Ermənistan Xarici İşlər Nazirliyi guya ki, 1990-cı ilin yanvarında Bakıda ermənilərə qarşı qırğının törədilməsi ilə bağlı əsassız bəyanat yayıb. Bizim XİN buna etiraz edib.
Nazirliyin açıqlamasında qeyd edilir ki, Ermənistan XİN-in guya ki, 1990-cı ilin yanvarında Bakıda ermənilərə qarşı qırğının törədilməsi ilə bağlı əsassız bəyanatı bu ölkənin hələ də uydurma propaqandadan əl çəkmədiyini, xalqlararası nifaq və düşmənçiliyi qızışdırmaq niyyətini göstərir: “Ermənistan XİN-ə xatırladırıq ki, 1948-1953-cü illərdə Ermənistan SSR ərazisindəki tarixi-etnik torpaqlarından kütləvi surətdə deportasiya edilən 150 minədək azərbaycanlı Ermənistan SSR-in 24 rayonu və İrəvan şəhərindən zorla Azərbaycana köçürüldü. Eləcə də Ermənistanın 1980-ci illərin sonunda Azərbaycana qarşı əsassız ərazi iddiaları, Azərbaycanın keçmiş Dağlıq Qarabağ Muxtar Vilayətindəki şovinist təfəkkürlü ermənilərin aqressiv separatçılıq fəaliyyəti, SSRİ rəhbərliyinin bu fəaliyyətə dəstək verməsi, yüz minlərlə azərbaycanlının növbəti dəfə zor gücü ilə və qəddarcasına Ermənistandan deportasiya edilməsi Azərbaycanda sovet hakimiyyətinə qarşı hərəkatın genişlənməsinə təkan verdi. Məhz ümumxalq hərəkatının qarşısını almaq və Azərbaycan xalqının müstəqillik əzmini qırmaq məqsədilə 1990-cı il yanvarın 19-dan 20-nə keçən gecə ölkəyə yeridilən Sovet ordusu beynəlxalq hüququn normalarını, keçmiş SSRİ və Azərbaycan SSR-in Konstitusiyalarını kobudcasına pozaraq dinc əhaliyə qarşı görünməmiş qırğın törətdi”.
Bütün bu deyilənlərin fonunda, bölgədə bütün hərbi əməliyyatların dayandırılmasına dair 10 noyabr 2020-ci il tarixli üçtərəfli bəyanatın imzalanmasından sonra sülh və təhlükəsizlik, tərəqqi şəraitində birgəyaşayış fikirlərinin təşviq olunması əvəzinə, rəsmi İrəvanın uydurma əsaslarla düşmənçilik propaqandasını davam etdirməsi hansı anlama gəlir?
“Ermənistanın başlatdığı bu siyasət Azərbaycana yönəlik düşmənçiliyin təşviqi və Rusiyaya qarşı bir mövqedir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, məlum yanaşma onu göstərir ki, Ermənistan düşmənçilik siyasətindən əl çəkmək istəmir: “Ermənistanla Azərbaycan arasında Rusiyanın vasitəçilyilə keçirilən danışıqlar müəyyən şəkildə müsbət bir ortamın formalaşmasına xidmət edir. Üçtərəfli işçi qrupunun yaradılması və bu istiqamətdə sərhədlərin demarkasiyası həyata keçiriləcək, normallaşma prosesinə gediləcək bir siyasi xətt müzakirə edilir. Ancaq Ermənistan XİN-in verdiyi bəyanata nəzər saldıqda görürük ki, bu hakimiyyət Azərbaycana qarşı düşmənçilik siyasətini davam etdirir. Rəsmi İrəvan danışıqlarda və regionda sülhün möhkəmlənməsində səmimi deyil. Həmin bəyanat bunu bir daha sübut edir. Göründüyü kimi, Ermənistanın Xarici İşlər Nazirlyində kök salımış faşist ideologiyasının daşıyıcıları konkret olaraq Azərbaycanla sülhün təmin olunmasını deyil, yeni problemlərə yol açacaq mövqe ortaya qoyurlar. Hesab edirəm ki, Ermənistanın başlatdığı bu siyasət Azərbaycana yönəlik düşmənçiliyin təşviqi və Rusiyaya qarşı bir mövqedir. Çünki Rusiya iki ölkə arasında münasibətlərin normallaşmasına çalışır. Ümumiyyətlə, Ermənistan XİN-in bu bəyanatı tarixi saxtakarlığa əsaslınır”.
Politoloq onu da qeyd etdi ki, yaxın illəri belə saxtalaşdıran bir dövlətin mövqeyində tez bir zamanda korrektələr etməsi gözlənilmir.
Vidadi ORDAHALLI
