Elşad Musayev: “Bundan sonra həmsədrlərdən hansısa dönüşü gözləməyə dəyməz”
Xarici İşlər naziri Ceyhun Bayramov Fransa Respublikasının Azərbaycandakı fövqəladə və səlahiyyətli səfiri Zakari Qrosu qəbul edib. Nazir Ceyhun Bayramov Azərbaycan və Fransa arasında münasibətlərin xüsusi əhəmiyyət kəsb etdiyini qeyd edərək, ölkələrimiz arasında Azərbaycanın müstəqilliyini bərpa etməsinin ilk illərindən başlayaraq əməkdaşlığın yüksək səviyyədə inkişaf etdiyini vurğulayıb. Yüksək səviyyəli səfərlər də daxil olmaqla, iki ölkə arasında müxtəlif sahələr üzrə mövcud olan mübadilə və təmasların qarşılıqlı faydalı əlaqələrimizin daha da genişlənməsinə böyük töhfə verdiyi qeyd olunub.
Ceyhun Bayramov ATƏT-in Minsk Qrupunun həmsədr ölkəsi qismində Fransa səfirinə Ermənistan-Azərbaycan Dağlıq Qarabağ münaqişəsinin həlli ilə bağlı yaranmış vəziyyət barədə ətraflı məlumat verib. Münaqişənin həlli üzrə danışıqlar prosesinin Ermənistan tərəfinin nümayiş etdirdiyi son dərəcə təxribatçı və məsuliyyətsiz davranış səbəbindən dalana dirəndiyi qeyd olunub. Ermənistan rəhbərliyinin bölgədə gərginliyin alovlanmasına xidmət edən təhrikçi əməlləri və bu kimi təxribatçı fəaliyyətə Minsk Qrupu həmsədrləri tərəfindən münasibət bildirilməməsi təəssüflə vurğulanıb. İşğalçı Ermənistanla əraziləri 30 ilə yaxındır işğal altında saxlanan Azərbaycana tarazlı mövqe nümayiş etdirilməsinin düzgün olmadığı bildirilib. Həmçinin son zamanlar Ermənistanın geniş şəkildə silahlanmasının bu ölkənin yeni təxribatlarda maraqlı olduğunun göstəricisi olduğu vurğulanıb.
Göründüyü kimi, nazir Ceyhun Bayramov ciddi arqumentlərlə Fransa səfirinə narazılığımızı çatdırıb. Bu tənqidlərdən Fransaya birbaşa pay düşür. Çünki həmin ölkə ATƏT-in Minsk Qrupunun həmsədrlərindən biridir. Bu baxımdan, nazirin iradlarından Fransa özü üçün hansı nəticəni çıxarmalıdır?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Dağlıq Qarabağ münaqişəsinin həllinin dalana dirəndiyi heç kimə sirr deyil: “Bu illər ərzində tərəflər arasında çoxlu danışıqlar olub. ATƏT-in Minsk Qrupu yaradılıb və onlara nizamlayıcı missiya tapşırılıb. Təəssüf ki, həmin formatda aparılan danışıqların heç bir nəticəsi olmayıb. Bu baxımdan da, Azərbaycan rəsmilərinin həmin formata aid olan ölkələrə aid şəxslərlə görüşdə etiraz səsləndirməsi təbiidir. Bu etirazları haqlı saysaq da, məsələnin tam həlli yolu deyil. Uzun illərdi ki, belə etirazlar bildirilir, amma həmsədrlərin fəaliyyətində zərrə qədər də dəyişiklik yoxdur. Heç kim gəlib bizim əvəzimizdən bu münaqişəni həll edən deyil. ATƏT-in Minsk Qrupu həmsədrlərinin ayrı-ayrılıqda mövqeləri bəllidir. Bu baxımdan da ən yaxşı yol torpaqlarımızı erməni işğalından müharibə ilə təmizləməkdir. Nazir doğru olaraq qeyd edib ki, Minsk Qrupu məsələlərə münasibət bildirərkən tarazlı mövqe tutur. Yəni bu o deməkdir ki, istənilən məsələ ilə bağlı həmin təsisat tərəflər arasında məsuliyyəti bərabərləşdirən bəyanat verir. Elə bu faktın özü həmin təsisatın əməli işlə məşğul olduğunu deyil, baş girələdiyini sübut edir. Hesab edirəm ki, bundan sonra həmsədrlərdən hansısa dönüşü gözləməyə dəyməz. Çünki Ermənistan rəhbərliyinin son günlər ərzində seçdiyi ritorika sırf danışıqları pozmağa hesablanıb. Bu səbəbdən də, biz səfərbər olub, torpaqlarımızı azad etməliyik. Nə Fransadan, nə də başqa ölkələrdən bizə haray olacaq. Artıq sübut olunur ki, bizim hərbdən başqa yolumuz qalmır. 30 il ərzində vasitəçilər bir addım da olsun irəliyə getməyiblərsə, bundan sonra onlardan nəsə gözləmək tam yersizdir”.
Ceyhun Bayramovun Fransa səfirinə dediklərini eynilə digər həmsədr ölkələrə də aid etmək olar. Çünki onların da fəaliyyəti Fransadan nə iləsə fərqlənmir.
Məhəmmədəli QƏRİBLİ
