Ermənistan hakimiyyətinin müxtəlif ölkələrdən gələn rəsmi və qeyri-rəsmi qonaqları, xüsusən də dövlət təmsilçilərini qondarma “Erməni Soyqırımı Memorial Kompleksi”ni “ziyarət”ə aparması artıq bir “ənənə”yə çevirilib. Doğrudur, indiyə qədər bu “abidə”ni ziyarət etməkdən imtina edənlər də olub. Amma erməni məkrinə uyub ora getməyə can atanlar da az olmayıb.
Təəssüf ki, İran parlamentinin təmsilçiləri də bu yanlış yolu tutanlar sırasındadır. Belə ki, dekabrın 21-də Ermənistan-İran parlament dostluq qrupunun rəhbəri Gevork Papoyan, qrupun üzvləri Narek Babayan və Şirak Torosyanın müşayiəti ilə İran İslam Respublikası Məclisinin İran-Ermənistan parlament dostluq qrupunun üzvləri “Tsitsernakaberd” (“Erməni Soyqırımı Memorial Kompleksi”) memorial kompleksini “ziyarət” ediblər. Diqqət çəkən məqamlardan biri odur ki, İİR Məclisinin Milli Təhlükəsizlik və Xarici Əlaqələr Komissiyasının üzvü Mahmud Əhmədi Biqaş səsləndirdiyi fikirlərlə erməni saxtakarlığına tam şərik olduğunu ifadə edib. Biqaş bununla aşkar şəkildə antitürk mövqeyini ortaya qoyub və tarixin ən böyük yalanına, saxtalarlığına inananlar sırasında yer alıb.
“Özünü “müsəlman” adlandıran İran rejiminin təmsilçiləri və bu cür yanlış mövqedən çıxış edən Biqaş kimiləri...”
İran-Ermənistan parlament qrupunun iranlı üzvləri saxta “genosid” abidəsinə niyə gediblər?
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının Türk Dünyası ilə əlaqələr üzrə müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, bütün bunlar İran adlanan ölkənin mahiyyətini, uydurma “erməni soyqırımı” məsələsinə münasibətini göstərir. F.Ələkbərlinin sözlərinə görə, Ermənistan-İran dostluq qrupunun iranlı üzvlərinin İrəvanda olarkən atdıqları bu addım qəbuledilməzdir: “Onlar qondarma “soyqırım abidəsi”ni “ziyarət” etməklə bütün hallarda İran rejiminin Ermənistana isti münasibətini və tarixin ən böyük saxtakartlığına dəstək olduqlarını göstərib. Xüsusən də, İran adlanan ölkənin Məclisinin Milli Təhlükəsizlik və Xarici Əlaqələr Komissiyasının üzvü Mahmud Əhmədi Biqaşın fikirləri tamamilə qəbuledilməzdir. Biqaşın qondarma “soyqırım abidəsi”ni “ziyarət” edərkən səsləndirdiyi fikirlər onu göstərir ki, İran təmsilçiləri rəsmən uydurma “soyqırım”ı təbliğ edirlər. Özünü müsəlman adlandıran İran rejiminin təmsilçiləri və bu cür yanlış mövqedən çıxış edən Biqaş kimiləri ən azından bilməlidir ki, 1915-ci ildə tarixdə ermənilərə qarşı heç bir soyqırım baş verməyib, əslində o dövrdə erməni terror təşkilatları tərəfindən türk-müsəlman əhali kütləvi soyqırıma məruz qalıb. Onlar bilsinlər ki, 1915-ci ildə Rusiyanın, Fransanın və başqa ölkələrin təhriki ilə ermənilər arxadan Osmanlıya zərbə vurdu. Yəni ölkə daxilində üsyan qaldırmaq istəyirdilər. Həmin dövrdə erməni əhalini bu məsələdən uzaqlaşdırmaq üçün onların bir qisimini Osmanlının bir yerindən digər yerlərinə köçürdülər. Əgər köç zamanı kim yolda ölübsə, beş-on nəfər həyatını itiribsə, bu təbii səbəblərdəndir, bunu “soyqırım” adlandırmaq axmaqlıq və cahillikdir. Aydın məsələdir ki, İran adlanan ölkənin mövqeyi qəbuledilməzdir. Ona görə də, əlbəttə, İran parlamentarilərinin atdığı bu addımlar nəinki Azərbaycan-İran, eləcə də Türkiyə-İran münasibətlərinə təsir göstərəcək. Bu bütün hallarda qəbuledilməzdir. Bu açıq-aşakar islam dininin mahiyyətinə də, insanlığa da, ədalətlilik məsələsinə də ziddir. Heç bir hüquqi əsas olmadan bunun “soyqırım” adlandırılması qətiyyən qəbuledilən deyil. Mənə elə gəlir, bu anlamda İran parlamentarilərinin qondarma “Erməni Soyqırımı Memorial Kompleksi”ni “ziyarət” etməsinin İranın özünə daha çox zərəri dəyəcək. Bununla İran adlı ölkə daha da təklənəcək, onsuz da tək qalıb. İranın qonşularına, xüsusən də Türkiyəyə qarşı bu cür addımlar atması, ikiüzlülük etməsi ancaq onun özünə ziyan vuracaq. Bu, İran Türkiyə münasibətlərinin daha da soyuqlaşmasına səbəb olacaq. Ona görə də, İran bu cür addımlara davam edəcəksə, onunla Ermənistandan və bu qəbildən olan bəzi ölkələrdən başqa heç bir dövlət onunla əlaqələrini davam etdirməyəcək”- deyə F.Ələkbərli qeyd etdi.
İradə SARIYEVA
