Qasım Hacıyev: “Çox təəssüf ki, Rusiya Müdafiə Nazirliyi bilərəkdən rəsmi sənədlərdə adları saxtalaşdırılmış toponimlərdən istifadə edir”
Azərbaycan əraziləri Ermənistanın qəsbkar silahlı dəstələrinin işğalında olduğu dövrdə burada Azərbaycan toponimləri kütləvi şəkildə saxtalaşdırmaya məruz qalıb. Bu toponimlərin tarixi türk-Azərbaycan adları süni şəkildə erməniləşdirilib. Saxtalaşdırmaya baxmayaraq bu toponimlərin Azərbaycan-türk mənşəli olduğu faktdır.
Çox təəssüflər olsun ki, ermənilərin saxtalaşdırma hərəkəti dayanmayıb, indi də onların bu mənfur işinə Rusiya sülhməramlıları dəstək verir. Çox təəssüf ki, onlar reallığı inkar edib erməni yalanlarının ardınca gedirlər.
“Qarabağ iqtisadi rayonunun "Dağlıq-Qarabağ ərazisi" kimi qeyd edilməsi yolverilməzdir.
Bu barədə Müdafiə Nazirliyinin açıqlamasında deyilir.
"Azərbaycan Respublikası ərazisində müvəqqəti yerləşdirilmiş Rusiya sülhməramlı kontingentinin komandanlığının diqqətinə bir daha çatdırırıq ki, müvafiq məlumatlarında yaşayış məntəqələrimizin adlarının onlara göndərilən rəsmi sənədlərdə qeyd olunan düzgün toponimlərlə ifadə edilməsi zəruridir.
27.11.2022-ci il tarixində Rusiya Federasiyasının Müdafiə Nazirliyinin rəsmi internet səhifəsində dərc olunan Rusiya Federasiyasının sülhməramlı kontingentinin rəsmi məlumatında “Mardakert” və "Martuni" kimi adlandırılan Azərbaycan yaşayış məntəqələrinin rəsmi adları uyğun olaraq AĞDƏRƏ və XOCAVƏNDDİR", - deyə açıqlamada bildirilir.
Rusiya Federasiyasının Müdafiə Nazirliyinin rəsmi internet səhifəsində toponimlərimizin təhrif edilməsi Azərbaycanda dövlət qurumları səviyyəsində narazılıq doğurduğu kimi, ictimaiyyətdə də sərt qarşılanır.
- “Onlar birmənalı olaraq yeni reallıqla barışmalıdır və reallığı qəbul etməlidir”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, “Dağlıq Qarabağ” ifadəsi artıq tarixin gedər-gəlməz yerinə gömülüb və bu gün tamam başqa reallıqlar mövcuddur, Qarabağ iqtisadi rayonu var və onun başqa cür adlandırılması qəbuledilən deyil. Q.Hacıyevin sözlərinə görə, Qarabağ iqtisadi rayonuna aid olan bütün toponimlər Azərbaycan-türk mənşəlidir və onların hər birinin də tarixi adları mövcuddur, bu barədə nəşrlərdə, xəritələrdə, başqa vəsaitlərdə geniş məlumatlar var. “Rusiya Federasiyasının bu cür yanaşması neçə illərdir ki, davam edir. Nə qədər ki, Rusiya bu ərazilərə işğal gözü ilə baxacaq, bu cür təhriflərə də yol verəcək. Bilirsiz ki, o zaman da Rusiya imperiyası qurulanda qonşu dövlətlərin ərazilərinə göz dikiblər, nə qədər qanlar töküblər. Uzun bir dövrdür Rusiya özünü “xilaskar” kimi qələmə verib, bu ad altında həddən artıq çox işğalçılıq edib, qan töküb, xalqların azadlığını əlindən alıb. Amma indi nə XIX, nə də XX əsrdir, indi tamam başqa dövrdür, reallıqlar dəyişib, hadisələr başqa bir məcraya yönəlib. İmperiyaların çoxu dağıldığı kimi, Rusiya imperiyası da dağılma ərəfəsindədir. Ona görə də, daha əvvəlki hökmlərini göstərə bilmədiyi üçün indi də bu cür yanlışlıqlara, saymamazlığa, qıcıq doğuran hərəkətə əl atır. Başqa ölkələrin daxili işlərinə qarışmaq bu ölkənin xislətidir və bu hərəkətlərini hələ də davam etdirmək iddiasındadır. Öz işğalçılıq planlarını həyata keçirə bilmədiyi, istədiyi kimi hərəkət etmək imkanında olmadığı üçün artıq bu cür çirkin hərəkətlərə yol verirlər. Rusiya Müdafiə Nazirliyi çox gözəl bilir ki, “DQR” artıq yoxdur, Qarabağ İqtisadi rayonu yaradılıb, amma bunu qəbul etmək istəmirlər, yenə də köhnə bayatını çağırmaq istəyirlər. Təsəvvür edin ki, adlarını sülhməramlı qoyublar, amma sülhdən başqa çox şeyə xidmət edirlər. Onlar orada ermənilərə havadarlıq etmək üçün oturublar, əgər o kontingent orada oturmasaydı, ermənilərə dayaq durmasaydı orada yaşayan ermənilər çoxdan Azərbaycan hakimiyyətini qəbul edərdi və Qarabağın ermənilər yaşayan hissəsində bayrağımız dalğalanar, hakimiyyətimiz bərqərar olardı. Bu gün sülhməramlı adı ilə orada yerləşən kontingent bu kimi təxribatlarla sülh prosesinə mane olur. Amma hiss olunur ki, Azərbaycan heç də onların bu davranışı ilə barışmır, Ermənistandan fərqli olaraq Rusiyanın dediyi ilə oturub-durmur, müstəqil siyasət yürüdür. Müstəqil siyasət yürütdüyünü əməlləri, davranışları ilə bütün dünyaya göstərir. Bu siyasət də davam edir. Buna isə Rusiya impertiyasının tör-töküntüləri hələ də mane olmağa çalışır”.
Q.Hacıyev qeyd edir ki, Rusiya Müdafiə Nazirliyi öz bülletenlərində, yaydıqları digər məlumatlarda, eləcə də saytlarında Azərbaycan toponimlərini saxtalaşdırmaqla əslində öz ermənipərəst mövqeyini ortaya qoyur: “Çox təəssüf ki, Rusiya Müdafiə Nazirliyi bilərəkdən rəsmi sənədlərdə adları saxtalaşdırılmış toponimlərdən istifadə edir və bu hərəkəti dayandırmaq istəmir. Bizim toponimlərə qarşı onların göstərdiyi münasibəti ciddi tənqid edirik, qınayırıq. Onlar məqsədli şəkildə toponimlərimi belə eybəcər formada təqdim edirlər. Əlbəttə, bunun qarşısı alınmalıdır. Qarabağ iqtisadi rayonunda hər toponimin öz qədim adı var, o adlar isə Azərbaycan-türk dilindədir. Bu baxımdan, onlar birmənalı olaraq yeni reallıqla barışmalıdır və reallığı qəbul etməlidir”-deyə Q.Hacıyev qeyd etdi.
İradə SARIYEVA
