Dekabrın 21-də Ermənistan-İran parlamentlərarası dostluq qrupunun rəhbəri Gevork Papoyan, qrupun üzvləri Narek Babayan və Şirak Torosyanın müşayiəti ilə İran İslam Respublikası Məclisinin parlament dostluq qrupunun üzvləri İrəvanda "Tsitsernakaberd” memorial kompleksini ziyarət edib.
Nümayəndə heyətinin üzvləri Əbədi məşəl önünə gül dəstələri düzüb, erməni "soyqırımı qurbanları”nın xatirəsini sükutla yad ediblər. İİR Məclisinin Milli Təhlükəsizlik və Xarici Əlaqələr Komissiyasının üzvü Mahmud Əhmədi Biqaş qeyd edib ki, bu onun Ermənistana ilk səfəridir: "Əlbəttə, mən keçən əsrin soyqırımından xəbərdar idim, lakin bu səfərdə məlumatlarım daha da artdı. İnsanlığın nəinki özünü bu cür aparması, hətta daha da pisi, etdiklərini tanımaması, o qədər vəhşi ola bilməsi məni xüsusilə kədərləndirdi”.
İran nümayəndə heyətinin rəhbəri bildirib ki, Cənubi Qafqaz İran üçün böyük əhəmiyyətə malikdir: “Təhlükəsizlik və sülh məsələsi bizim üçün qırmızı xətt sayılır. Tehran regionda hər hansı bir ərazi dəyişikliyinə dözümlə yanaşa bilməz”.
Maraqlıdır, İran rəsmisi regionda ərazi dəyişikliyi deyəndə nəyi nəzərdə tutur?
Politoloq Rəşad Bayramov “Bakı-Xəbər”ə açıqlamasında bildirdi ki, bu məsələyə gərək bir prizmadan yanaşmayaq: “Bilirsiniz ki, müharibədən sonra İranla Azərbaycan arasında müəyyən narazılıqlar yarandı. Bunun da başlıca səbəbkarı məhz İran idi. Çünki bizimlə qonşu olan ölkə Azərbaycanın regionda yaratdığı reallıqları qəbul etmirdi. Məsələn, Zəngəzurda bizim ərazidən keçməklə, heç bir dövlət rüsumu ödəmədən Ermənistana yük daşıyırdı. Azərbaycan həmin əraziyə nəzarəti bərpa edəndən sonra İrandan bizə yönəlik hədələr səslənməyə başladı. İran İsrail amilini bəhanə edərək, Azərbaycana qarşı diplomatik müstəvidə hücuma keçdi. Lakin Azərbaycan özünün qururlu duruşu ilə İrana sübut etdi ki, bizimlə yalnız normal dildə və yaxın qonşu kimi rəftar etmək lazımdır, əks təqdirdə itirən də məhz İran olacaq. Bütün bunları görən İran konstruktiv mövqeyə keçdi. Bu yaxınlarda iki ölkə başçısının görüşü oldu. Hazırda İranın Ermənistandakı nümayəndə heyətindən çox mötəbər sayılan vəzifəli şəxslər Bakıdadır. Gəlin, onların nə danışdığına və hansı tezisləri səsləndirdiyinə diqqət edək. İranın xarici işlər naziri Hüseyn Əmir Abdullahian Bakıda keçirilən birgə mətbuat konfransında deyib ki, Azərbaycan öz ərazi bütövlüyünü təmin edib. Nazir bildirib ki, İran regionda əməkdaşlığa dair 3+3 platformasını dəstəkləyən ilk ölkələrdən olub. Doğrudan da İran Rusiya ilə bu təşəbbüsə dəstək verən ölkələrdən biridir. Zəngəzur dəhlizinin işə salınması Azərbaycan və Ermənistanla yanaşı, region ölkələri üçün də böyük imkanlar yaradır. İran da bu layihələrdən ciddi töhfələr alan ölkələrdən olacaq. Bu səbəbdən də narazılıq ifadə etmirlər. Regionda heç bir ərazi dəyişikliyi ola bilməz. Ola bilər ki, iranlı rəsminin həmin fikri bir qədər kontekstdən çıxarılıb. Erməni mediası bu üsulla iki ölkə arasındakı münasibəti yenidən qızışdırmaq istəyir. İstənilən halda, İranın rəsmi dairələri bu məsələyə aydınlıq gətirməlidir. Ermənistandan ya təkzib tələb edilməli, ya da özləri yeni açıqlama verməlidir. Regionda heç bir ərazi dəyişikliyi baş vermir. Yalnız Azərbaycan öz ərazi bütövlyunu bərpa edir. İranı bu narahat edirsə, əbəsdir. Çünki bunun adını ərazi dəyişikliyi qoymaq olmaz”.
Məhəmmədəli QƏRİBLİ
