Erməni terror təşkilatlarından biri olan ASALA-nın dünyada törətdiyi tükürpədici cinayətlər saysız-hesabsızdır. Bəzi ölkələrin xüsusi xidmət orqanlarının da ASALA ilə əlaqəsinin olduğu barədə də ara-sıra məlumatlara rast gəlirik.
Ermənilərin ASALA terror təşkilatı ilə İranın xüsusi xidmət orqanları arasında əlaqələrə dair yeni faktlar üzə çıxıb.
“Report” “Caliber”ə istinadən xəbər verir ki, bu barədə qruplaşmanın keçmiş üzvü Martiros Jamkoçyan Ermənistanın “Hraparak” qəzetinə müsahibəsində danışıb.
O bildirib ki, ASALA-nın rəhbərlərindən biri olan beynəlxalq terrorçu Monte Melkonyan Azərbaycan torpaqlarının işğalı zaman İranın xüsusi xidmət orqanlarının əməkdaşları ilə görüşüb.
“Qubadlının azad edilməsindən (1993-cü il avqustun 31-də Qubadlının işğalını nəzərdə tutur - red.) əvvəl farslar Monteyə zəng etdilər. Onlar Monte ilə hesablaşırdı. İndi açıqlayacağım məlumat məxfidir. Ancaq bu gün sizə danışacam”, - M.Jamkoçyan söyləyib.
O qeyd edib ki, həmin vaxt İranın xüsusi xidmət orqanlarının nümayəndələri M.Melkonyanla görüşmək üçün Gorusa gəliblər. Keçmiş terrorçu deyib ki, farslar əməliyyatın hazılığından xəbərdar idilər: “Biz onda Laçında idik. Zəngilan, Qubadlı və Horadizə hücum etmək üçün tank diviziyamızın bir hissəsini Laçına aparmışdıq. Farslar bu əməliyyatdan xəbərdar idi, onu hazırlayanı da tanıyırdılar. Həmin vaxt İran tərəfinin marağı müharibənin, nəyin bahasına olursa olsun, Arazın o tayına keçməməsi idi. Ona görə də onlar bizimlə əməkdaşlıq etmək istədilər. Onlar təminat istəyirdilər və bizimlə razılaşmaq üçün gəldilər. Bu, 1993-cü il yazın əvvəlində olub. Odur ki, dostlarımız və düşmənlərimiz kiminlə iş gördüklərini bilirdilər. Ona görə də bizimlə hesablaşıb əməkdaşlıq edirdilər. Əlbəttə, biz əsgərlərimizin və geri çəkilən azərbaycanlıların İran istiqamətində atəş açmasına imkan verməyəcəyimiz haqda farslara təminat vermişdik. Və belə də oldu”.
Qeyd edək ki, bir neçə gün əvvəl yerli mediada İran İslam İnqilabının banisi kimi qələmə verilən Ruhulla Xomeyni ilə ASALA arasında ittifaqın, əlaqənin mövcud olduğu və Xomeyninin mühafizəsində, İrana qayıdışında, burada hakimiyyəti qəsb etməsində Fransa xüsusi xidmət orqanları ilə paralel olaraq ASALA-nın da xidmətləri olduğu yazılıb. Azərbaycan mediasında gedən məqalədə Xomeyni ilə ASALA arasındakı ittifaq barədə çox ilginc faktlar təqdim edilir. “Tehranın Azərbaycana düşmən münasibətinin səbəblərindən biri İranda molla rejimini quran Xomeyninin ASALA tərəfindən Fransada qorunması və onun Tehrana qayıdışından sonra - 1982-ci ilə qədər ASALA-nın himayəsi altında yaşaması olub.
"Ermənistanın Azadlığı uğrunda Gizli Erməni Ordusu" - ASALA 1975-ci ildə, Livanda vətəndaş müharibəsi getdiyi bir dövrdə Beyrut şəhərində yaradılıb. Təşkilatın ən böyük mərkəzi Parisdə yerləşir. Məhz burdakı ofis də Xomeyninin həm qorunmasını, həm də onun dünyaya tanıdılmasını öz üzərinə götürüb.
Xomeyni İranın xilaskarı kimi peyda olana qədər Parisdə yaşadığı dövrdə onu öz missiyaları üçün Fransa xüsusi xidmət orqanları hazırlamışdı. Xomeyni Fransaya uçub gedəndən sonra gözlənilmədən bütün dünyaya sözünü çatdırmaq imkanı qazandı. Amansız və kompromisə getməyən ayətullah beynəlxalq status əldə etdi. Və onu Şah tərəfdarlarından qorumaq üçün Parisdə xüsusi təlim görmüş bir dəstəyə ehtiyac var idi. Bu zaman Parisdə peyda olan ASALA qurucularından olan Akop Tarakçıyan Xomeyninin Fransada sürgündə yaşadığı Neauphle le Chateau kəndindəki evinin qonağı olur və aralarında möhkəm dostluq yaranır (Görünür, Xomeyninin türklərə (azərbaycanlılara) münasibəti ilə Tarakçıyanın münasibəti üst-üstə düşüb – red.). Akop onu qorumaq üçün 15 nəfərlik bir dəstəni Xomeyni yaşayan kəndə göndərir və beləliklə, İranın gələcək liderinin ermənilər qarşısında bir can borcu yaranır.
1979-cu ildə Ruhulla Xomeyni İraq və Fransada 14 illik sürgün həyatından sonra geri qayıdır. Xomeyninin Parisdən gətirən təyyarədəki silahlı dəstə Fransa kəşfiyyatı ilə birgə onu qorumağa məsul idi.
Bir müddət İranda sistem qurmaqla məşğul olan Xomeyni 1982-ci ildə ermənilərə olan borcunu ödəmək istiqamətində addımlar atır.
1982-ci ildə ASALA Livanı boşaltdıqdan sonra təşkilat üzvlərinin getdiyi ölkələrdən biri də təxminən 250 min erməni əhalisinin yaşadığı İran olub. İran 1983-cü ilin iyul-avqust aylarında ASALA-ya dəvət göndərir. ASALA-nın da ehtiyacı olduğu üçün bu təklifə cavab verir. ASALA rəhbərləri ilə İran rəsmiləri arasında keçirilən görüşdə təşkilata silah verilməsi üsulları və onların təlimi müzakirə olunur. ASALA da İranın istədiyi hərəkətləri həyata keçirəcəkdi. 1983-cü ilin avqustunda ASALA silahlıları kürdlərlə birlikdə İranın İraqa qarşı hücumunda iştirak edirlər.
1984-cü ilin mart və aprel aylarında türk diplomatlarına qarşı hücumlar ASALA-nın Tehranda çox rahat hərəkət etdiyini göstərir. İran bu hücumlara qarşı tədbir gördüyünü bildirsə də, təşkilatla əlaqəni kəsmir. Xüsusilə 1985-ci ildən sonra Suriya ilə münasibətləri korlanan ASALA Bekaa vadisindəki silahlılarını İrana köçürür.
ASALA İranla əlaqələrini daha da irəli apararaq Beyrutda Amerika və Fransa əsgərlərinə qarşı bombardmanlar həyata keçirən radikal şiə Xomeyni tərəfdarı tərəfindən qurulan "İslami Cihad" terror təşkilatını dəstəklədiyini də açıqlayır.
Bu gün İranda hakimiyyətdə olan rejim Xomeyninin vəsiyyətini icra edir. Buna görə də İranda rejim dəyişməyənə qədər ermənilərə dəstək və türk düşmənliyi davam edəcək...”. Bu barədə Azərbaycan mediası yazıb.
“Xomeyniyə dəstək verən erməni terrorçuları, xüsusən də ASALA terror təşkilatı...”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, ASALA ilə İranın xüsusi xidmət orqanları arasında əlaqənin, bağların olması barədə faktlar qətiyyən təəccüb doğurmur. Ekspert vurğuladı ki, hələ Xomeyninin dövründən bu istiqamətdə əlaqələr olub və bu gün də o əlaqələrin davam etməsi, Tehran rejiminin ASALA ilə bu formada əməkdaşlığının üzə çıxması faktı gözlənilən idi. “İran adlanan ölkənin xüsusi xidmət orqanları ilə ermənilərə aid olan terror təşkilatlarının sıx əlaqədə olması təəccüblü deyil. Yaxın tarixə baxdıqda görürük ki, elə Qacarlar dövlətinin çöküşü məhz erməni təşkilatları, xüsusilə ermənilərin terrorçu qruplaşmaları, qurumları ilə fars təşkilatlarının arasında mövcud olan sıx birlik nəticəsində baş verib. Qacarlar bir türk dövləti idi və onun devrilməsində də biz bu işbirliyini görürük. Yəni Daşnaksütyun, Hnçak kimi terror təşkilatları Qacarlar kimi bir türk dövlətinin devrilib onun yerinə Pəhləvilərin gətirilməsi üçün bir sıra hiylələrə, terrorlara əl atıb. Ümumiyyətlə, erməni terror təşkilatları ilə fars rejimləri arasında ciddi əlaqələr olub. farsların hakimiyyətə gəlməsində məhz farslar, İrançılar qədər “rol” oynayıb, burada xarici ölkələrdə yaşayan ermənilər də canfəşanlıq edib. Çünki onlar arasında bu işbirliyi vardı. O vaxtdan belə fikir formalaşmışdı ki, ermənilərlə farslar eyni irqə mənsubdur və bir-birinə hərtərəfli dəstək olmalıdırlar. Hətta bu dəstək terrorizmə, terror dəstəyinə qədər yüksəlib. Sonra Azərbaycanımızın güneyində Pəhləvilər rejimi tərəfindən soydaşlarımızın, xüsusən də milli ziyalılarımızın, görkəmli şəxslərimizin qətlə yetirilməsində erməni terror təşkilatlarının üzvləri də iştirak edib. 1978-1979-cu illərdə İslam İnqilabının türklərin xeyrinə olacağından qorxuya düşən ermənilər bizim əleyhimizə hərəkətə keçib. Bu prosesdə bizə qarşı ASALA da iştirak edib. Bu baxımdan, erməni terror təşkilatı ilə Xomeyni arasında əlaqənin olması barədə məlumatlar çoxdan mövcuddur. Bilirsiz ki, Məhəmməd Kazım Şəriətmədari o zaman ciddi nüfuza malik idi. Xomeyniyə qarşı rəqabət aparacaq yeganə lider Təbrizdən olan Azərbaycan türkü Ayatulla Şəraiətmədari idi. Onun kifayət qədər nüfuzu vardı. Onun hakimiyyət başına keçməsini əksəriyyət istəyirdi. Lakin Xomeyniyə dəstək verən erməni terrorçuları, xüsusən də ASALA terror təşkilatı 1979-cu ilin dekabr ayında Şəriətmədarinin rəhbərlik etdiyi Müsəlman Xalq Partiyasının başçılığı ilə gedən Təbriz üsyanının yatırılmasında iştirak etdi. Bunda yalnız Xomeyninin fransız dəstəkçiləri deyil, ermənilər də maraqlı idi. Biz bunu bilirik. Bilirik ki, hansı səbəbdən ermənilər niyə Aryançılara, İrançılara, fars şovinistlərinə dəstək verib. Çünki onlar həmişə ermənilərə şərait yaradıblar. Bu anlamda 1978-1979-cu illərdə də məhz burada yenidən bir türk dövlətinin qurulması “təhlükəsi”ni hiss edərək ermənilər, fransızlar, farslar və digərləri türklərə, güneyli soydaşlarımıza qarşı birləşdilər”.
F.Ələkbərli qeyd etdi ki, həmin dövrdə M.K.Şəriətmədarinin müəmmalı şəkildə öldürülməsi bu işbirliyinin nəticəsi ola bilər. O hesab edir ki, ona görə də, ASALA ilə fars şovinist rejiminin xüsusi xidmət orqanlarının işbirliyində olması qətiyyən gözlənilməz deyildi. “Bu rejimin xüsusi xidmət orqanları ilə ASALA bu gün də əməkdaşlıqlarını müxtəlif formalarda büruzə verirlər. Bu, zaman-zaman belə olub. Məsələni ümumilikdə belə dəyərləndirmək olar ki, ermənilər üçün heç bir şəkildə Tehranda yenidən türk hakimiyyətinin bərpa olunması qəbuledilən deyil. Onlar bunu özlərinin, Ermənistanın faciəsi sayırlar. Əgər Tehranda yenidən türk hakimiyyəti bərpa olunarsa, o zaman Ermənistanın məhv olması kimi bir təhlükə ilə üz-üzə qalacaqlarını iddia edirlər”-deyə bildirən F.Ələkbərli hesab edir ki, hazırda Ermənistanın varlığı bir növ də Tehran rejimi ilə bağlıdır, bu ölkəni təkcə Rusiya ilə bağlamaq düzgün olmazdı. “Tehran rejiminin xüsusi xidmət orqanlarının ASALA ilə birgə türklərə qarşı hərəkət etməsi yeni hal deyil, bu hər zaman olub. Bu işbirliyi indi də bu və digər şəkildə davam etməkdədir. Ancaq əlbəttə, artıq bir sıra məsələlər gün işığına çıxıb. Bu gün Azərbaycan və Türkiyənin gücü, soydaşlarımızın birliyi, əzəməti qarşısında, mübarizəsi yolunda Tehran rejimi və ASALA terror təşkilatı heç nə edə bilməz”-deyə F.Ələkbərli qeyd etdi. Alim hesab edir ki, bu işbirliyinin üzə çıxması onların ifşa edilməsindən başqa bir şey deyil.
Əli TURABOV
