Son günlər DTX-nin Naxçıvanda keçirdiyi əməliyyat, aparılan araşdırmalar zamanı külli miqdarda mənimsəmə, yeyinti faktlarının üstünün açılması, həmçinin buna paralel olaraq Muxtar Respublikada bir sıra qurumların ləğvi cəmiyyətdə geniş müzakirələrə səbəb olub.
Belə ki, son bir ayda Naxçıvanın həm Dövlət Təhlükəsizliyi Xidməti (DTX), həm də Dövlət Gömrük Komitəsi ləğv edilərək, müvafiq olaraq Dövlət Təhlükəsizliyi Xidmətinin Naxçıvan Baş İdarəsi və Naxçıvan Baş Gömrük İdarəsi yaradılıb.
Bu prosesin hələ son olmadığı, yaxın günlərdə Naxçıvan Daxili İşlər Nazirliyinin (DİN) də ləğv edilərək DİN Naxçıvan Baş İdarəsinin yaradılacağı ehtimal edilir. Hətta bəzi ekspertlər irəli gedərək Naxçıvan Muxtar Respublikasının statusunun da ləğv olunması məsələsinin gündəmə gətirilməsinin vacibliyini vurğulayır.
Naxçıvanda mərkəzi Azərbaycan hakimiyyətinin bərpasına doğru daha hansı islahatlar həyata keçirilməlidir?
Politoloq Qabil Hüseynli “Bakı-Xəbər”ə açıqlamasında bildirdi ki, Naxçıvanda aparılan struktur islahatları tam yerindədir: “Hətta mən deyərdim ki, bir qədər də gecikib. Uzun illərdi sadə naxçıvanlılar deyirdi ki, orada yaşamaq mümkün deyil. Görün, hansı həcmdə yeyintilər aşkarlanır? Camaatı oradan didərgin salan elə belə mənimsəmələrdi. Həmin pullar sadə naxçıvsnlılara xərclənsəydi görün nə olardı? Bir klanlaşma prosesi gedib və orada hər şeyi ələ keçiriblər. Naxçıvanın büdcəsinin böyük bir hissəsini mərkəzdən ayrılan dotasiyalar təşkil edirdi. Ayrılan həmin dotasiyanın böyük hissəsini oğurlayan həmin adamlar Gürcüstanda, Türkiyədə, İranda özlərinə böyük biznes imperiyaları yaradıblar. Naxçıvan zavallı bir vəziyyətdir. Ona qayğı göstərməyə ehtiyac var. Vəziyyət o həddə çatıb ki, naxçıvanlıların böyük əksəriyyəti Bakıya və ya Türkiyəyə köç edib. Artıq iki mühüm qurumda struktur islahatları aparılıb, onları birbaşa mərkəzə tabe etdiriblər. Bu yetərli deyil. Bütün qurumları mərkəzi hakimiyyətə tabe etdirib, Konstitusiyamızda olan unitarlıq prinsipini təmin etmək lazımdır. Naxçıvanda Əlahiddə Ordu yaradıblar. Buna nə ehtiyac var? Həmin Ordunun komandanı Kərəm Mustafayev ora gedən Müdafiə nazirinə deyil, onunla yanaşı dayanan Ali Məclisin sədrinə mərüzə edirdi. Belə şey olar? Müdafiə naziri Kərəm Mustafayevin bilavasitə rəisidirsə, niyə ona yox, mülki bir şəxsə mərüzə edilməlidir? Hesab edirəm ki, ilk növbədə Daxili İşlər Nazirliyi və ordu ilə bağlı bu islahat aparılmalıdır. Bir balaca yerdə bu qədər nazirliyə, komitəyə nə ehtiyac var? Onları saxlamaq üçün ayrılan vəsait kimlərinsə cibinə gedir. Belə idarəetmə olmaz. Hesab edirəm ki, bu islahatların davamı mütləq aparılmalıdır. Bunun həm büdcəyə, həm də orada yaşayan vətəndaşlarımıza xeyri olar”.
Məhəmmədəli QƏRİBLİ
