Fransa prezidentliyinə namizəd, Paris bölgəsi İl-de-Fransın rəhbəri Valeri Pekress gizli şəkildə Qarabağa səfər edib. Bu barədə “France Televisions”un jurnalisti və siyasi şərhçisi Jülen Neni Tvitterdə məlumat verib:
“Valeri Pekress bu gün Qarabağa səfər edib. Orada yerli siyasətçilərlə tanış olub. Təhlükəsizliyə görə səfər Ermənistanda olan əksər fransız mediası, o cümlədən, "France" TV tərəfindən işıqlandırılmayıb”. Qeyd edək ki, Pekress Ermənistana səfər çərçivəsində Qarabağa gizli səfəri reallaşdırıb.
Fransada prezidentliyə namizəd olan şəxsin Qarabağa səfərinə həmin ərazilərə nəzarət funksiyasını həyata keçirən Rusiya sülhməramlıları niyə mane olmayıb?
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, Fransa ilə bağlı belə halların biz çox şahidi olmuşuq: “İşğal dönəmində Fransa parlamentarilərinin Azərbaycanın ərazisi sayılan Qarabağa qanunsuz səfərləri tez-tez reallaşırdı. Eyni zamanda, həmin vaxtlarda separatçıların tez-tez Fransaya səfərləri baş tuturdu. Həmin səfərlər zamanı separatçıların liderləri, hətta Fransanın rəsmi dairələri tərəfindən də qəbul edilirdi. Bəzi parlamentarilər seçkilərdə Fransa erməni lobbisinin maliyyə və siyasi dəstəyini qazanmaq naminə bu kimi təxribatçı və qərəzli addımlardan, o cümlədən Azərbaycanın işğal olunmuş ərazilərində hərbi təcavüz və qanlı etnik təmizləmənin nəticəsində yaradılmış qondarma kriminal rejimin təbliğindən belə çəkinmirlər. Erməni lobbisi də öz çirkin məqsədləri naminə şantaj və təzyiq vasitəsilə bu kimi şəxsləri öz siyasi alətinə çevirir. Fransa hökumətinin Qarabağ məsələsinin həlli ilə əlaqədar mövqeyi birmənalı və aydındır. ATƏT-in Minsk Qrupunun həmsədrlərindən biri kimi Fransa beynəlxalq səviyyədə tanınmış sərhədləri daxilində Azərbaycanın ərazi bütövlüyü və suverenliyini dəstəkləyir və münaqişənin danışıqlar yolu ilə həllinə çalışır. Təəssüf ki, Fransa siyasətçiləri tərəfindən daha bir təxribat addımının şahidi olduq. Valeri Pekresin qarşıdakı prezident seçkisi ərəfəsində Fransanın müxtəlif bölgələrini dolaşaraq təbliğatla məşğul olmaq əvəzinə, uzaq Ermənistana, daha sonra Xankəndiyə səfəri təəccüb doğurur. Mənə elə gəlir ki, seçki günü fransızlar ondan bunu soruşacaqlar. Əlbəttə, burada sülhməramlıların da xeyli məsuliyyət payı var. Rusiya sülhməramlıları bu cür səfərləri Azərbaycan hökuməti ilə razılaşdırmalıdır. Laçın dəhlizi həmin ərazilərə əcnəbilərin, həm də təxribatçıların gəlməsi üçün açılmayıb. Bu kimi səfərlər Azərbaycanla Ermənistan arasında danışıqlar prosesinə mənfi təsir göstərir və Azərbaycan, Ermənistan və Rusiya arasındakı üçtərəfli razılaşmanın şərtlərinə ziddir. Bu cür təxribatlara yol verənlər həm də yerli erməni əhalisinə böyük zərər verir ki, bu da dolayı yolla Ermənistan vətəndaşlarına təsirsiz ötüşməyəcək. İrəvan da başa düşməlidir ki, müəyyən qüvvələr onlardan öz məqsədləri üçün istifadə edir. Fransada prezidentliyə namizəd olan bu şəxsin Azərbaycan ərazilərinə qanunsuz səfəri bölgədə hazırda mövcud olan münaqişə sonrası sülh quruculuğu səylərinə xələl gətirir”.
Məhəmmədəli QƏRİBLİ
