Beynəlxalq birliyin Qarabağdakı həqiqətləri bilməsi indi niyə həmişəkindən vacibdir?

Məhərrəm Zülfüqarlı: “Böyük ərazilər azad edilsə də, yaşayış məntəqələrinin əksəriyyəti məhv edilib”

img

“Biz heç vaxt olmadığı kimi, indi beynəlxalq birliyin həqiqəti bilməsini istəyirik”. Bunu Prezident İlham Əliyev Nizami Gəncəvi Beynəlxalq Mərkəzinin həmsədri İsmail Serageldini videoformatda qəbul edərkən deyib.

Ölkə başçısı bununla bağlı bir sıra vacib məqamlara toxunub: “Çünki indi xarici diplomatlar, beynəlxalq medianın nümayəndələri işğaldan azad olunmuş əraziləri ziyarət edəndə hesab edirəm ki, onlar işğal nəticəsində bizim tarixi abidələrimizin, mədəni abidələrimizin nə vəziyyətə salındığını həqiqətən görürlər. Bizim əraziləri işğal edənlər hər şeyi məhv ediblər. Ümid edirəm ki, pandemiyadan sonra Mərkəzin növbəti tədbirində, həmçinin, Mərkəzin üzvlərinin də işğaldan azad edilmiş bir sıra əraziləri ziyarət etmək və ola bilsin, orada müəyyən tədbiri təşkil etmək fürsəti olacaq. Lakin bu, əlbəttə, bizim gələcək əməkdaşlığımızın və müzakirələrimizin bir hissəsidir. Müharibə zamanı və müharibədən sonra göstərdiyiniz dəstəyə görə bir daha sizə minnətdarlığımı bildirmək istəyirəm”.

Bütün bu deyilənlərlə yanaşı, beynəlxalq birliyin Qarabağdakı həqiqətləri bilməsi indi niyə həmişəkindən daha vacibdir?

  • “Bu cür barbarlıq tarixdə olmadığı üçün, bütün bunlara beynəlxalq birlik qiymət verməlidir”

Sözügedən məsələyə aydınlıq gətirən AVCİYA-nın vitse-prezidenti, professor Məhərrəm Zülfüqarlı hesab edir ki, bir sıra məsələlərə görə beynəlxalq burliyin Qarabağ həqiqətlərini bilməsi çox vacibdir: “Məsələ ondadır ki, Azərbaycan müstəqilliyini əldə edəndən sonra Qərb demokratiyasına, onun haqq-ədalət mövqeyi tutacağına çox inanırdı. Ancaq zaman-zaman biz yanıldıq. Biz gördük ki, hər bir dövlətin öz maraqları var. Dövlətlər yalnız öz maraqlarından çıxış edirlər. Belə olan halda, biz özümüz öz problemimizi həll etməliyik. Biz gördük ki, kiməsə ümid etmək vaxt uzatmaqdan başqa bir şey deyil. Ona görə də haqlı olaraq Prezident dedi ki, beynəlxalq birliyin həqiqəti bilməsini istəyirik. Çünki böyük ərazilər azad edilsə də, yaşayış məntəqələrinin əksəriyyəti məhv edilib. Azərbaycanın məscidləri, abidələri dağıdıldığı halda, beynəlxalq birlik xristian abidələrinin qorunmasından danışır. Sanki vandalizm aktları törədən ermənilər yox, bizik. Onlar anlamaq istəmirlər ki, xristian abidələri də bizim abidələrdir. Bu baxımdan beynəlxalq birlik ermənilərin törətdikləri misilsiz vandalizm aktlarına qiymət verməlidir. Çünki dünya praktikasında belə hal olmayıb ki, işğal edilmiş ərazilərdə bir dənə sağlam bina qalmasın. Bu cür barbarlıq tarixdə olmadığı üçün, bütün bunlara beynəlxalq birlik qiymət verməlidir”.

Professor hesab edir ki, məhz bu səbəbdən beynəlxalq birliyin həqiqəti bilməsinə və buna öz qiymətini verməsinə çox ehtiyac var.

Vidadi ORDAHALLI

Son xəbərlər