05/02/2023 16:05
728 x 90

Prezident Əliyev Ermənistan rejimi ilə diasporun arasında bomba effektli faktlara toxundu...

Əli Orucov: “Bu məqsədlə toplanan vəsaitlərin böyük hissəsi Qarabağdakı separatçılar tərəfindən mənimsənildi”

img

“Ermənilərin hər il topladığı milyonlarla, milyardlarla dollar haradadır?”. Bunu Prezident İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda deyib.

Ölkə başçısının sözlərinə görə, işğal dövründə Şuşada bir tikili belə bərpa edilməyib, bir bina belə tikilməyib: “Laçın yolu üzərində - o yola baxan yerdə yerləşən yalnız iki villa var idi. De-fakto Qarabağ rəhbərlərinin iki villası idi. Bu villalarda hovuz, manqal var idi. Bu iki villanı ziyarət edən hər kəs dırnaqarası Qarabağ rəsmilərinin riyakarlıq və kleptokratiya səviyyəsini görür. Çünki söhbət təkcə Şuşadan getmir. Mən işğal zamanı ermənilərin qanunsuz olaraq məskunlaşdıqları kəndləri dəfələrlə ziyarət etmişəm və gördüklərimdən şok hissi keçirmişəm. Azərbaycanın heç bir yerində belə xarabalıq tapmazsınız. Mütləq yoxsulluq idi. Sanki ötən əsrin 60-cı və 70-ci illərinə geri qayıdırsan. Mənim sualım isə ondan ibarətdir ki, ermənilərin hər il topladığı milyonlarla, milyardlarla dollar haradadır? Hər il onlar Amerikadan, Fransadan və dünyanın digər ölkələrindən olan ermənilərdən vəsait toplamaq üçün telemarafonlar keçirirdilər. Hər marafonda onlar əlli və ya yüz milyon ABŞ dolları toplayırdılar. Bu pullar haradadır? Özlərini donor kimi qələmə verən dırnaqarası erməni xeyriyyəçilərinin pulları haradadır?”.

Bütün bunlar Ermənistanda nələrin baş verməsinin bariz göstəricisidir. Məlum olur ki, erməni lobbisinin Qarabağa yardımları hakimiyyətdə olan quldur rejim tərəfindən mənimsənilib.

  • “Bir neçə ildir erməni diasporu əvvəlki illərdəki kimi yardım etmir”

Məsələyə münasibət bildirən AMİP funksioneri Əli Orucov bildirdi ki, 1988-ci ildə Qarabağda erməni separatizmi başlayanda erməni lobbisi hər cür maliyyə yardımına başladı: “Dünyanın hər yerində yaşayan ermənilər bu məqsədlə vəsait toplamağa başladılar. Xüsusən də erməni lobbisinin oturuşmuş olduğu ölkələrdə bu özünü daha qabarıq göstərməyə başladı. Əsasən də ABŞ və Fransada bu məqsədlə böyük vəsaitlər toplandı. Hər il ABŞ-ın Kaliforniya ştatında bununla bağlı telemarafon keçirilirdi. Dünyanın müxtəlif ölkələrində yaşayan ermənilərdən ianələr toplayırdılar. Əlbəttə ki, həmin vəsaitlər təyinatı üzrə xərclənsəydi, o zaman Qarabağda yaşayan ermənilər səfil gündə olmazdılar. Ancaq bu məqsədlə toplanan vəsaitlərin böyük hissəsi Qarabağdakı separatçılar tərəfindən mənimsənildi. Daha sonra 1998-ci ildə “Qarabağ klanı” Ermənistanda hakimiyyəti ələ keçirdi. Bu isə talançılığın daha geniş miqyas almasına gətirib çıxatdı. Köçəryan-Sarkisyan cütlüyü timsakında klan 20 il hakimiyyətdə oldu. Düzdür, ondan əvvəl hakimiyyətdə Levon Ter-Petrosyan idi. Ancaq həmin dövrdə də analoji şəkildə diasporun yardımları mənimsənilirdi. 2018-ci ildə Nikol Paşinyan hakimiyyətə gələndən sonra da diasporun pulları oğurlandı. Sadəcə fərq ondadır ki, bir neçə ildir erməni diasporu əvvəlki illərdəki kimi yardım etmir. Çünki onlar da vəsaitlərin hakimiyyət və separatçılar tərəfindən mənimsənildiyini bilirlər”.

Bir sözlə, partiya funksioneri hesab edir ki, Ermənistanda hakimiyyətlər dəyişsə də, diaspor yardımlarının mənimsənilməsi dayanmayıb.

Vidadi ORDAHALLI

Peşə etikası

Son xəbərlər