Ermənistandan növbəti riyakarlıq, satqınlıq. Ermənistan parlamentinin deputatları ATƏT PA-nın sessiyasında Zelenskinin anti-Rusiya çıxışını ayağa qalxaraq alqışlayıblar. Bu barədə erməni mediası məlumat yayıb.
Məlumata görə, noyabrın 24-də Varşavada ATƏT Parlament Assambleyasının payız sessiyası öz işinə başlayıb və burada bir sıra diqqətçəkən məqamlar baş verib: “Xüsusən də birinci plenar iclasda Ukrayna Prezidenti Volodimir Zelenski Rusiya və şəxsən Rusiya Prezidenti Vladimir Putin haqqında kifayət qədər kobud ifadələr işlədib. Bundan sonra zalda olanlardan bəziləri ayağa qalxaraq Zelenskinin Rusiya əleyhinə çıxışını alqışlayıblar. Alqışlayanlar arasında Ermənistan nümayəndə heyətinin üzvləri, xüsusən də Paşinyanın “Vətəndaş müqaviləsi” partiyasının deputatları Eduard Ağacanyan, Mariya Karapetyan və Ripsime Qriqoryan da olub. Bu, hətta digər ölkələrin bəzi nümayəndələri arasında çaşqınlıq yaradıb. Çünki Paşinyan sessiya ərəfəsində şəxsən Vladimir Putinlə görüşüb, onunla eyni maşına minib, onu səmimiyyətlə qarşılayıb. Və cəmi bir gün sonra deputatları belə mövqe sərgiləyub”.
Rusiya ilə rəsmi müttəfiqlik hara, belə mövqe hara?
“Bu onu göstərir ki, mövcud Ermənistan hakimiyyəti Rusiya ilə müttəfiq münasibətlərində səmimi deyil”
Məsələyə münasibət bildirən AMİP sədri Arzuxan Əlizadənin fikrincə, bütün bunlar Paşinyan hakimiyyətinin nə qədər riyakar olmasının göstəricisidir: “Bu, erməni xislətindən irəli gələn bir şeydir. Ona görə də nə desən onlardan gözləmək olar. Ermənilər üçün müqəddəs bir məfhum yoxdur. Bu onu göstərir ki, mövcud Ermənistan hakimiyyəti Rusiya ilə müttəfiq münasibətlərində səmimi deyil. Məsələnin maraqlı tərəfi odur ki, Kreml bütün bunları bilə-bilə Ermənistanı himayə edir, silahlandırır, Qarabağdakı separatçıları qorumağa çalışır. Halbuki, müəyyən qədər bunun əksi olmalı idi. Qafqazda erməni bəlasını yaradan, tarixi Azərbaycan ərazilərində Ermənistan quran Rusiyadır. Ancaq bütün bunlara rəğmən ermənilər Rusiyaya xəyanət etsələr də, Kreml onları himayə edir. Son vaxtlar baş verən proseslər də təsadüfi deyil. Ermənilər yaxşı bilir ki, Rusiyanın Ukrayna bataqlığından salamat çıxması real deyil. O səbəbdən güclü olan Qərbin yanında yer alırlar. Belə olmasaydı, Vladimir Putin İrəvanda olarkən ona qarşı kütləvi aksiyalar təşkil olunmazdı. Paşinyan KTMT sammitində yekun sənədi imzalamaqdan imtina etməyə cəsarət etməzdi. Ona görə də bütün bu deyilənlər bir-biri ilə sıx bağlıdır”.
Vidadi ORDAHALLI
