Baş Prokurorluq helikopter qəzası ilə bağlı KİV və sosial şəbəkələrdə dəqiqləşdirilməmiş, ajiotaj yaradacaq məlumatlar yaymamağa çağırır. Bu barədə Baş Prokurorluğun mətbuat xidmətinin rəhbəri Günay Səlimzadə məlumat verib.
O, qəza ilə bağlı keçirilən brifinqdə bildirib ki, KİV və sosial şəbəkələrdə dəqiqləşdirilməmiş, rəsmi mənbələrə istinad olunmadan ajiotaj yaradacaq məlumatlar yayılmaması xahiş olunur: “Bu kimi hallar baş verdikdə qanunla nəzərdə tutulmuş tədbirlər tətbiq edilməklə məsuliyyətə cəlb edilmələri təmin ediləcək”.
Günay Səlimzadə, həmçinin, qəzada 14 nəfərin həlak olması faktı ilə bağlı Baş Prokurorluğun İstintaq İdarəsində Cinayət Məcəlləsinin müvafiq maddələri ilə cinayət işi başlandığnı da söyləyib. Onun sözlərinə görə, istintaqın hazırkı mərhələsində noyabrın 30-u saat 10 radələrində döyüş təlimlərinin keçirilməsi məqsədilə uçuş təlimini həyata keçirmək üçün havaya qalxmış DSX-ya məxsus Mi17 markalı helikopterin qəzaya uğraması faktında hər hansı kənar müdaxilə istisna olunur. Xatırladaq ki, noyabrın 30-u saat 10:40 radələrində Dövlət Sərhəd Xidmətinin hərbi helikopteri Xızı rayonu ərazisində yerləşən “Qaraheybət” aviasiya poliqonunda təlim uçuşları yerinə yetirərkən qəzaya uğrayıb. Qəza nəticəsində 14 nəfər həlak olub, 2 nəfər yaralanıb. Faktla bağlı Baş Prokurorluq, Hərbi Prokurorluq və DSX-nın peşəkar əməkdaşlarından ibarət istintaq qrupu yaradılıb.
Məlumdur ki, bu cür məlumatlarla bağlı əsası olmayan şayiələri daha çox KİV deyil, adi vətəndaşlar sosial şəbəkələr vasitəsilə yayır. Belə olan təqdirdə, bəs onların məsuliyyəti necə müəyyənləşəcək?
Media məsələləri üzrə ekspert Azər Həsrət “Bakı-Xəbər”ə açıqlamasında bildirdi ki, əslində, bu xəbərdarlığı etməzdən əvvəl həm Baş Prokurorluq, həm də Dövlət Sərhəd Xidməti cəmiyyətə onu maraqlandıran sualların cavabını verməliydi: “Bugünün özündə, nə DSX, nə də Baş Prokurorluğun rəsmi saytında həlak olanların və yaralıların siyahısı var. Hadisədən bir sutka keçsə də, hələ də həmin siyahı rəsmi sayta yerləşdirilməyib. Düzdür, DSX-ya istinadla bir siyahı yayımlanıb, amma niyə bu siyahı həmin qurumun saytında yoxdur? Xəbərdarlıq etməzdən əvvəl cəmiyyəti narahat edən məlumatları vermək lazımdır. Ortalığı boş buraxanda, şayiələr yayılır. Kimin ağlına nə məlumat gəldisə yazır. Belə olanda da rəsmi qurumlar xəbərdarlıqdan danışmağa başlayır. Niyə informasiya ilə işləməkdə rəsmi qurumlar lənglik edir və sonra da xəbərdarlığa zərurət görürlər? Çıxış yolu heç də xəbərdarlıqda deyil. Cəmiyyəti maraqlandıran informasiyanı vaxtında vermək lazımdır. Bəli, bununla bağlı məsuliyyət nəzərdə tutulur. Yalan informasiya ilə cəmiyyəti çaşdıranlarla bağlı çağırıb rəsmi xəbərdarlıq edə bilərlər və ya inzibati qaydad kimisə cərimələyə bilərlər. Bir faktı da nəzərə almalıyıq ki, xüsusən də şayiə yayanlar Azərbaycandan kənarda oturanlardı. Bu şayiələrin körükləndirilməsini birbaşa Ermənistan xüsusi xidmət orqanları həyata keçirir. Bizim rəsmi qurumlar onlara qarşı heç bir hüquqi addımı ata bilməz. Həmin kateqoriya adamlara xəbərdalığın necə icra ediləcəyilə bağlı da məlumat versələr çox məmnun olardıq. Bir daha deyirəm, informasiya ilə operativ işləməyi bacarsaq, heç xəbərdarlığa ehtiyac duyulmaz”.
Məhəmmədəli QƏRİBLİ
