Erməni təxribatına cavab olaraq 16 noyabr döyüşlərində Ordumuz daha iki postu nəzarətə alaraq, düşməni qayıtmaq və ərazidəki istənilən prioritet əraziləri zəbt etmək imkanından məhrum etmişdi.
Xatırladqaq ki, Ordumuzun bu əməliyyatı ilə cənub-şərq istiqamətində Çilligöl, Ermənistanın Verişen kəndi və Gorus şəhəri istiqaməti, həmçinin qərb istiqamətində Şəki və Qızılcığa (İşxanasar) vizual müşahidə və birbaşa atəş təsiri sektorları genişlənmişdi.
Erməni mediası Qızılcıq kənd başçısı Marat Petrosyan adlı erməniyə istinadla Azərbaycan Ordusunun Qızılcıq istiqamətindəki mövqelərindən geri çəkildiyi haqda məlumat yayıb: “Azərbaycan ordusunun bölmələrinin nə qədər çəkildiyini deyə bilmərəm, ancaq Qızılcıq dağının bir hissəsindən geri çəkiliblər”.
Hərbi mənbələr isə erməni mediasının növbəti dəfə yalan məlumat yaydığını deyir.
Qeyd edək ki, Ermənistan rəsmiləri Azərbaycan Ordusunun 40-45 kv/km Ermənistan ərazisinə daxil olduğu haqda iddia qaldırmışdı və Rusiyadan yardım istəmişdi. Buna cavab olaraq isə Rusiya da rəsmi şəkildə elan etdi ki, sərhədlərin demarkasiya və delimitasiyası yoxdursa, o ərazilərin Ermənistana aid olduğunu iddia etmək doğru deyil. Belə olan təqdirdə ermənilərin növbəti dezinformasiyasının arxasında hansı maraqlar dura bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, son vaxtlar ermənilərin apardığı təbliğatda ziddiyyətli məqamlar ortaya çıxır. Hətta əksər hallarda onların özləri öz məlumatlarını təkzib edirlər. Sanki Ermənistan hərbi meydanda itirdiklərini informasiya müharibəsi ilə kompensasiya etməyə çalışır. Biz bunu 44 günlük Vətən müharibəsinin gedişi zamanı da gördük. Onlar mövqelərini itirdiklərini həm Ermənistan, həm də dünya KİV-ləri vasitəsilə təkzib edirdilər. Ancaq sonda həqiqət məlum olurdu. Çünki müasir dönəmdə saxta informasiya ilə manipulyasiya etmək asan məsələ deyil. Bir videomaterialla yalanı ifşa etmək olur. İndi yaydıqları informasiya da deyilən qəbildəndir. Azərbaycan Ordusu əlində olan mövqeyi heç vaxt Ermənistana güzəştə getməyib və getməz də. Belə bir faktın doğruluğunu sübut edən hər hansı məlumat yoxdur. Azərbaycan Silahlı Qüvvələrinin sərhəd boyinca möhkəmlənməsi Ermənistanı ciddi narahat edir. Bu da həmin ölkənin daxilinə sirayət edir. Buna görə də belə yalanla manipulyasiya edirlər. Həm də öz cəmiyyətlərini sakitləşdirirlər. Əgər bu həqiqət olsaydı, çoxdan həmin postların videosuni çəkib yayardılar. Bunu edə bilsələr, informasiyalarının doğruluğunu sübut edərlər. Etmirlərsə, deməli, ağ yalandır”.
Məhəmmədəli QƏRİBLİ
