Son günlər qanunsuz erməni silahlı dəstələri Azərbaycan Ordusuna qarşı təxribatlar törətməkdə davam edir. Rusiya sülhməramlı qüvvələri müvəqqəti məsuliyyət zonalarında cəmləşən separatçıların qarşısını almaq əvəzinə, atəşkəsin pozulmasına birbaşa zəmin yaradırlar.
Azərbaycanın rəsmi qurumları dəfələrlə Rusiya tərəfinə öz etirazını bildirsə də, sülhməramlı adı altında Qarabağa göndərilən rus hərbçilər ermənipərəst mövqedən əl çəkmək istəmirlər.
Ermənistanın öz daxilində olan ekspertlərin şərhlərindən də həmin ölkənin müharibəyə hazırlaşdığını görmək olar. Politoloq Ovanes Ovannisyan öz sosial şəbəkə hesabında bunları yazıb:
“Paşinyan tərəfindən yaradılmış antierməni ittifaqı artıq Ermənistan ərazisində növbəti qan tökülməsini planlaşdırır. Son üç aylıq ehtiyatda olan əsgərlərin toplanışı zamanı vətəndaşlardan yayınma halları sübut edir ki, bu dəfə Paşinyan əvvəlcədən planlaşdırılmış məğlubiyyətin “səbəblərini” yaratmaqda daha inamlı olacaq. Müharibəyə hazırlaşan Paşinyan eyni zamanda ordunu məğlubiyyətə hazırlayır, artıq planlaşdırılmış məğlubiyyət, güzəşt səbəbləri yaradır.
Yeri gəlmişkən qeyd edim ki, Hindistandan alınan silahlar təxminən üç ildən sonra çatdırılacaq. Deməli, bütün bu həyəcan sadəcə Paşinyanın təbliğatçılarının populizmidir. Hələ Ermənistan əhalisinə açıqlanmayıb ki, strateji müttəfiqlərdən hansı öz öhdəliklərini yerinə yetirmir və silah vermir. Paşinyanın işi çətindir. Təbii ki, ölkəyə bu qədər şər gətirmək və hər şeyi kresloda qalacaq şəkildə planlaşdırmaq asan deyil”.
Maraqlıdır, Ermənistan yeni müharibəni hansı cəbhədən açmağı planlayır?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, son 4 ayda Ermənistan və Azərbaycan arasında hərbi müstəvidə münasibətlər təkrarən gərginləşməyə başlayıb: “Bu, əsasən sentyabr ayının 12-si, 14-ü tarixlərində Göyçə, Dərələyəz, Kəlbəcər, yəni Ermənistan-Azərbaycan dövlət sərhədi bölgəsində baş verən proseslərdi. Bundan başqa, ötən 4 ay ərzində Qarabağda da atəşkəsin pozulması hallarına tez-tez təsadüf olunur. Məsələ burasındadır ki, əslində Ermənistan ordusunun birinci əlahiddə ordu birləşməsi hazırda Qarabağ ərazisində yerləşir. Üçtərəfli razılaşmanın şərtlərinə görə onlar ərazimizi tərk etməliydi. Hazırda həm onlar, həm də qanunsuz erməni silahlı dəstələri Azərbaycan ordusunun mövqelərini atəşə tuturdu. Region olaraq biz təhlil etdikdə görərik ki, Qarabağ və Ermənistan ərazisində əsas strateji əhəmiyyətli mövqelər Azərbaycan ordusunun nəzarətindədir. Amma buna baxmayaraq, Ermənistan hərbi birləşmələri də müxtəlif manevrlər etməklə daha taktiki və strateji məntəqələrə çıxış imkanı əldə etmək istəyirlər. Təbii ki, qarşıdurma olarsa, indiki vəziyyətdə biz hər iki istiqamətdə - həm Qarabağın daxilində, həm də Ermənistanla dövlət sərhədi istiqamətində hərbi əməliyyatların başlayacağı qənaətinə gələ bilərik. Mən birmənalı olaraq deyə bilmərəm hazırda hərbi əməliyyatlar ilkin olaraq Qarabağ ərazisində, yoxsa Ermənistan-Azərbaycan dövlət sərhədi istiqamətində başlayacaq. Amma ümumilikdə hər iki istiqamətdə qarşıdurmaların olacağı gözlənilir. Çünki vəziyyət 2020-ci ildə olduğu kimi deyil. Artıq hər iki istiqamətdə, xüsusilə də Ermənistanla sərhəd istiqamətində onların bütün hərbi infrastrukturu sıradan çıxıb. Azərbaycan ordusu Ermənistan istiqamətində müəyyən mövqelərə nəzarət edir. Ermənistan da həmin mövqeləri geri almaq, daha üstün mövqeyə çıxış əldə etmək niyyətində olacaq. Həmçinin də Qarabağ ərazisində ermənilərə vurulan son zərbə, Qırxqız və Sarıbaba istiqamətində əldə edilən uğurlar erməniləri daha da özlərindən çıxara bilər”.
Məhəmmədəli QƏRİBLİ
