən fikirlər təsadüfi deyil: “Haaqa məhkəməsi ətrafındakı şərhlər, deyərdim ki, bu da bir etirafdır. Müharibə cinayətləri hər yerə cinayət hesab olunur və təəssüf ki, müharibənin ilk vaxtlarında Ukraynanın bir çox şəhərlərinə daxil olan Rusiya ordusu sözün əsl mənasında mülki insanlara qarşı amansızlıqlar törədib. Qətliamlara əl atıblar və bunun adı da birdir – soyqırımı. Məhz belə bir məqamda Azərbaycan xalqı Ukraynadakı bu hadisələri çox gözəl anlayır, çünki bizim xalqımız da uzun illər erməni terroruna məruz qalıb, soyqırımlara uğrayıb və burada Xocalı qətliamını xatırlamamaq olmur. Məhz bu məşum hadisə zamanında da Rusiyanın 366-cı alayı erməni terrorçuları ilə eyni cinahda dayanaraq azərbaycanlılara qarşı vəhşiliklərdə iştirak etmişdilər. O cümlədən, Pskovun desant alayının da Qarabağda hansı cinayətlərə əl atması barədə kifayət qədər faktlar var. Tarix bu faktları unutmur və bizlər də inanırıq ki, çox yaxın zamanlarda həmin vəhşilikləri törədən ünsürlər, cinayətkarlar Haaqa məhkəməsi qarşısında cavab verməli olacaqlar. Bu baxımdan, Simonyanın etirafı da həmin məcradadır. Onlar yaxşı bilirlər ki, ukraynalılara qarşı törədilən hər bir hərbi cinayət cavabsız qalmayacaq və gec-tez cinayətkarlar öz cəzalarına çatdırılacaqlar. Və məsələ yalnız mülki vətəndaşlara qarşı amansızlıqlarda deyil, məsələ həm də mülki obyektlərin, enerji və istilik sistemlərini kütləvi şəkildə bombalayaraq insanları soyuq qış aylarında ölümlə üz-üzə qoymaqdadır. Belə olan halda dünya birliyi, əlbəttə ki, baş verənlərə biganə qala bilməz. Ona görə də indi quyruqları qapı arasında qalan Simonyan, Keosayan, Miqranyan, Baqdasaryan, habelə rusiyalı şovinist təbliğatçılar öz haylarına qalmağa başlayıblar ki, bəlkə dar ayaqda çullarını sudan quru çıxarmağa nail olsunlar. Amma ola biləcəklərmi? Elə məhz bu ünsürlər Ukraynaya atom bombasının atılmasını, yerlə-bir edilməsini bar-bar bağırırdılar. Ancaq indi bunu demirlər, çünki yaxşı bilirlər ki, uduzublar”.
Politoloq onu da qeyd etdi ki, artıq Rusiya Ukrayna müharibəsində uduzub və həmin gerçəklik özünü bütün istiqamətlərdə göstərməkdədir.
Vidadi ORDAHALLI
