Cəmiyyət və dövlət. Bu iki məfhumu birləşdirən qırılmaz bağlar mövcuddur. Cəmiyyət ayrı-ayrı fərdləri özündə birləşdirərək, sonunda böyük bir toplum, maraqlar məkanı kimi çıxış edir. Dövlət isə bu “ordu”nu bir araya gətirməklə, yerbəyer etməklə bir növ, himayəçilik missiyasını öz üzərinə götürür.
Ona görə də, cəmiyyət və dövlətin bir-birindən ayrı, təcrid olunmuş şəkildə var olması qeyri-mümkündür. Məhz bununla - cəmiyyət və dövlətin birliyindən, vəhdətindən ayrılmaz bir sistem yaranır. Bu sistemin olmadığı şəraitdə isə hərtərəfli, xoş gələcəkdən, ümumiyyətlə, mütərəqqi inkişafdan söhbət açmaq mümkün deyil. Bu ümdə məqsədə də cəmiyyətlə, ümumilikdə ictimai maraqla dövlətin maraqlarının üst-üstə düşməsi nəticəsində nail olmaq mümkündür.
Bu baxımdan Azərbaycan dövləti və ona rəhbərlik edən Prezident ictimai və dövlət maraqlarının müdafiəsi ilə bağlı çox ciddi addımlar atır. Elə son Soçi və Aşğabad görüşlərində əldə olun diplomatik qələbələri də bu qəbildən saymaq olar.
Soçi, ardınca Aşğabad uğuru…
Məlum olduğu kimi, 44 günlük Vətən müharibəsindən sonra Azərbaycan Prezidenti İlham Əliyev Zəngəzur dəhlizinin açılacağını bildirmişdi. Bəzi dövlətlər, eləcə də Ermənistan bunu sadəcə dildə deyilən söz kimi qəbul etsə də, artıq reallıq Zəngəzur dəhlizinin yaxın vaxtlarda açılacağını göstərir.
Soçi görüşü zamanı Ermənistanın diplomatik cəhətdən də məğlub olması göz önündə idi. Hətta Rusiya mətbuatında, eləcə də xarici mətbuatda gedən yazılarda da Azərbaycan prezidenti İlham Əliyevin Soçi görüşü zamanı əldə etdiyi növbəti uğuru, Ermənistanın isə xülyalarının yenidən iflasa uğraması açıq-aydın müşahidə edilir.
Prezident İlham Əliyev Soçi görüşünün ardınca Türkmənistanın paytaxtı Aşqabadda İqtisadi Əməkdaşlıq Təşkilatının (İƏT) növbəti, 15-ci sammitində iştirak etdi.
Diplomatik uğurları davam etdirən ölkə başçısı burada da Ermənistana növbəti siyasi zərbə vurdu. Belə ki, Aşqabad Bəyannaməsində bir sıra önəmli məsələlər yer aldı. Bəyannamədə "Azərbaycanın işğal altında olan ərazilərinin azad edilməsinin Qafqaz regionunda davamlı sülhə və iqtisadi tərəqqiyə yol açacağına inanırıq”, ifadələrinin yer alması, İƏT-ə üzv dövlətlər tərəfindən Azərbaycan hökuməti və xalqına işğal olunmuş ərazilərin azad edilməsi, ölkənin ərazi bütövlüyünün bərpası münasibətilə təbriklərin ünvanlanması Azərbaycanın uğurlu diplomatiyası nəticəsində Ermənistana növbəti zərbədir.
Bütün bunlar Ermənistan və KTMT-nin üzv digər dövlətləri arasındakı münasibətlərinə mənfi təsir göstərdi.
Türkiyə prezidenti Rəcəb Tayyib Ərdoğan çıxışında Azərbaycanın Vətən müharibəsindəki qələbəsinin əhəmiyyətindən danışmasını isə bölgənin bundan sonrakı vəziyyəti haqqında müsbət qənaətə gəlinməsi kimi qiymətləndirilir: "Qardaşımız Azərbaycanın işğal altındakı torpaqlarını azad etməsi bölgədə davamlı sülhün və sabitliyin təmin olunmasının da qapılarını açıb. Azərbaycanın bölgədə rifahın artması üçün ardıcıl həyata keçirdiyi layihələr təqdirəlayiqdir. Bu addımlar bölgədə normallaşdırma cəhdlərini dəstəkləyəcəkdir".
Azərbaycanla əlaqələrin möhkəmləndirilməsi məsələsini hər bir ölkə diqqətdə saxlayır
Artıq Azərbaycanın Qafqazda ən yüksək nüfuza sahib olmasını Qafqaz dövlətləri, islam dövlətləri, eləcə də Ermənistan qəbul edir. Azərbaycanın bölgədə inkişaf etmiş bir dövlət olması region ölkələrinə də müsbət təsir edir. Bu səbəbdən Azərbaycanla əlaqələrin möhkəmləndirilməsi məsələsini hər bir ölkə diqqətdə saxlayır. Bütün bu proseslər Azərbaycan rəhbərliyinin, ölkə başçısı İlham Əliyevin uğurlu diplomatik siyasəti, bu siyasətdə əldə etdiyi uğurların nəticəsidir ki, bu gün ölkəmiz beynəlxalq səviyyəli görüşlərdə bütün diqqətləri öz üzərinə çəkir.
Demək, Azərbaycanın açar ölkə statusu, siyasi və logistik mərkəz qismində rolu daha da möhkəmlənmiş olacaq ki, bu da post-müharibə dönəmində beynəlxalq arenada milli maraqlarımızın daha effektli müdafiəsi üçün əlavə zəmin yaradacaq, Qarabağda böyük quruculuq prosesinə yeni təkan, stimul verəcək. Soçi görüşünün ardınca İlham Əliyevin İƏT tribunasından da Zəngəzur dəhlizinin artıq reallığa çevrildiyini bəyan etməsi, bu yeni nəqliyyat infrastrukturunun Şərq-Qərb və Şimal-Cənub dəhlizlərinin önəmli hissəsinə çevriləcəyi, İƏT-ə üzv ölkələrin də bu dəhlizdən böyük fayda götürəcəyini söyləməsi qənaətimizi bir daha təsdiqləyir.
Artıq qeyd olunduğu kimi, son illər Azərbaycan faktiki surətdə Avrasiyanın əsas və etibarlı nəqliyyat və logistika mərkəzlərindən birinə çevrilib. Zəngəzur dəhlizinin reallaşması ilə bölgənin nəqliyyat sektorunda sözsüz ki, yeni imkanlar açılacaq və bundan təkcə İƏT, Türk Dövlətləri Təşkilatı yox, 120-dən çox ölkəni birləşdirən Qoşulmama Hərəkatının bir çox başqa üzvləri də faydalana biləcək. İqtisadi bağların qarşılıqlı şəkildə artması isə ölkələrimiz arasında siyasi bağları da artıracaq ki, bu da öz növbəsində üzv ölkələrin milli və energetik təhlükəsizliyini möhkəmlədəcək. Təbiidir ki, bütün bu diplomatik uğurlar ölkə rəhbərliyinin Azərbaycanın ictimai və dövlət maraqlarının mühafizəsiçisi olduğunu bir daha sübut edir.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
