Rusiyanın Ukrayna sərhədləri boyu qoşun cəmləşdirməsi Qərbdə getdikcə daha böyük narahatlığa yol açmaqdadır. İndi həm Ukraynada, həm də Qərbdə Kremlin irimiqyaslı hücum əməliyyatlarına hazırlaşdığı barədə qənaət də get-gedə artır.
ABŞ-ın Dövlət katibi Entoni Blinken bu fonda Moskvaya xəbərdarlıq edib ki, Ukraynaya hər hansı yeni aqressiya ciddi nəticələrə səbəb olar. Blinken Rusiyanın sərhədə qoşun yığmasını qeyri-adi hal adlandıraraq deyib ki, Rusiya tərəfdən hər hansı qızışdırıcı hərəkət Birləşmiş Ştatları ciddi narahat edəcək. Bu vəziyyətdə ABŞ NATO-nun şərq sərhədi boyunca qüvvələrini möhkəmləndirməsi, Ukrayna ordusuna əlavə dəstək istiqamətində də müvafiq addımlar atılacağını bildirib. Bunlara cavab olaraq Rusiya prezidenti Vladimir Putin NATO və ABŞ-ın xəbərdarlığına xəbərdarlıq olaraq bildirib ki, ABŞ-ın başçılıq etdiyi NATO qüvvələri Ukraynada Moskvanı bir neçə dəqiqə ərzində vura biləcək raketlər yerləşdirsə, Rusiya hərəkətə keçməyə məcbur olacaq. Putin Ukrayna barəsində “qırmızı xətlər” qoymaqdan bir az da irəli gedərək bildirib ki, Rusiya NATO-nun Ukrayna torpağında təkmil raket sistemləri yerləşdirməsinə cavab verəcək: "Ukrayna ərazisində Moskvaya uçuş müddəti 7-10 dəqiqə, hipersonik silahlar yerləşdirildiyi təqdirdə 5 dəqiqə olan raketlər peyda olsa, bəs biz neyləyək? Biz də onda gərək bizi hədələyənlərə qarşı buna bənzər nəsə yaradaq”. Putin bu yaxınlarda Rusiyada keçirilmiş hipersonik silah sınağına istinad edərək, hazırda Moskvanın belə imkanlarının olduğunu deyib. Moskva hipersonik raketlərinin səsdən 9 dəfə iti uçduğunu iddia edir. Amma Britaniyanın xarici işlər naziri Liz Truss qeyd edib ki, NATO-nun Rusiyanı təhrik etməsi fikri aşkar yalandır: “Tərəfdaşlarımızın azadlıq və demokratiyasına zərbə vuracaq hər hansı addım strateji səhv olar”.
Ukrayna xarici işlər naziri Dmitro Kuleba isə bildirir ki, Rusiya onun ölkəsilə sərhədə, işğal etdiyi Krıma, eləcə də Rusiyapərəst separatçıların idarə etdiyi Luqansk və Donetsk regionlarına 115 min əsgər və ağır texnika yığıb: “Rusiyanın qarşısını almaq üçün indi hərəkətə keçmək lazımdır, sonra deyil. Gördüyümüz çox ciddi məsələdir. Ən pis ssenari Rusiyanın 2008-ci ildə Gürcüstana və 2014-cü ildə Ukraynaya hücumu kimi Avropanın bütün təhlükəsizlik arxitekturasını pozmağa və sərhədləri güc yolu ilə yenidən cızmağa cəhd etməsi ola bilər”. XİN rəhbəri Rusiyanın niyə məhz indi belə bir ssenariyə əl atma ehtimalının olduğu ilə bağlı fikirlərini bildirib: "Sadəcə ona görə ki, Rusiya belə bir planı həyata keçirmək üçün fürsət görür. Bizim əsas avropalı müttəfiqlərimiz - Almaniya və Fransa öz daxili problemlərinə diqqət yetirirlər. Almaniyada bu yaxınlarda Bundestaq seçkiləri keçirildi. Fransa isə tezliklə seçki keçirməyə hazırlaşır. Rusiyanın geosiyasi qaz kəməri layihəsi olan “Şimal axını-2” sertifikatlaşdırma mərhələsindədir. Vladimir Putin hesab edir ki, Qərb, xüsusilə indi zəif və qətiyyətsizdir. O əmin ola bilər ki, balansı dəyişmək üçün doğru andır. İnanıram ki, biz onun səhv olduğunu sübut etməliyik. Biz bunu edə bilərik. İndi əsas məqsəd Rusiyanı cilovlamaq və onu növbəti aqressiv hərəkətlərdən yayındırmaqdır". Belə bir vaxtda yayılan məlumatlara əsasən, Voronejdən Ukrayna istiqamətində 203 millimetrlik 2S7 "Pion” özüyeriyən artilleriya sistemləri yüklənmiş dəmir yol eşelonunun hərəkəti qeydə alınıb. Bundan əvvəl “Pion” özüyeriyən artilleriya sistemlərinin heç vaxt Ukrayna sərhədləri yaxınlığında yerləşdirilmədiyi qeyd olunur, 47.5 kilometr maksimal atəş məsafəsinə malik olan bu qurğular həm də nüvə başlıqlı mərmilər ata bilir. Digər məlumata görə, Rusiya Ukrayna sərhədləri yaxınlığında xüsusi rejim tətbiq edib və sərhədin 30 kilometrliyində, Boquçar və Kantemirovsk yaşayış məntəqələri arasında nəzarət-buraxılış məntəqəsi yerləşdirib. Sərhəd zonasına ancaq xüsusi icazə ilə daxil olmaq mümkündür. Rusiya dövlət televiziyasının bu barədə Voronejdən hazırladığı süjetdə Ukrayna istiqamətində BMP və BTR-lərdən ibarət hərbi texnika kolonlarının da getdiyi görünüb. Bu durumda ABŞ və NATO rəhbərliyi əvvəlki kimi Rusiyanın şaxtalar düşəndən sonra Ukrayna üzərinə hücuma keçə biləcəyi barədə bir-birinin ardınca xəbərdarlıqlar edir, o cümlədən ABŞ və Avropa ölkələrinin mümkün Rusiya hücumuna qarşı birgə cavab tədbirləri barədə danışıqlar aparılır. Ukrayna Silahlı Qüvvələrinin Donbasdakı qüvvələrinin komandanı, general Sergey Nayev isə yaranmış vəziyyətdə ABŞ-dan hərbi dəstək istəyib. General ABŞ-ın Kiyevdəki hərbi attaşesi Brittni Stüartla görüşündə xahiş edib ki, Ukrayna qüvvələrinə konsultativ-ekspert dəstəyi və əhəmiyyətli ölçülərdə praktiki dəstək göstərilsin. Amma ABŞ-ın Avropadakı qoşunlarının keçmiş komandanı, general Ben Hoces hesab edir ki, Rusiya ilə müharibə Ukraynanın məğlub olması ilə nəticələnəcək. Onun sözlərinə görə, Ukrayna irimiqyaslı hərbi münaqişəyə hazır deyil: “Ukraynaya Moskva ilə döyüş əməliyyatları aparmaq üçün güclü artilleriya, müxtəlif istiqamətlərdə Rusiyanın zərbələrinə çevik reaksiya verə bilən yüksək mobilli mexanikləşdirilmiş qüvvələr lazımdır. Ukrayna ordusu üçün Rusiyanı ciddi itkilərə məruz qoymaq uğur hesab edilə bilərdi, amma hazırda Kiyev Rusiya ordusunu geri çəkilməyə məcbur edəcək gücə malik deyil”.
Tahir TAĞIYEV
