ICESCO Şuşanı İslam dünyasının paytaxtı kimi təklif etdi...

img

Ermənistanın təcavüzü nəticəsində abidələrimizə dəyən ziyan ICESCO-nun hər zaman diqqət mərkəzində olub. “Trend”-in məlumatına görə, bunu Mədəniyyət naziri Anar Kərimov yanvarın 14-də keçirdiyi brifinqdə deyib.

Onun sözlərinə görə, ICESCO-nun baş direktoru Salim əl-Malikin rəhbərlik etdiyi nümayəndə heyəti Azərbaycanda bir neçə gündür ki, səfərdədir. Bu səfər Vətən müharibəsindən sonra təşkilatın ölkəmizə ilk səfərdir: "Biz bu səfəri özümüz üçün çox əlamətdar sayırıq. Bu səfərin iki əsas məqsədi var. Bunlar ICESCO ilə Azərbaycan arasında əməkdaşlığı gücləndirmək və erməni təcavüzündən sonra işğaldan azad edilmiş ərazilərimizdəki mədəni tarixi abidələrimizə baxış keçirmək və ona münasibət bildirməkdir".

A.Kərimov əlavə edib ki, 44 günlük müharibə zamanı ICESCO Azərbaycanın etibarlı tərəfdaşı olduğunu bir daha sübuta yetirdi.

“Biz razılığa gəldik, gələcəkdə ICESCO işğaldan azad edilmiş ərazilərimizə texniki missiya göndərəcək” – deyən Mədəniyyət nazirinin sözlərinə görə, ICESCO nümayəndə heyəti Füzuli və Ağdama səfər edib: "Onlar öz gözləri ilə şahid olublar ki, ermənilər tərəfindən hansı cinayətlər törədilib. Füzulidə bir sağlam bina tapılmayıb. Nümayəndə heyəti Ağdamda Cümə Məscidi və ətrafdakı ərazilərə səfər ediblər. Ermənilər tərəfindən etnik təmizləmə ilə yanaşı, mədni təmizləmə aparıldığına şahid olublar. Bu hadisələr göstərir ki, ermənilər insanlığa qarşı cinayət törədib. Biz ümid edirik ki, ICESCO öz hesabatında bu cinayətləri qeydiyyayata alacaq və onları sənədləşdirərək dünyaya, geniş ictimaiyyətə təqdim edəcəklər".

ICESCO-nun Baş direktoru Salim bin Məhəmməd əl-Malik buraya Azərbaycan hökumətini dəstəkləməyə gəldiklərini ifadə edib. Onun sözlərinə görə, işğaldan azad edilmiş ərazilərə səfər zamanı orada dağıdılmış şəhərləri, mədəni-tarixi abidələrin məhv edildiyini görüblər: "Bu cinayətlərə məhməkədə baxılmalıdır. Çünki bu, bəşəriyyətə qarşı törədilən cinayətdir. Ağdam vaxtilə insanlarla dolu şəhər idi. İndi orada yalnız divar qalıqları qalıb".

“Biz təklif etdik ki, Şuşa İslam dünyasının paytaxtı olsun. Əminəm ki, bu gələcəkdə mümkün olacaq” – deyən ICESCO-nun Baş direktoru "Biz Azərbaycanın uğur tarixini digər ölkələrdə də təbliğ etməyə nail olacağıq" - deyə bildirib. Onun sözlərinə görə, ICESCO-nun texniki missiyası Azərbaycana səfər edəcək. Missiya işğaldan azad edilmiş ərazilərdəki vəziyyətlə bağlı hesabat hazırlayacaq və bu missiyanın hazırlayacağı hesabat çox ədalətli olacaq.

Salim bin Məhəmməd əl-Malik bildirib ki, ICESCO-nun texniki missiyasının tərkibinə yalnız üzv deyil, qeyri-üzv ölkələrin də nümayəndələrinin daxil olmasına çalışılacaq. ICESCO-nun texniki missiyasının səfər tarixini indi deməyin çətin olduğunu ifadə edən qonaq bildirib ki, bunun üçün namizədlər müəyyən edilməlidir: "Növbəti həftənin sonunda bununla bağlı ekspertlər təyin edəcəyik. Ümid edirik ki, fevralın sonunda texniki missiya səfər etməyə müvəffəq olacaq. Komandanın səfərindən sonra hesabatın hazırlanması çox zaman aparmayacaq".

Mədəniyyət naziri Anar Kərimov isə bildirib ki, işğaldan azad edilmiş ərazilərimiz minalardan tam deyil, qismən belə təmizləndikdən sonra bu cür missiyanı təşkil etmək olar: "Biz çalışacağıq ki, bu missiyanı tez həyata keçirək". Onun bildirdiyinə görə, bu il ICESCO-nun Azərbaycanda regional mərkəzi açılacaq və bu regional mərkəz bir çox ölkələri əhatə edəcək.

Son xəbərlər