Dekabrın 22-də Rusiya və Ermənistan xarici işlər nazirləri Sergey Lavrov və Ararat Mirzoyan arasında telefon söhbəti olub. Ermənistan XİN-in məlumatına görə, tərəflər noyabrın 26-da Soçidə əldə olunmuş razılaşmaların həyata keçirilməsi vəziyyətini müzakirə ediblər.
Məlumatda o da qeyd edilib ki, telefon danışığı zamanı delimitasiyası və demarkasiyası mexanizmlərinin yaradılması istiqamətində atılan addımların vacibliyi vurğulanıb: “Ermənistan-Azərbaycan sərhədində gərginliyin de-eskalasiyası, stabillik və təhlükəsizliyin artırılması istiqamətində addımların atılmasının, habelə sərhədin delimitasiya və demarkasiyası üçün mexanizmlərin yaradılmasının zəruriliyi vurğulanıb”.
Soçidə əldə olunan razılaşmaya görə, ilin sonuna qədər ikitərəfli komissiya yaradılmalıdır. Brüssüel görüşündə qəbul olunan sənədə əsasən isə hər iki tərəf işçi qrupun yaradılmasını razılaşdırıb. Belə olan halda maraqlıdır, Lavrovla Mirzoyan hansı delimitasiya mexanizmindən danışır?
“Nə Lavrov, nə də Mirzoyan bunun mütəxəssisidir...”
Məsələyə münasibət bildirən sabiq diplomat, politoloq Fikrət Sadıqovun fikrincə, çox vaxt Ermənistan tərəfi aparılan hansısa danışıqların məzmunu ilə bağlı təhrifedici məlumatlar yayır: “Bu baxımdan istisna deyil ki, delimitasiya mexanizmləri ilə bağlı deyilənlər də bu qəbildəndir. O baxımdan düşünmürəm ki, Lavrovla Mirzoyan arasında Soçi və Brüssel görüşlərindən kənar məsələ müzakirə olunsun. Çünki Ermənistan tərəfi çox şey deyə bilər, amma proses müvafiq razılaşmalara uyğun olaraq tənzimlənməlidir. Lavrovla Mirzoyan arasında bir sıra məsələlərlə bağlı müzakirələr ola bilər. Ancaq reallıq ondan ibarətdir ki, bunlar mazakirədən kənar nəsə edə bilməyəcəklər. Çünki prezident Vladimir Putinin və Avropa İttifaqı rəsmisi Şarl Mişelin təşəbbüsləri ilə iki tərəf arasında işçi qruplarının yaradılması razılaşdırılıb. O üzdən, delimitasiya və demarkasiya məsələsinə işçi qrupları, ekspertlər baxmalıdır, Lavrovla Mirzoyan yox. Hansısa mexanizm olacaqsa, bu ilk növbədə işçi qrupları tərəfindən razılaşdırılmalıdır. Çünki bütün bunlar sırf mütəxəssislərlə bağlı olan məsələdir. Nə Lavrov, nə də Mirzoyan bunun mütəxəssisidir. Ümumi xarakter daşıyan hansısa telefon danışıqları bu kimi məsələlərdə əsas götürülə bilməz. Belə telefon danışıqları hansısa fundamental məsələnin gündəmə gətirilməsində həlledici rol oynaya bilməz”.
Politoloq onu da qeyd etdi ki, Azərbaycanın mənafeyinə uyğun olmayan hansısa məsələ müzakirə predmeti ola bilməz.
Vidadi ORDAHALLI
