Güclü ordu, güclü müttəfiqlər - Azərbaycan Prezidentindən dövlətlərə yeni təhlükəsizlik formulu...
“Əgər gücünüz, güclü ordunuz varsa, yaxşı müttəfiqləriniz varsa, o zaman özünüzü təhlükəsizlikdə hiss edə bilərsiniz”. Bunu Prezident İlham Əliyev noyabrın 25-də “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda deyib.
Dövlət başçısının sözlərinə görə, indi təhlükəsizlik bəlkə də hər zaman olduğundan daha vacibdir: “Ənənəvi əlaqələri olan ölkələr bu məsələyə ikitərəfli və çoxtərəfli müstəvidə toxunmalı, bir-birimizi necə dəstəkləyə biləcəyimizə nəzər salmalıyıq. Çünki dünya dəyişib, beynəlxalq hüquq işləmir və ya selektiv qaydada işləyir. Ona görə də, əgər gücünüz, güclü ordunuz varsa, yaxşı müttəfiqləriniz varsa, o zaman özünüzü təhlükəsizlikdə hiss edə bilərsiniz. Bu səbəbdən, düşünürəm ki, bizim həyata keçirdiyimiz kommunikasiya layihələri regional təhlükəsizliyi və sabitliyi daha da gücləndirəcək və bunları həyata keçirmək üçün böyük imkan var”.
O da məlumdur ki, müasir dünyada geosiyasi proseslər sürətlə dəyişir. Belə vəziyyətlərdə yalnız güclü və müttəfiqi olan dövlətlər duruş gətirirlər.
- “Təkcə sözdə deyil, praktiki olaraq dəstək vermək imkanında olan müttəfiqləri var Azərbaycanın”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, hazırda beynəlxalq hüquq böhran keçirir: “Xüsusən də Rusiyanın Ukraynaya hücumu onu göstərir ki, beynəlxalq hüquq normaları faktiki olaraq işləmir. İstənilən dövlət faktiki olaraq nisbətən güclü olan dövlətin təzyiqinə, təcavüzünə məruz qala bilər. Ona görə də dövlət nə qədər güclü olursa, beynəlxalq aləmdə öz sözünü deyə bilirsə, o halda dövlətin təhlükəsizliyi daha etibarlı şəkildə təmin edilir. Reallıq odur ki, hazırda beynəlxalq təhlükəsizlik sistemi faktiki olaraq işləmir. Bunu biz 30 il ərzində öz üzərimizdə də gördük. Sadəcə, Azərbaycan güclənəndən sonra, müdafiə qabiliyyəti artandan sonra bizimlə az-çox hesablaşmaq istəyirlər. Ancaq buna baxmayaraq, yenə də Azərbaycana güc göstərmək istəyənlər var. Bu baxımdan müasir geosiyasi şəraitdə ən gözəl nümunə, Azərbaycan-Türkiyə müttəfiqlik nümunəsidir. Bu müttəfiqlik nümunəsi gələcəkdə daha da inkişaf edəcək. Bütün türk dövlətlərin birliyi səviyyəsində inkişaf edəcək. Bu gün Azərbaycanın Pakistan, İsrail kimi güclü müttəfiqləri var. Özü də Pakistan nüvə dövlətidir. Özü də, bu təkcə sözdə deyil, praktiki olaraq dəstək vermək imkanında olan müttəfiqləri var Azərbaycanın. Belə bir şəraitdə regional təhlükəsizlik baxımından Azərbaycanın daha çox perspektivləri var. Azərbaycan artıq öz müttəfiqlərinin təhlükəsizliyinə də töhfə verə bilir”.
Bu baxımdan partiya sədri hesab edir ki, Azərbaycan müttəfiqlər sarıdan yaxşı mövqedədir.
Vidadi ORDAHALLI
