Kiyevdə səfərdə olan Azərbaycan Respublikasının Baş prokuroru, I dərəcəli dövlət ədliyyə müşaviri Kamran Əliyev jurnalistlərə açıqlamasında helikopter qəzasından danışıb.
Onun sözlərinə görə, bu faktla bağlı artıq cinayət işi başlanıb: "Dövlət başçısı İlham Əliyevin tapşırığı əsasında cinayət işi tam və hərtərəfli araşdırılacaq, bu hadisənin bütün səbəb və şəraiti istintaq zamanı öyrəniləcək. İstintaqın gedişi barədə Azərbaycan ictimaiyyəti ətraflı və mütəmadi məlumatlandırılacaq". Baş prokuror təəssüf hissi ilə qeyd edib ki, bəzi şəxslər tərəfindən bu hadisədən siyasi məqsədlər üçün sui-istifadə hallarına cəhdlər göstərilir, heç bir fakta söykənməyən əsassız şayiələr yayılır: “Bununla bağlı bildirirəm ki, bu kimi şəxslər barədə Azərbaycan Respublikasının qanunlarında nəzərdə tutulan ən sərt tədbirlərin görülməsi təmin ediləcək. Bu faciədən siyasi məqsədlər üçün istifadə edilməsi yolverilməzdir”.
Doğrudan da, sosial şəbəkələrdə bu faciə ilə bağlı bir çox versiyalar irəli sürülür, hətta müqayisələr də aparılır. Belə paralellərdən biri də 1991-ci ildə Qarakənd üzərində vurulan helikopterlə bağlı aparılır. Məlumdur ki, həmin vaxt helikopteri ermənilər vurmuşdu. İndiki halda isə texniki səbəbdən qəza olub. Belədirsə, belə müqayisələrin aparılmasında hansı məqsədlər güdülə bilər?
Hərbi-siyasi ekspert Tərlan Eyvazov “Bakı-Xəbər”ə açıqlamasında bildirdi ki, bu, ötən il 44 günlük müharibədən sonra qazandığımız qələbə ilə bağlı ordunun gözdən salınması istiqamətində atılan ilk addım deyil: “Müəyyən dairələr bizim parlaq qələbəmizi heç cür həzm edə bilmirlər. Bəziləri bunu qəsdən edir ki, qalib ordunu, onun komandanlığını gözdən salsınlar. Bəziləri isə qəsdən bu təbliğatı aparanların təsiri altına düşür. Əsasən də bu xəbəri yayanlar mühacir adı ilə xaricdə oturanlardı. Onları araşdıranda görürsən ki, nə özləri, nə yaxınları burada hansısa əziyyətə qatlaşmayıb. Doğmaları və ya övladları heç bir müharibədə iştirak etməyib. Heç bir yaxınları nə şəhid olub, nə də yaralanıb. Xaricdə oturub, buradakı insanların fikirlərini qarışdırmaqla məşğuldurlar. Bu iki hadisəni heç cür uyğunlaşdırmaq olmaz. Hadisə qəzadır. Bunun səbəblərini komissiya araşdırıb ortaya çıxarmadan hansısa bir versiya səsləndirmək qətiyyən mümkün deyil. Sağ qalan iki zabitimizin verdiyi açıqlama ictimailəşdi. Oradan da görünür ki, qəza texniki səbəbdən baş verib. Küləyin və ya hansısa kənar təsirin bu məsələdə rolu olmayıb. Bu adamları başa salmaq olmur ki, helikopter kənardan vurulsaydı, oradan sağ adam çıxa bilməzdi. Qarakənddə raketlə vurmuşdular, bir nəfər də olsun sağ çıxmadı. Belə yanlış təbliğatın arxasınca getmək olmaz. Son vaxtlar belə qruplar çox fəallaşıblar. Ancaq mənfi bir fakt axtarırlar ki, silahlı qüvvələrimizi gözdən salsınlar. Biz buna qarşı əlimizdən gələn nə varsa edirik. Açığını deyim ki, gücümüz də yetmir. Buna bir əncam çəkməyin zamanıdır. Elə edilməlidir ki, hər kəs öz bildiyi işlə məşğul olsun”.
Məhəmmədəli QƏRİBLİ
