Ermənistan rəhbərliyi sülh prosesindən yayınmaq üçün indi də Praqa görüşlərində əldə edilən nəticələrə sadiq qaldıqlarını bəyan edir. Ermənistanın xarici işlər naziri Ararat Mirzoyan deyib ki, beynəlxalq tərəfdaşların vasitəçilik səyləri də bu prosesdə mühüm rol oynaya bilər: "Ermənistan tərəfi Praqa razılaşmasına sadiqdir”.
Eyni zamanda o bildirib ki, İrəvan məqbul vaxt çərçivəsində iki ölkə liderlərinin görüşünü təşkil etməyə hazırdır.
Ermənistan tərəfi son addımları fonunda sülh müqaviləsi istiqamətində gedən proseslərə əngəl törətməyə çalışdığını ortaya qoyur. Müxtəlif bəhanələrlə bu sənədin məzmununu dəyişdirməyə çalışır. İrəvan, sülh müqaviləsi məsələsi müzakirə olunan kimi, hər zaman qeyri-ciddi, Azərbaycanın daxili işlərinə qarışmaq cəhdlərini özündə ehtiva edən təkliflərlə çıxış edir. İrəvan hər zaman belə məqamlarda müxtəlif bəhanələrlə bu kimi sənədlərin imzalanmasını pozmaqda maraqlı olub. Ermənistan Baş naziri Nikol Paşinyan Brüsseldə Azərbaycan Prezidenti İlham Əliyev və Aİ Şurasının rəhbəri Şarl Mişellə üçtərəfli görüşə gəlməkdən qorxduğunu rəsmən elan edib.
Bu barədə Prezident İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” adlı beynəlxalq konfransında çıxışı zamanı deyib.
Prezident qeyd edib ki, Şarl Mişelin ofisindən Prezidentin köməkçisi Hikmət Hacıyevə zəng edilib, bildirilib ki, Nikol Paşinyan görüşə yalnız Fransa prezidenti Makron iştirak edəcəyi təqdirdə razıdır.
Bu, Nikol Paşinyanın birbaşa görüşlərdə iştirak etməkdən qorxduğu, 10 noyabr 2020-ci il bəyanatının əsas şərtlərini – qanunsuz silahlı birləşmələrin çıxarılması və Zəngəzur dəhlizinin açılması tələbi yerinə yetirilmədiyi üçün təzyiqlərlə üzləşəcəyi, ona görə də Makronu “arxa kimi” gətirmək istəyinin nəticəsidir.
Ermənistan niyə digərlərinə deyil, məhz Praqada keçirilən görüşlərə sadiq olduğunu bəyan edir?
Xatırladaq ki, bir müddət öncə Prezident İlham Əliyev, regiona heç bir aidiyyəti olmamasına baxmayaraq, Fransa prezidentinin görüşdə iştirakına razılıq vermiş və Praqada dördlü görüş baş tutmuşdu. Lakin həm sözügedən görüşdə, həm də onun ardınca Emmanuel Makronun Azərbaycan əleyhinə tutduğu mövqe Makronun vasitəçi kimi yox, birbaşa Ermənistanın hamisi qismində çıxış etdiyinə şübhə yeri qoymur. Ermənistanın Praqa görüşünə və oradakı formata üstünlük verməsi yeni təxribat planının tərkib hissəsi ola bilərmi?
Demokratik Dəyişim Partiyasının rəhbəri Əli Mustafa “Bakı-Xəbər”ə açıqlamasında bildirdi ki, İrəvanın addımları onun səmimi olmadığını göstərir: “Bir tərəfdən güya sülh danışıqlarına sadiqliyini nümayiş etdirir, digər tərəfdən isə təxribatla məşğul olur. Ermənilər həmişəki kimi çoxbaşlı oynayır. Məqsəd sülh danışıqlarını yubadıb, Qarabağda yeni oyunlar qurmaqdır. Ermənistanın Praqa görüşlərinə sadiqlik ifadə etməsi olduqca qüsurlu yanaşmadır. Burada söhbət şəxslərdən deyil, Praqada razılaşdırılan prinsiplərdən getməlidir. Ermənistan isə orada Makronun iştirakı amilini qabardır. Açığı, həmin prosesdən sonra Makron və onun rəhbəri olduğu ölkə bizə qarşı tam fərqli mövqe tutdu. Həmin ölkənin Senatının bizə qarşı qəbul etdiyi qərarlar bu ölkənin bitərəfliyinə birdəfəlik son qoydu. Konkret tərəf saxlayan bir ölkənin vasitəçi kimi qəbul edilməsi yolverilməzdir. Ermənistanın fitnəkarlığı diplomatiyalarına da hopub. Həmin ölkə həqiqətən Avropa Birıiyinin vasitəçiliyinə razıdırsa və gizlində Rusiya ilə oynamırsa, onda Makronun iştirakında bu qədər israrlı olmamalıdır. Vasitəçi kimi Mişel varsa, bəs edir, Makrona nə ehtiyac var? Makron tələbinin gündəmə gəlməsi görüşü pozur. Hazırda vasitəçilik missiyası uğrunda Rusiya ilə, Avropa Birliyi arasında Cənubi Qafqazdakı vasitəçilik uğrunda gərgin mübarizə gedir. Azərbaycan və Ermənistan Avropanın moderatorluğuna etiraz etmir, ancaq Rusiya da ortadan çıxmaq istəmir. Ola bilər ki, görüşün pozulması üçün Rusiya ilə Ermənistan arasında gizli bir razılaşma var. Qarabağda Rusiyanın təxribatçı rolu da bunları deməyə əsas verir. Oradakı erməni silahlılarını çıxarmır, Rusiya adı ilə gündə bir mərkəz açırlar. Çox vacib detallardan biri də Laçın dəhlizidir. Həmin dəhlizi bağlamaq üçün əlimizdə kifayət qədər əsaslar var. Əvvəla, Ermənistan Zəngəzur dəhlizini açmır, digər tərəfdən isə Laçın dəhlizi vasitəsilə Qarabağa silah daşıyır. Buna görə də, Ermənistanın Praqa prosesini qabartması yalnız təxribatdır. Buna başqa ad vermək olmaz”.
Məhəmmədəli QƏRİBLİ
