Ermənistanın baş naziri Nikol Paşinyan Kollektiv Təhlükəsizlik Müqaviləsi Təşkilatının İrəvanda keçirilən Kollektiv Təhlükəsizlik Şurasının sessiyasında KTMT-ni 2020-ci ilin 44 günlük müharibəsində Ermənistana kömək göstərməkdən imtina etməsinə görə kəskin tənqid edib. Nikol xatırladıb ki, ölkəsi bu ilin yanvarında Qazaxıstan prezidenti Kasım-Jomart Tokayev antihökumət iğtişaşları zamanı KTMT qoşunlarını köməyə çağırarkən bu çağırışa dəstək verib.
Paşinyan yenə ənənəsinə sadiq qalaraq qurumdan gileylənib və qeyd edib ki, bayramlıq əhval-ruhiyyədə deyillər: “Bu dövr çox gərgin keçdi. Biz Kollektiv Təhlükəsizlik Müqaviləsinin imzalanmasının 30 illiyini və KTMT-nin 20 illiyini qeyd etdik. Yubileylərdən fərqli olaraq, bizim əhvalımız, təəssüf ki, heç bir halda yubileylik deyil. Son iki ildə KTMT-nin üzvü olan Ermənistan üç dəfə Azərbaycan tərəfindən təcavüzə məruz qalıb. Üzücüdür ki, Ermənistanın KTMT-yə üzv olması Azərbaycanı təcavüzkar hərəkətlərdən çəkindirmədi və daha çox o vaxtdan bəri faktiki olaraq bugünə qədər biz KTMT-nin Azərbaycanın Ermənistana qarşı təcavüzünə reaksiyası ilə bağlı qərara gələ bilməmişik. Azərbaycanın bugünədək KTMT-nin reaksiyasına dair heç bir qərara gələ bilmədiyimiz növbəti təcavüzü həm KTMT, həm də təşkilatın Ermənistan cəmiyyətində qavranması üçün son dərəcə əhəmiyyətli olan fundamental suallar doğurur”.
Görünən odur ki, Paşinyanın KTMT-dən Azərbaycana qarşı gözləntiləri bu dəfə də fiaskoya uğradı. Hərbi təşkilatı Azərbaycana qarşı qaldıra bilmədi.
“Dəfələrlə İrəvana bu barədə xatırlatma olub ki, bizi bu işə qatmayın”
Məsələyə münasibət bildirən poliitoloq Tofiq Abbasovun fikrincə, KTMT-nin Ermənistan-Azərbaycan qarşıdurması ilə bağlı münasibəti olduqca dəqiqdir:“İrəvandakı iclasda Putin də vurğuladı ki, bu məsələnin bizə dəxli yoxdur. Yəni KTMT-nin bu məsələyə qarışmaq səlahiyyəti yoxdur. İrəvan görüşünə qədər Rusiya Federasiya Şurasının sədr müavini Konstantin Kosaçov da bildirdi ki, Azərbaycanla Ermənistan arasında gərginliklə bağlı məsələ KTMT-nin səlahiyyət dairəsinə daxil deyil. Yəni dəfələrlə Ermənistana bu barədə xatırlatma olub ki, bizi bu işə qatmayın. Amma Ermənistan hakimiyyəti öz həyasızlığından əl çəkmir. Ermənistanın daxil olduğu təşkilatda hamı ondan üz döndərib Azərbaycanla dostluq edir. Deməli, Ermənistan özü günahkardır. Deyək ki, Azərbaycanla münasibətlər pisdir, bəs axı Ermənistanın KTMT üzvü olan bütün dövlətlərlə münasibətləri də hazırda pisdir? Həm Rusiya, həm Belarus, həm Tacikistan və KTMT-yə üzv olan digər dövlətlər görür ki, Ermənistan abırsızlıq nümayiş etdirir. Ermənistan isə deyir ki, "sizdən incimişik, bizim əvəzimizdən vuruşmadınız”. Bu nədən xəbər verir? Bu, Ermənistanın, onun liderinin, siyasi qüvvəllərinin abırsızlığından, riyakarlığından xəbər verir”.
Vidadi ORDAHALLI
