Fransa Qarabağ münaqişəsi zamanı ATƏT-in Minsk Qrupunun həmsədri kimi qərəzli, ikiüzlü siyasət yürütdüyünü postmünaqişə dövründə də aşkar şəkildə göstərir. Azərbaycan ötən il Ermənistan üzərində qələbə qazandıqdan sonra Paris özünün əsl sifətini aşkar şəkildə göstərməyə başlayan kampaniyaya start verib.
Məsələ ondadır ki, ötən il noyabrın 26-da Fransa Senatı məhv olmuş separatçı “Dağlıq Qarabağ Respublikasının” müstəqilliyini tanıyan qətnamə qəbul etməklə rəsmi Parisə də bu aktı dəstəkləməyə çağırış etdi. Qətnamədə Fransa hökumətinə çağırış edilir ki, separatçıların “müstəqilliyi” tanınsın. Əslində isə bu, Fransa hakimiyyətinin öz oyununun məhsulu idi. Həmin qətnamədən sonra Fransa hökuməti riyakarlığını təkzib edən “dəlillərlə” çıxış etməyə çalışsa da, az keçmədi ki, yenidən “status” məsələsini gündəmə gətirməyə cəhd etdi. Çünki Qarabağda müharibə bitdikdən sonra Türkiyənin regiondakı hərbi-siyasi iştirakı gücləndi. Paris isə bunu həzm edə bilmir. Reallıq ondan ibarətdir ki, Ermənistanın məğlubiyyətindən sonra Parisin Cənubi Qafqazdakı dayaqları da məğlub duruma düşüb. Fransa postmünaqişə periodunda Cənubi Qafqazda kənarda qalıb, sərgilədiyi əsassız və məntiqsiz mövqedən dolayı o regionda iştirakı üçün lazım olan zəmini hazırlaya bilmir.
Bu arada Fransa Senatından Azərbaycana yönəlik növbəti aqressiv çağırış səslənib. Separatçıların “tanınmasının” 1 illiyi ilə əlaqədar Senat özünün Twitter hesabında bəyan edib ki, Fransa ermənilərin qəlbində yaratdığı ümidlərə layiq olduğunu göstərməlidir: “Avropa və Fransa Azərbaycan-Türkiyə təcavüzü qarşısında erməni xalqına dəstək verməlidir”.
Belə görünür ki, Fransa ermənipərəst siyasətindən əl çəkmək niyyətində deyil. Bu cür çağırışlarla Senat erməni revanşizmini yenidən alovlandırmağa çalışır.
“Müharibədən sonra Rusiya-Türkiyə tandeminin güclənməsi rəsmi Parisi narahat edir”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Fransa Senatının məlum həyasız çağırışı ermənilərə qahmar çıxmaq siyasətinin davamıdır: “Ötən ilin noyabrında Fransa Senatı separatçıların “müstəqilliyini” tanımaqla bağlı qərar verdi. Düzdür, onların bu addımının hüquqi baxımdan əsası, təsir gücü yoxdur. Ancaq ermənilər bundan çox böyük məharətlə təbliğat vasitəsi kimi istifadə edir. Təsadüfi deyil ki, bu günlərdə Nikol Paşinyan bununla bağlı açıqlama verdi. Qeyd etdi ki, separatçıları tanıyan ölkə olacaqsa, bu, birinci Ermənistan olmamalıdır. Bu o deməkdir ki, məsələn, Fransa bu addımı birinci atmalıdır. Ona görə də biz bu kimi məsələlərə son dərəcə həssas yanaşmalıyıq. Senatın bu cür destruktiv siyasət yürütməsi Fransanın Cənubi Qafqazda azalan təsir imkanları ilə bağlıdır. Ötən il müharibədən sonra Rusiya-Türkiyə tandeminin güclənməsi rəsmi Parisi narahat edir. Məqsəd həm də ondan ibarətdir ki, Rusiyanın Ermənistanda təsir imkanlarını minimuma endirsinlər. Ona görə də Fransa parlamenti səviyyəsində Azərbaycan və Türkiyəyə yönəlik aqressiv fəaliyyət azalmır”.
Partiya sədri onu da əlavə etdi ki, Azərbaycan hər zaman belə təhdidlərə hazır olmalıdır.
Vidadi ORDAHALLI
