“Hətta onlara başqa ölkələr tərəfindən hərbi dəstək göstərilsəydi, - mən fiziki hərbi dəstəyi nəzərdə tuturam, - bu bizi dayandırmayacaqdı”. Bunu Prezident İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda deyib.
Dövlət başçısının fikrincə, 44 günlük Vətən müharibəsi çox şeyi dəyişdi: “Onun indi dedikləri (Paşinyanı nəzərdə tutur) o vaxt dediklərindən fərqlidir. Mən həmişə sual edirəm ki, kimin kim olduğunu başa düşmək üçün onlara həqiqətən də bu müharibə lazım idi? Mən çalışırdım başa salam, çalışırdım deyəm ki, biz heç vaxt bu vəziyyətlə barışmayacağıq, bizim səbrimiz tükənir, biz sizi məhv edəcəyik. Bu mənim sitatımdır: “Müharibə başlasa, biz sizi məhv edəcəyik”. Bu, cəsurluq və ya təbliğat əlaməti deyildi, bu reallıq idi. Biz nəyə qadir olduğumuzu bilirdik. Biz onların nəyə qadir olduğunu bilirdik. Hətta onlara başqa ölkələr tərəfindən hərbi dəstək göstərilsəydi, - mən fiziki hərbi dəstəyi nəzərdə tuturam, - bu bizi dayandırmayacaqdı. Bizim motivasiyamız var idi, biz belə davam etməkdənsə ölməyə hazır idik. İndi biz ritorika dəyişikliyini görürük”.
Görünən odur ki, o vaxt Ermənistana edilən istənilən yardım Azərbaycanın iradəsini qıra bilməzdi.
“Əgər Ermənistana silah yardımları olmasaydı, o zaman qarşı tərəf nəinki 44 gün, heç 20 gün də duruş gətirə bilməzdi”
Məsələyə münasibət bildirən hərbi ekspert Ramil Məmmədlinin fikrincə, Ali Baş Komandanın bununla bağlı səsləndirdiyi fikirlər reallığı əks etdirir: “Əvvəla, Ermənistan uzun illər idi işğal olunmuş torpaqlarımızda olduqca güclü müdafiə səddi yaratmışdı. Bütün əlverişli yüksəkliklər, strateji məntəqələr onların nəzarətində idi. Ön xəttə yaxın yerlərdə Rusiya istehsalı müasir hava hücumundan müdafiə sistemləri yerləşdirilmişdi. Həmçinin çoxsaylı ağır texnika, artilleriya qurğuları cəbhə xəttinə gətirildi. Zatən Tovuz döyüşlərindən sonra Ermənistan tərəfi müharibənin qaçılmaz olduğunun fərqində idi. Ona görə də bütün hərbi resurslarını Qarabağa yönəltmişdilər. Ancaq bunların heç biri müzəffər ordumuzun qarşısını ala bilmədi. Baxmayaraq ki, İran üzərindən hava və quru yolla Ermənistana silah daşınırdı. Əgər bu yardımlar olmasaydı, o zaman qarşı tərəf nəinki 44 gün, heç 20 gün də duruş gətirə bilməzdi. Ən azından ona görə ki, motivasiya Azərbaycan Ordusunun tərəfində idi. Ona görə də, hətta canlı qüvvə sarıdan da yardım olunsaydı belə, bu, nəyisə dəyişə bilməzdi. Çünki uzun illər idi ki, Prezident İlham Əliyevin rəhbərliyi ilə Azərbaycan ərazilərin azad olunmasına hərtərəfli hazırlaşırdı. Bu, təkcə hərbi baxımdan hazırlıq tədbirlərinin görülməsindən ibarət deyildi. Siyasi, iqtisadi, diplomatik və digər müstəvilərdə buna hazırlıq gedirdi. O səbəbdən, ordumuzun müharibədə qələbə qazanacağı qaçılmaz bir reallıq idi”.
Hərbi ekspert onu da əlavə etdi ki, Silahlı Qüvvələrimiz Vətən müharibəsində böyük döyüş təcrübəsi qazandılar.
Vidadi ORDAHALLI
