Molla rejiminin çöküşü Ali dini liderin ailəsinin içinə qədər yayıldı - İran diplomatlarını qovun...
Tehran rejimində zülm ərşə çıxıb və vəziyyət o qədər gərginləşib ki, etiraz edənlər sırasına İranın ali dini lideri Ayətullah Əli Xamneinin ailə üzvlərindən də qoşulanlar var. Bu ölkədə başlanan etiraz hərəkatı Xamenei ailəsini da parçalayıb desək, mübağiləyə yol vermiş olmarıq.
Mətbuatda Xamneinin bacısı qızı Fəridə Muradxaninin dünya liderlərinə video müraciəti yayılıb.
Mətbuatın yaydığı məlumata görə, hüquq müdafiəçisi kimi tanınan Fəridə Muradxani ölkəsində davam edən etirazlara polisin sərt müdaxiləsinə reaksiya verib.
Muradxani bütün ölkələrdən İranla əlaqələri kəsməyi və onu təcrid etməyi tələb edib: “Azad insanlar, hökumətlərinizə deyin ki, bu qatil və uşaq öldürən rejimə dəstəyi dayandırsınlar. Bu rejim əsaslandığı dini öhdəliklərin heç birini yerinə yetirmir. Hakimiyyəti əllərində saxlamaq uğruna heç bir qayda-qanuna məhəl qoymurlar. Bütün azad və demokratik ölkələrin simvolik olaraq öz diplomatlarını İrandan geri çəkməsinin və öz ölkələrindəki İran rejiminin diplomatlarını qovmasının vaxtı çatıb”.
Qeyd edək ki, Xamneinin bacısı qızı, hüquq müdafiəçisi Fəridə Muradxani çərşənbə günü, noyabrın 23-də həbs edilib.
“Report” “Azad İran”a istinadən xəbər verib ki, bu barədə siyasi fəalın qardaşı Mahmud Muradxani tvitterdə yazıb. O bildirib ki, bacısı noyabrın 23-də məhkəmə qərarını ona çatdırmaq üçün prokurorluğa gedərkən tutularaq həbsxanaya aparılıb.
Xatırladaq ki, vətəndaş cəmiyyəti fəalı olan xanım Muradxani bu il yanvarın 13-də Tehranda evinə qayıdarkən ETTELAAT tərəfindən həbs edilmişdi və may ayında 10 milyard tümən girov qarşılığında və istintaq müddəti başa çatanadək Tehran vilayətini tərk etmək məhdudiyyəti ilə müvəqqəti azadlığa buraxılmışdı.
Fəridə Muradxani həbsindən bir neçə ay əvvəl məhbuslara dəstək kampaniyasına start vermişdi. O, 2018-ci ilin iyununda Sənəndəc şəhərinə getdikdən və İslam Respublikasına qarşı fəaliyyətə görə edam edilən siyasi məhbus Ramin Hüseyn Pənahinin ailəsi ilə görüşdükdən sonra həbs edilmişdi.
- “...Dünya ölkələrinin başçıları səylər göstərməlidir”
F.Muradxaninin dünya liderlərinə video müraciətini şərh edən siyasi ekspert Rövşən Rəsulov “Bakı-Xəbər”ə bildirdi ki, əslində, belə bir halın baş verməsi İranda mühafizəkarların hakimiyyətinin kifayət qədər laxlamağa başladığını sübut edir: “Xalqın artan reaksiyası, qiyamlar, üsyanlar bundan sonra daha açıq müstəvidə cərəyan edəcək. Fəridə Muradxaninin Əli Xamneinin bacısı qızı olması yanaşı, həm də hüquq müdafiəçisi kimi etirazçıların yanında olması isə belə qənaətə gəlməyə zəmin yaradır ki, artıq mühafizəkarların da içində ciddi parçalanmalar yaranıb, bu parçalanmalar nəticə etibarı ilə xalqın tərəfinə keçməklə ifadə olunur. Əbəs deyil ki, SEPAH-ın, BƏCİS-in, eləcə də digər güc strukturunun nümayəndələrindən müəyyən qədər etirazçıların yanlarına keçmə faktları mövcuddur, bu barədə informasiyalar yayılmaqdadır. Digər tərəfdən, İrandakı bəzi anti-Azərbaycan xarakterli diplomatların, siyasət adamlarının bundan əvvəl Azərbaycan əleyhinə səsləndirdikləri təhdid xarakterli fikirləri də artıq azalmağa başlayıb. Bu isə o deməkdir ki, onların bu planları da realizə olunmamış qaldı. Yəni onların təhdidləri nə Azərbaycan dövlətinə, nə də Cənubi Azərbaycandakı etirazçılara heç bir təsir göstərə bilmədi. Yəni mollakratiya rejiminin bu təhdidləri əbəs yerədir”.
R.Rəsulovun sözlərinə görə, yalnız Muradxani deyil, rejimdə təmsil olunan digər bəzi hökumət adamlarının, siyasilərin yaxınları və övladları da artıq bu kimi məsələlərdə önə çıxır və xalqın yanında olduqlarını bəyan edirlər. “Düzdür, bunların əksəriyyəti xarici ölkələrdədirlər. Hətta onlar xarici ölkələrdə kifayət qədər açıq-saçıq həyat tərzi sürürlər, amma buna baxmayaraq rejimin buxovundan xalqın azad olunması üçün onlar da fəaliyyətə keçiblər”.
R.Rəsulov hesab edir ki, F.Muradxanin dünya liderlərinə müraciəsinə reaksiya verilməlidir. Siyasi ekspertin sözlərinə görə, Azərbaycan Prezidenti soydaşlarımızla bağlı rəsmi şəkildə öz mövqeyini bildirib. “Fikrimcə, Fəridə Muradxaninin dünya liderlərinə müraciətinə reaksiya verilməli və öz vətəndaşlarının qatilinə çevrilən rejimlə bağlı qərar verilməlidir. İran adlanan xalqlar həbsxanasında vəziyyət o qədər dəhşətlidir ki, xalqların, insanların azadlığı üçün dünya ölkələrinin başçıları səylər göstərməlidir. Muradxaninin çağırışı molla rejiminin zülmünə düçar olan milyonlarla insanın səsidir və dünya mütləq mənada onu eşitməlidir. İranla münasibətlərə yenidən baxılmalıdır, onunla siyasi və diplomatik əlaqələr nəzərdən keçirilməlidir”.
R.Rəsulov qeyd etdi ki, özünü çıxılmaz vəziyyətə salan bu rejimin sonu çatır və biz onun dağıldığını müşahidə edəcəyik. “Bu bir reallıqdır ki, artıq İran daxildən parçalanmağa başlayıb. Bu baxımdan artıq Cənubi Azərbaycan milli hökumətinin qurulması reallaşmağa doğrudur. Burada bizim üzərimizə böyük işlər düşür ki, bu məsələnin reallığa çevrilməsi üçün dəstəyimizi əsirgəməyək” - deyə R.Rəsulov qeyd etdi.
İradə SARIYEVA
