İbrahim Rüstəmli: “Bu səfər ordumuzun həyatında yeni inkişaf mərhələsinin bir elementi kimi dəyərləndirilə bilər”
Müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyevin rəhbərlik etdiyi nümayəndə heyəti Amerika Birləşmiş Ştatlarında səfərdədir. Müdafiə Nazirliyinin mətbuat xidmətindən bildirilib ki, səfər zamanı nümayəndə heyətinin ABŞ-ın hərbi rəhbərliyi və “Ştatla Tərəfdaşlıq Proqramı” çərçivəsində Oklahoma ştatında görüşlərin keçirilməsi planlaşdırılır.
Qeyd edək ki, səfər çərçivəsində Azərbaycan Ordusu ilə Oklahoma Milli Qvardiyası arasında əməkdaşlığın 20 illiyi münasibətilə bir sıra tədbirlər təşkil olunacaq.
Bu təmasları ABŞ-Azərbaycan hərbi əməkdaşlığının yeni fazası kimi dəyərləndirmək olarmı?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, bu, Azərbaycan-ABŞ hərbi əlaqələrinin yeni mərhələsi deyil: “Əslində bu, Azərbaycanın 44 günlük Vətən savaşında qazandığı və çox ölkələri narahat etdiyi münasibətlərin yeni mərhələsidir. Cənubi Qafqaza munasibətin yeni mərhələsidir. Bu mərhələdə hər şey üzə çıxır. Yəni Rusiyanın siması bəllidir, həmişə bəlli olub. Dolayısı ilə, böyükdən kiçiyə hamı Rusiyanın Azərbaycana münasibəti haqqında obyektivliyə yaxın fikrə məxsusdur. İranın siması üzə çıxdı. İranın da münasibəti haqqında bilgili insanlar daha dolğun məlumatlı idilər. İndi 44 günlük savaşdan sonra İranın iç üzü olduğu kimi üzə çıxıb. Daha burda balanslaşdırılmış,qonşuluq münasibətləri və din görünmür. İran konkret şəkildə Ermənistana dəstək verir. Orada konsulluq açır. İran Azərbaycana qarşı təxribatlar törədir. Azərbaycan sərhədində təlimlər keçirir. Fransa açıq şəkildə hər dəqiqə türklərə qarşı müharibə elan edir. Təbii ki, bunlar bütün hallarda münasibətlərin balaslaşdırılmasını tələb edir.
Ən əsası, Azərbaycan indiki vaxtda - bu qədər böyük işlər gördüyü, bu qədər qələbələr qazandığı dönəmdə qətiyyən geri addım atmamalıdır. Əks təqdirdə bu, Azərbaycana çox baha başa gələ bilər. Əgər geriyə yarım addım belə atarsa, onun geriyə çəkilmə prosesinin qarşısını almaq mümkün olmayacaq. O ki qaldı Baş Qərargah rəisinin Amerikaya səfərinə, belə səfərlər daim olub. Bunu Azərbaycan-Amerika əməkdaşlığının yeni mərhələsi kimi qiymətləndirmək istəməzdim. Amerika ilə əməkdaşlığımız həmişə olub. Nazir səviyyəsində də ora səfərlər olub. Əgər Baş Qərargah rəisi Amerikaya səfər edirsə, bu, ordunun döyüş qabiliyyətinin artırılması istiqamətində atılmış bir addım kimi şərh olunmalıdır. Buna siyasi şərh vermək düzgün deyil. Bu əlaqələr, əlbəttə, Azərbaycan üçün çox vacibdir.
44 günlük Vətən müharibəsində son 30 ildə iştirak etdiyimiz sərgilər, təlimlər, bu sərgilərdə, təlimlərdə əldə etdiyimiz təcrübələr, ən yaxşı silahların Azərbaycana gətirilməsi və bu silahları idarə edəcək kadrların yetişdirilməsi bizim qələbə qazanmağımıza səbəb oldu. Bu gün artıq Baş Qərargah rəisi Amerikadadır. Söhbət Amerika ordusu ilə Azərbaycan ordusu arasında əlaqələrdən gedir. Bu əlaqələrin genişlənməsində Azərbaycan maraqlıdır. Azərbaycan ədalətə, inkişafa, dostluq münasibətlərinə və sülhə açıq ölkədir. Bu mənada da Baş Qərargah rəisinin Amerikaya səfərini Azərbaycan ordusu üçün inkişafı şərtləndirən əsas məsələlərdən biri kimi qəbul edir və təqdirəlayiq sayıram. Azərbaycan əlaqələri daim genişləndirilməlidir. Azərbaycan dünyanın inkişaf etmiş ölkələrilə münasibətdə qızıl ortanı həmişə qorumalıdır. Bu münasibətlər daim inkişaf edərsə, o zaman ordu da inkişaf edəcək. Sonda demək istəyirəm ki, bu səfər ordumuzun həyatında yeni inkişaf mərhələsinin bir elementi kimi dəyərləndirilə bilər”.
Məhəmmədəli QƏRİBLİ
