Məlum olduğu kimi, Qarabağın Rusiya sülhməramlılarının nəzarətində olan hissəsində son vaxtlar müəyyən proseslər gedir. Qarabağdakı erməni separatçı tör-töküntülərinin “başçısı” Araik Arutunyan bəzi “nazir"ləri vəzifədən azad edib. Ermənistanın keçmiş xarici işlər naziri Vardan Oskanyanın isə qondarma qurumun “xarici işlər naziri” təyin olunacağına dair iddialar ortaya atılıb.
Bütün bunlar qondarma qurumun növbəti məkrli oyunlarından biri kimi qiymətləndirilməlidir. Məsələ ondan ibarətdir ki, rusiyalı milyarder Ruben Vardanyanın Qarabağdakı separatçıların qanunsuz hökumətində baş nazir postuna uyğun olan “dövlət naziri” vəzifəsinə təyin edilməsi təsadüfi addım deyildi. O da “səlahiyyətlər”indən istifadə edərək yeni “kabinet” formalaşdırır. Necə deyərlər, “evcik-evcik” oyunu oynayır. R.Vardanyan noyabrın 23-də yaydığı açıqlamada deyib ki, onun səlahiyyətləri öz üzərinə götürməsində məqsədi guya Qarabağda nəyisə dəyişməkdir. Separatçılar bununla nəyəsə nail olacaqlarına ümid bəsləyirlər. Əslində bu kimi oyunlarla onlar heç nəyi dəyişə bilməyəcəklər. Çünki artıq bütün proseslər Azərbaycanın nəzarətindədir. Azərbaycan dövlətinin mövqeyi kifayət qədər konkretdir. R.Vardanyanın Moskvadan hansı tapşırıqla gəlməyindən, hansı “kadr islahatları” həyata keçirməyindən asılı olmayaraq, o heç vaxt Qarabağda vəziyyəti yenidən Ermənistanın xeyrinə dəyişə, İrəvanın nəzarətinə qaytara bilməz. Çünki beynəlxalq miqyasda Azərbaycanın Qarabağ üzərində suverenliyi təstiqlənibsə, ən sonda ölkəmizin orada istənilən əməliyyat keçirmək hüququ var. Əslində Vardanyanın bu “evcik-evcik oyunları” Azərbaycanın məhz Xankəndinin özündə güclü, yeni hərbi əməliyyatlar keçirməsini sadəcə olaraq yetişdirir.
“Rusiya heç vaxt sülhməramlı missiya ilə çıxış etməyib və harada olmasından asılı olmayaraq orada heç vaxt sülh olmayıb”
Məsələyə münasibət bildirən hərbi ekspert İbrahim Rüstəmli proseslərin sürətlə inkişaf etdiyi bir dövrdə Qarabağda növbəti antiterror əməliyyatlarının həyata keçirilməsini istisna etmədi: “Qarabağda baş verənlər təkcə Ermənistanın Azərbaycana yönəlik ərazi iddiası deyil. Bu həm də böyük dövlətlərin bundan vasitə kimi istifadə edib region uğrunda mübarizəsidir. Burada Qarabağ kartından istifadə edib bütün Cənubi Qafqazda nəzarəti ələ keçirmək istəyən qüvvələr var. Əlbəttə ki, Rusiya heç vaxt sülhməramlı missiya ilə çıxış etməyib. Rusiyanın harada olmasından asılı olmayaraq orada heç vaxt sülh olmayıb. Son zamanlar Qarabağda gedən proseslər Azərbaycanın milli maraqlarına toxunur. Bir tərəfdən Rusiyanın adamı R.Vardanyan Moskvadan aldığı tələmatlara uyğun yeni oyun oynayır, o biri tərəfdən sülhməramlıların gözü qarşısında Qarabağa silah, hərbi texnika daşınır. Ona görə də Prezident İlham Əliyev Avropa İttifaqı rəsmiləri ilə görüşündə dedi ki, Azərbaycan Qarabağda yaşayan ermənilərlə danışmağa hazırdır, amma Moskvanın göndərdiyi Ruben Vardanyan kimi insanlarla yox. Ölkə başçısı konkret şəkildə dedi ki, biz öz hədəflərimizdən geri çəkilməyəcəyik. Çünki Azərbaycan Qarabağ məsələsində prinsipiallığını itirərsə, geriyə addım atarsa, o zaman hər şeyini itirər. O üzdən, Azərbaycan beynəlxalq hüquq tərəfindən tanınan ərazi bütövlüyü çərçivəsində, yəni öz ərazisində istənilən vaxt antiterror əməliyyatları keçirə bilər. Hadisələrin gedişi Xankəndi istiqamətində əməliyyatların keçirilməsini qaçılmaz zərurətə çevirir. Heç kim bunu əngəlləyə bilməz. Sülhməramlıların orada olması bunu önləyə bilməz”.
Hərbi ekspert onu da qeyd etdi ki, artıq başqa seçim qalmayıb.
Vidadi ORDAHALLI
