Fərhad Əhmədovun işinin arxasında şok təfərrüatların əlamətləri görünür

Ramil Məmmədli: “Bu səs yazısı yayılandan sonra orduda xidmət etmiş bir qrup keçmiş hərbçi sistemli şəkildə həmin mövzudan ordumuza qarşı istifadə etməyə başladı”

img

Vətən müharibəsindən sonra minaya düşərək şəhid olan polkovnik, korpus komandirinin müavini Babək Səmidlinin səs yazısı ilə bağlı araşdırma aparılır.

Dövlət Təhlükəsizliyi Xidmətində yayılması müxtəlif müzakirələrə və suallara yol açmış səs yazısı ilə bağlı araşdırmalara başlanılıb.

Artıq məsələ ilə bağlı DTX-nın istintaq orqanında bir sıra şəxslər dindirilir, prosessual hərəkətlər aparılır. Dindirilənlər arasında Azərbaycan əsilli rusiyalı milyarder Fərhad Əhmədov da var.

Artıq sosial şəbəkələrdə və mətbuatda Fərhad Əhmədovun yaxınları bu faktı təsdiqləyiblər. Bildirilir ki, Babək Səmidlinin yayılan səs yazısında suallarına cavab verilən şəxs Fərhad Əhmədovdur.

Fərhad Əhmədovun köməkçisi manset.az-a açıqlamasında Babək Səmidlinin səsinin Fərhad Əhmədov tərəfindən yazıldığını da təsdiq edib. Belə olan halda onun bunu hansı məqsədlə etdiyi məsələsi açıq qalır.

Qeyd edək ki, Babək Səmidlinin mübahisəli səs yazısının yayıldığı uzun müddət ərzində Fərhad Əhmədov səsin onun tərəfindən yazılması ilə bağlı açıqlama verməyib.

İndi bunun onun tərəfindən edildiyinin etiraf edildiyi bir vaxtda səbəbi və ondan asılı olaraq müxtəlif hərbi məsələlərlə bağlı Babək Səmidlinin səsini yazıb yaymağa görə hüquqi məsuliyyət məsələsi ortaya çıxır.

Hazırda DTX-nın İstintaq qurumunda araşdırmalar aparılır.

Xatırladaq ki, bir müddət əvvəl Dövlət Təhlükəsizliyi Xidməti tərəfindən milyarderin Göyçayda yerləşən villasında və ona məxsus obyektlərdə axtarışlar keçirilib.

Bir iş adamının belə addım atmasının arxasında hansı məqsədlər dura bilər?

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, şəhid olan polkovnik Babək Səmidlinin səs yazısı ilə bağlı mövqeyini əvvəl də bildirib: “Demişdim ki, bu cür hallar ordumuzun nüfuzuna pis təsir edir. Cəmiyyətdə orduya inamsızlıq yaradır. Çox təəssüf ki, zamanında bunu deyəndə tənqid və təhqir obyektinə çevrildik. Sonra məlum oldu ki, bu məsələdə maraqlı tərəflər vardı. Babək Səmidli əsl peşəkar zabitdir. Ancaq onun Rusiya vətəndaşı olan Fərhad Əhmədovla bu cür mövzuları müzakirə etməsini doğru saymıram. Onun danışdığı informasiyaların çoxu hərbi struktur daxili məxfi məlumatlarla bağlı olub. Yəqin ki, həmin səsdəki bəzi detalları bir çox ölkələrin xüsusi xidmət orqanları qeydə alıblar. Belə bir söhbətin Fərhad Əhmədov tərəfindən qeydə alınmasının özü doğru deyildi. Həmin səs yazısından hiss edilir ki, sualı verən tərəf sistemli suallar verir. Sanki müstəntiq kimi. Bu sualları verib, sonra onu səs yazısı kimi qeyd etməkdə hansı maraqlar ola bilər? Belə başa düşürəm ki, bu səs yazısı mediaya ötürülmədən əvvəl, Fərhad Əhmədov bunu vətəndaşı olduğu ölkənin lazımi qurumlarına da göndərib. Başqa nə məqsəd ola bilər? Məlumatın Qərbə bağlı olan media qurumu tərəfindən ictimailəşməsi də təsadüfi deyil. Deməli, iz yayındırmaq istəyiblər. Bu səs yazısı  yayılandan sonra orduda xidmət etmiş bir qrup keçmiş hərbçi sistemli şəkildə həmin mövzudan  ordumuza qarşı istifadə etməyə başladı. Gördük ki, onların hər biri sanki eyni tezisi paylaşırdı. Uzun illərdi Azərbaycan ordusu haqda hədyanlar yağdıran, bu qurumun rəhbər şəxslərini hədəfə alanlar da məhz bu materialı geniş şəkildə tirajlayanlar oldu. Hesab edirəm ki, aidiyyəti dövlət qurumları bu detalları mütləq mənada araşdırmalıdır. Fərhad Əhmədova bu istiqamətdə kimlər yardımçı olubsa, hamısı məsuliyyətə cəlb edilməlidir”.

Məhəmmədəli QƏRİBLİ

Peşə etikası

Son xəbərlər