Ermənistan müxalifəti 11 yanvar Moskva razılaşmasını da ölkənin ziyanına saydı - düşmən ölkənin narahatlıqlarının mahiyyəti...

Qasım Hacıyev: “Ermənistan müxalifətinin narahatlığının kökündə...”

img

Yanvarın 11-də Moskvada Azərbaycan Respublikasının Prezidenti İlham Əliyev, Ermənistan Respublikasının baş naziri Nikol Paşinyan və Rusiya Federasiyasının Prezidenti Vladimir Putin tərəfindən imzalanan üçtərəfli bəyanata Ermənistanda münasibət birmənalı deyil. Bu bəyanata imza atdığına görə baş nazir Nikol Paşinyan ölkəsinin müxalifəti tərəfindən ciddi tənqidlərə məruz qalıb. Belə ki, Ermənistan müxalifəti Moskvada imzalanmış üçtərəfli bəyanata qarşı çıxıb.

 

Erməni mətbuatının yazdığına görə, Ermənistan parlamentində təmsil olunan “İşıqlı Ermənistan” partiyasının sədri Edmon Marukyan açıqlama verib. O, razılaşmanın ancaq Azərbaycanın maraqlarına xidmət etdiyini deyib. “Üçtərəfli bəyanat Azərbaycanın maraqlarına xidmət edir. Hökumətyönlü  KİV yeni razılşamanın Ermənistanla İran və Rusiya arasında dəmir yolu xəttinin açılmasına xidmət edəcəyini sevinclə təqdim edir. Eyni vaxtda, erməni xalqının bu görüşdən əsas gözləntisi var idi – hərbi əsirlərin qısa müddətdə geri qaytarılması. Gündəm yenə sırf düşmənin maraqları çərçivəsində tərtib olunub” - deyə Marukyan söyləyib.

Ermənistan müxalifətinin 11 yanvar Moskva razılaşmasını ölkənin ziyanına saymasının səbəbi nədir, bunun mahiyyətində nə dayanır?

  • “Ermənistanın Moskva görüşündən bəzi gözləntiləri vardı, amma bunların heç biri olmadı”

Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, yanvarın 11-də Moskvada imzalanan üçtərəfli bəyanatda Ermənistanın heç bir istəyi yer almayıb, ona görə də Ermənistan müxalifəti bunu onların ziyanına, Azərbaycanın isə xeyrinə olduğunu bildirir: “Əvəla onu deyim ki, Ermənistanın Moskva görüşündən bəzi gözləntiləri vardı, amma bunların heç biri olmadı. 44 günlük müharibədə uğradığı məğlubiyyətdən sonra bu ölkə bütün mənalarda uçuruma doğru gedir. Ermənistanın daxili və xarici siyasəti iflic vəziyyətə düşüb məhv oldu. Əvvəllər sahib olduqları nə varsa, hamısını indi itiriblər. Ermənistan hökumətinin də, müxalifətinin də, erməni lobbisinin də əsas məqsədi o idi ki,  Moskvada imzalanan üçtərəfli bəyanatda onların xeyrinə nələrsə olsun, amma bu olmadı. Paşinyanın Moskvada qaldırdığı məlum cəfəng məsələlər isə üçtərəfli görüşün protokolunda nəzərdə tutulmamışdı, bu protokolun məzmunu ilə ziddiyyət təşkil edirdi. Ermənistanın baş nazirinin “hərbi əsir”lərdən, “Qarabağın statusu” məsələsindən danışması, “münaqişənin hələ başa çatmaması” haqqında dedikləri gülüncdür.

Azərbaycan Prezidenti dəfələrlə bəyan edib ki, Dağlıq Qarabağ münaqişəsi yoxdur, o həll olunub və Qarabağda yaşayan ermənilərə heç bir status verilməyəcək, onlar Azərbaycan vətəndaşlarıdır. Bütün bunlardan sonra yenidən bu məsələni qabartmaq gülünc bir haldır. Ermənistanın hər şeydən əli çıxıb, istədiyinə nail olmayıb, ona görə də bu ölkənin müxalifəti bu cür açıqlamalar verir.  Ermənistan müxalifətinin narahatlığının kökündə üçtərəfli Moskva razılaşmasında bu ölkənin əsassız iddialarının təmin edilməməsi dayanır”.

Q.Hacıyev hesab edir ki, Ermənistanın bu əsassız iddiaları və Şirak vilayətindən terrorçu dəstələri hazırlayaraq Azərbaycan ərazilərinə göndərməsi onun özünün ziyanına işləyib. “Hökumət ölkəni idarə edə bilmir, Ermənistan ayrı-ayrı terrorçu qrupların əlində oyuncağa çevrilib, müstəqilliyini, dövlət kimi varlığını itirməkdədir. 10 noyabr razılaşmasından sonra Azərbaycan ərazisində terror törətməyə cəhd edən terrorçuları xilas etmək üçün Paşinyan çox çalışdı, amma bunu heç cür həyata keçirə, üçtərəfli bəyanata daxil edə bilmədi. Bu məqam da Ermənistan müxalifətini ciddi şəkildə qıcıqlandırır.

Ermənistandan fəqrli olaraq, Azərbaycanı və Rusiyanı maraqlandıran daha ciddi məsələlər var və həmin məsələlər də Moskva görüşündə imzalanan bəyanatda öz əksini tapıb. Bu da beynəlxalq səviyyəli nəqliyyat infrastrukturunun yaradılmasıdır. Bu da Şərq-Qərb siyasətində ən mühüm rol oynaya biləcək bir məsələnin həllidir. Azərbaycanla Rusiyanın diqqəti buna yönəlib. Deyərdim ki, bütün bu hadisələrin sonu gedib belə bir müsbət nəticəyə, beynəlxalq layihənin həyata keçirilməsinə çıxır. Çünki indiyə qədər mümkün olmayan bir işi həyata keçirirlər. Həm Azərbaycan, həm Rusiya, həm Türkiyə, həm İran, həm də istəsə, özünü normal aparsa, Ermənistan bundan xeyir görə bilər. Amma Ermənistan bu məsələnin mahiyyətini hələ dərk edə bilmir. Çünki bu ölkənin taleyini həmişə başqaları həll edib. Ona görə də xaricdəki diaspor təşkilatları nə deyir, Ermənistan onu edir, amma bütün dünyanı, həmçinin də regionun 4 nüfuzlu ölkəsini maraqlandıran  məsələlərin hələ üzərinə gəlib çıxa bilmirlər. Çünki başlarında hələ də separatizm havası qalır, hansısa qondarma iddiaların arxasınca sürünürlər” - deyə Q.Hacıyev vurğuladı.

İradə SARIYEVA

Son xəbərlər