Fransanın “Le Figaro” jurnalının direktor müavini, jurnalist Jan-Kristof Buisson özünün “Twitter” hesabında Türkiyə prezidenti Rəcəb Tayyib Ərdoğanın Türkmənistanın paytaxtı Aşqabadda baş tutan sammit çərçivəsində verdiyi açıqlamalara toxunub.
O, Ərdoğanın tədbirdə Zəngəzur dəhlizi ilə bağlı səsləndirdiyi fikirlərdən narahat olub: “Ərdoğanın Aşqabadda yeni həyəcanverici imperialist çıxışı. O, türkdilli ölkələri Zəngəzur dəhlizi ilə bağlı tələblərində Azərbaycanı tam dəstəkləməyə çağırıb”.
Fransalı jurnalist bunu elə təqdim etməyə çalışıb ki, sanki dəhlizin keçəcəyi ərazi Ermənistandan zorla qoparılır. Görünən odur ki, İƏT-in Aşqabad toplantısında Zəngəzur dəhlizinin əsas müzakirə məsələlərindən biri olması, dəhliz məsələsində üzv dövlətlərin yekdil mövqedən çıxış etməsi nəinki Ermənistanın, o cümlədən erməniləri himayə edənlərin də narahatlığına səbəb olub. Türkiyənin bu məsələdə ciddi dəstək verməsi Fransanı narahat edir. O üzdən, Ərdoğanın məlum fikirlərinə belə aqressiv mövqedən yanaşırlar.
“Qardaş ölkənin bu dövlətlər arasında arbitr rolunda çıxış etməsi dünyada yeni güc mərkəzinin yaranması deməkdir”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, Fransa mediasının Ərdoğanın Aşqabaddakı çıxışına bu cür aqressiv yanaşması təsadüfü deyil: “Əvvəla, Fransa Türkiyənin əzəli rəqibidir. Türkiyənin Balkan ölkələrində, Yaxın Şərqdə, xüsusən də Liviyada artan rolu daha çox Fransanı narahat edir. Türkiyənin Aralıq dənizində neft-qaz hasilatı ilə bağlı apardığı tədqiqatlar Fransanı narahat edir. Məsələ ondadır ki, Fransa Türkiyənin regionda və dünyada artan rolundan narahatdır. Onlar yaxşı bilirlər ki, türkdilli dövlətlərin zəngin təbii və digər resursları var. Türkiyənin bu dövlətlər arasında arbitr rolunda çıxış etməsi dünyada yeni güc mərkəzinin yaranması deməkdir. İqtisadi və nəqliyyat əlaqələrinin qurulması üçün ən qısa yol Zəngəzurdan keçir. O zaman Türk dünyası arasında əlaqəni kəsməkdən ötrü şüurlu şəkildə Zəngəzuru Azərbaycandan qoparıb Ermənistana verdilər. İndi yeni reallıqlar bu maneələri aradan qaldırır. Ən azından dünya qloballaşır. Ərdoğanın Zəngəzurla bağlı fikirlərində qəbahətli nə var ki, fransızlar belə narahatdır? Türkiyə bütün kommunikasiya xətlərinin açılmasında maraqlıdır. Hansı ki, bu, nəticə etibari ilə Ermənistanın da xeyrinə olacaq. Çökmüş ölkə iqtisadiyyatı dirçələcək, miqrasiya azalacaq. Məgər Fransa Ermənistanın dirçəlməsini istəmir? Ona görə də özlərini Avropa dəyərlərinin yaradıcısı hesab edənlər bu cür cılız yanaşmalardan əl çəkməlidilər. Proseslərə daha geniş müstəvidən yanaşsalar yaxşı olar”.
Partiya funksioneri hesab edir ki, Fransa gedən prosesləri önləyə bilməyəcək.
Vidadi ORDAHALLI
