Azərbaycana quyu qazanların çoxu sonradan qazdıqları quyuya özləri düşür. Erməni “maşası” Polşa vətəndaşı, ixtisasca hüquqşunas, özünü daim "məşhur və müstəqil siyasətçi" kimi təqdim edən, Lyublin şəhərindəki Yaşıllar Partiysının sədri olan Tomaş Lex Buçek də qazdığı quyuya özü düşü.
Erməni lobbisinin pulu ilə gecə-gündüz Azərbaycan əleyhinə yazılar yazan, kitablar çap etdirən Buçekin başı dərdə girib. Səbəb də erməni məsələsidir. Xarici mətbuatın yazdığına görə, erməni lobbisinin pulu ilə “Arsax fondu” yaradan Buçek həmin “təşkilat”ı qurandan sonra əməlli-başlı varlanıb. Mətbuata görə, “tam təsadüf” nəticəsində Varşava, Poznan və Qdınya şəhərlərində 12 lüks mənzil, daha sonra 3 bahalı avtomobil və s. alıb. Varşavada oturub erməni lobbisinin pulu hesabına özünə cah-cəlal yaradan Buçek erməni ittihamı ilə qarşılaşıb. Belə ki, Buçeki Varşavada yaşayan bir erməni böhtanda suçlayaraq məhkəməyə verib. Mətbuata görə, məhkəməni qarşı tərəf qazanarsa Buçeki 1 il həbs və seçkilərdə iştiraka yasaq gözləyir.
Varşavada yaşayan erməni Buçeki məhkəməyə verib, Azərbaycana şər atanın özü indi erməni tələsinə düşüb və heç cür canını qurtara bilmir.
“Buçek və başqaları da bilməli idilər ki, erməni lobbisi onların üzərindən oyun qurur, “istifadə müddətləri” bitdiksən sonra isə ermənilərin əli ilə onlara tələ qurur, qurbana çevrilirlər”
AMEA-nın Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, BAO rəhbərinin türk dünyası üzrə müavini, siyasi şərhçi Faiq Ələkbərli “Bakı-Xəbər”ə bildirdi ki, erməniləri müdafiə edən şəxslərin çoxu sonradan onların öz tələsinə düşüb: “Bir çoxları erməniləri canfəşanlıqla müdafiə ediblər, amma sonra onların tələsinə düşüblər. Belə hallar çox olub. Polyak Buçek də onlardan biridir. O da hesab edirdi ki, məhz ermənilərin vasitəsilə daha yaxşı həyat yaşayacaq. Buçek yaşayışını daha yüksək səviyyədə qurmaq üçün üstəlik də utanmaz-utanmaz “Arsax fondu” yaradıb. Bunları o, ermənilərə canı yandığı üçün etməyib, pul qazanmaq üçün edib. Erməniləri müdafiə etdiyi üçün, təbii ki, maddi cəhətdən əldə etdikləri olub. Amma görsənən odur ki, Buçek erməni lobbisinin buyruqlarını yerinə yetirərkən qazandığı var-dövləti, pulu itirməli olacaq. Artıq Buçek və ermənilər arasında anlaşılmazlıqlar özünü göstərməyə başlayıb. Erməni tərəfindən Buçekin məhkəməyə verilməsi də bunun nümunələrindən biridir. Buçekin anti-Azərbaycan təbliğatı aparmasında, hətta “Arsax fondu” yaratmasında məqsədin nə olduğu gec-tez ortaya çıxdı. Buçek kimiləri gec-tez ifşa olunur”.
F.Ələkbərli vurğuladı ki, İkinci Qarabağ müharibəsində qazandığı zəfərə görə Azərbaycanı beynəlxalq məhkəməyə vermək iddiasına düşən Buçekin özünün indi məhkəmə qarşısına çıxarılması tarixi ədalətin bərpasıdır. O, həmçinin qeyd etdi ki, erməni tələsinə düşən Buçek kimiləri nə əvvəlinci, nə də axırıncıdır: “Buçek kimilərini beş-üç qəpiyə şirnikləndirməklə, ev-eşik, avtomobil verməklə ələ alırlar. Buçek və başqaları da bilməli idilər ki, erməni lobbisi onların üzərindən oyun qurur, “istifadə müddətləri” bitdiksən sonra isə ermənilərin əli ilə onlara tələ qurur, qurbana çevirilirlər. İndi məhkəmə qarşısına çıxar və erməniləri müdafiə etdiyinə peşman olduğunu deyər”.
İradə SARIYEVA
