22/09/2020 23:54
728 x 90

Ramiz Mehdiyevin uğursuz “korrupsiya komissarlığı” - sabiq məmurun korrupsiyanın yayılmasında hüquqi məsuliyyəti...

Elşən Həsənov: “Həmin dönəmdəki fəaliyyətinə görə qurum adının zəhmindən başqa heç nə ilə yadda qalmayıb”

img

Məlum olduğu kimi, Prezident İlham Əliyevin dövlət idarəçiliyində həyata keçirdiyi genişmiqyaslı islahatlara, qanunvericilik, icra və məhkəmə hakimiyyəti orqanlarında aparılan dəyişikliklərə uyğun olaraq, 2020-ci ildə Korrupsiyaya qarşı mübarizə üzrə Komissiyanın tərkibi yenilənib. Sentyabrın 15-də Azərbaycan Respublikasının Korrupsiyaya qarşı mübarizə üzrə Komissiyasının yeni tərkibdə videoformatda ilk iclası keçirilib. İclasda Azərbaycan Prezidenti Administrasiyasının rəhbəri Samir Nuriyev Komissiyanın sədri seçilib.

Qeyd edək ki, Komissiyanın beş üzvü Prezident, beş üzvü Milli Məclis, beş üzvü isə Konstitusiya Məhkəməsi tərəfindən təyin olunur. Milli Məclisin 2020-ci il 5 iyun tarixli qərarı ilə deputatlar Adil Əliyev, Əminə Ağazadə, Elşad Mirbəşiroğlu, Arzu Nağıyev və parlament Aparatının rəhbəri Səfa Mirzəyev Komissiyanın üzvü təyin edilib. Avqustun 26-da Konstitusiya Məhkəməsi Komissiyaya Baş prokuror Kamran Əliyevi üzv təyin edib. K.Əliyev bu vəzifədə keçmiş Baş prokuror Zakir Qaralovu əvəzləyib. Bununla yanaşı, Konstitusiya Məhkəməsinin sədri Fərhad Abdullayev, Ədliyyə naziri, Məhkəmə-Hüquq Şurasının sədri Fikrət Məmmədov, Ali Məhkəmənin sədri Ramiz Rzayev, Vəkillər Kollegiyasının Rəyasət Heyətinin sədri Anar Bağırov da Komissiyanın üzvləridir. Avqustun 31-də isə Prezident İlham Əliyevin sərəncamı ilə Prezident Administrasiyasının rəhbəri Samir Nuriyev, Prezidentin köməkçisi – Prezident Administrasiyasının Hüquq-mühafizə orqanları ilə iş şöbəsinin müdiri Fuad Ələsgərov, Prezident Administrasiyasının Qanunvericilik və hüquq siyasəti şöbəsinin müdiri, Birinci vitse-prezidentinin köməkçisi Gündüz Kərimov, Daxili İşlər naziri Vilayət Eyvazov, Dövlət Təhlükəsizliyi Xidmətinin rəisi Əli Nağıyev Komissiyaya üzv təyin olunublar. Qeyd edək ki, həmin vaxta qədər Korrupsiyaya Qarşı Mübarizə üzrə Komissiyanın sədri Prezident Administrasiyasının keçmiş rəhbəri Ramiz Mehdiyev olub. Korrupsiyaya qarşı mübarizə üzrə Komissiya 2004-cü ilin 3 martında yaradılıb. Qurum korrupsiyanın qarşısının alınması sahəsində ixtisaslaşmış orqanın funksiyalarını həyata keçirir.

Göründüyü kimi, bu quruma uzun müddət Ramiz Mehdiyev rəhbərlik edib. Ancaq aparılan islahatlar və bunun fonunda baş verən məmur həbslərindən görürük ki, ölkədə korrupsiya ilə mübarizə heç də ürəkaçan səviyyədə olmayıb. Məhz bu amilə görə Ramiz Mehdiyevin vəzifə məsuliyyətinə hüquqi qiymət verməyə ehtiyac varmı?

Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki,  bu məsələnin gündəmə gətirilməsi mütləq lazımdır: “Ramiz  Mehdiyev vəzifədən çıxandan sonra bir neçə məqalə ilə çıxış edib. Onlardan birində məhz özünün nəzarəti altında olan sahələrin fəaliyyətini ciddi tənqid etmişdi. Haqlı olaraq sual yarandı ki, sən bunun səbəbini kimdən soruşursan? Çox maraqlıdır ki, həmin tənqid sahələri içərisində korrupsiya termininə rast gəlmədim. Çox geniş səlahiyyətlər verilən bu dövlət komissiyasına 16 il Ramiz Mehdiyev başçılıq edib. Nəticə nədir? Haranı tərpədirlərsə, rüşvət, korrupsiya mexanizmi çıxır. Ramiz Mehdiyevin bu biabırçılıqdan danışmaması təsadüfi deyil. O, diqqəti əsas məsələdən yayındırmağa çalışıb. Olduqca ciddi mövzudur. Ölkəmizi geri salan başlıca amil məhz rüşvət və korrupsiya olub. Mənə elə gəlir ki, bu istiqamətdə mütləq mənada araşdırma aparılmalıdır. Daha doğrusu, həmin dönəmdəki fəaliyyətə hüquqi qiymət mütləq verilməlidir. Qoy ictimaiyyət də bilsin ki, bu komissiya nə ilə məşğul olub. Təbiidir ki, hər bir qurumun məhsuldar fəaliyyətinin olub-olmamasına onun rəhbəri məsuliyyət daşıyır. Mənə elə gəlir ki, həmin dönəmdəki fəaliyyətinə görə qurum adının zəhimindən başqa heç nə ilə  yadda qalmayıb.  Əks təqdirdə biz dövlət qurumlarında hökm sürən bu biabırçılıqla rastlaşmazdıq”.

Hər halda, indiyə qədər biz həmin komissiyanın hansısa bir ciddi detalı üzə çıxardığını görməmişik. Məmur korpusundakı son həbslərin isə birbaşa Prezidentin ortaya qoyduğu iradə əsasında həyata keçirildiyi məlumdur.

Məhəmmədəli QƏRİBLİ

Son xəbərlər