Elman Nəsirov: “...aparıcı dövlətlərin üzərinə böyük məsuliyyət düşür”
Prezident İlham Əliyev Nizami Gəncəvi Beynəlxalq Mərkəzinin həmsədri İsmail Serageldini videoformatda qəbul edərkən mühüm məqamlara toxunub.
Dövlət başçısının sözlərinə görə, indi vəziyyət dəyişib: “Azərbaycan beynəlxalq hüququ bərpa edib, faktiki olaraq, regionda və dünyada yeni reallıqlar yaradıb. Düşünürəm ki, bölgədə uzunmüddətli sülhün və sabitliyin bərqərar olması imkanından istifadə etmək üçün indi çox şey bu reallıqların region ölkələri, böyük dövlətlər tərəfindən düzgün qiymətləndirilməsindən asılı olacaq. Zənnimcə, bu gün Azərbaycan həqiqətən də düşmənçilik, nifrət, qarşıdurma səhifəsini bağlamaq və region üçün gələcək qurmağa hazır olduğunu nümayiş etdirir. Əslində, biz artıq buna başlamışıq. Biz yenidənqurma işlərinə, bütün region ölkələri üçün və nəticədə regionda sabitlik və proqnozlaşdırılma üçün faydalı olacaq layihələri həyata keçirməyə başlamışıq. Ona görə də düşünürəm ki, hamımızın yeni reallıqları qiymətləndirməyə və əməkdaşlığın müsbət imkanlarına və sülh şəraitində birgəyaşayışa diqqəti cəmləşdirmək üçün hökumətlər və beynəlxalq təşkilatlar olaraq addımlarımızı planlaşdırmağa ehtiyac var”.
Görünın odur ki, ölkə başçısı bölgəmizdəki postmüharibə reallıqları barədə böyük dövlətlərin üstünə ağır məsuliyyət qoydu. Onlar bu işə öz töhfələrini verməlidirlər.
O baxımdan bu yanaşmanı ekspertlər necə dəyərləndirirlər?
- “Elə etməlidirlər ki, Cənubi Qafqazda yaradılan sabitlik daha da möhkəmlənsin”
Məsələyə münasibət bildirən millət vəkili, politoloq Elman Nəsirovun sözlərinə görə, Prezident məlum məsələ ilə bağlı çox vacib məqamlara toxundu: “Əvvəla Prezident İlham Əliyev Ali Baş Komandan olaraq müzəffər ordumuzla tarix yazıb. İşğal altında olan torpaqları azad edərək tarixi missiyanı həyata keçirib. İllərdir mövcud olan işğal reallığını dəyişərək zəfər qazanıb. Eyni zamanda, beynəlxalq hüququ bərpa edib. Çünki beynəlxalq hüquq böhran keçirir. Böhran keçirməsəydi, o zaman Dağlıq Qarabağla bağlı 4 qətnamə illərlə kağız üzərində qalmayacaqdı. Ona görə də ölkə Prezidenti öz qətiyyətli siyasi iradəsi ilə beynəlxalq hüququn norma və prinsiplərini bərpa etdi. Eyni zamanda, digər beynəlxalq qurumların münaqişə ilə bağlı analoji tələblərinin icrasını təmin etdi. Azərbaycanın bütün hərəkətləri beynəlxalq hüququn prinsiplərinə uyğun olub. İşləməyən beynəlxalq hüququ işlək vəziyyətinə gətirib. Ona görə də regionda sabitliyin möhkəmləndirilməsində bölgə dövlətləri ilə yanaşı, aparıcı dövlətlərin üzərinə böyük məsuliyyət düşür. Onlar bu istiqamətdə görülən işlərə töhfə verməlidirlər. Məsələ ondadır ki, Azərbaycan dünyada enerji təhlükəsizliyinə, beynəlxalq terrorizmə qarşı mübarizədə böyük töhfələr verib. Bütün bunları görməmək mümkün deyil. Ancaq Azərbaycanın özünə münasibətdə də biz böyük dövlətlərdən bənzər yanaşma gözləyirik. Ona görə də yeni tarixi reallıqda, ilk növbədə, böyük dövlətlər beynəlxalq hüququn qorunub saxlanılması ilə bağlı addımlar atmalıdırlar. Elə etməlidirlər ki, Cənubi Qafqazda yaradılan sabitlik daha da möhkəmlənsin. Selektiv yanaşmalar olmamalıdır. Yaxşı, pis terrorçu yanaşması olmamalıdır”.
Millət vəkili hesab edir ki, böyük dövlətlər ölkə başçısının bu çağırışına son dərəcə ciddi yanaşmalıdırlar.
Vidadi ORDAHALLI
