05/08/2020 17:27
728 x 90

Azərbaycan ordusunun “Qrad”dan istifadəsinə dair Ermənistanın yalan təbliğatının hədəfi…

Üzeyir Cəfərov:“Bununla ermənilər beynəlxalq ictimai rəydə çaşqınlıq yaratmaq məqsədi güdürlər”

img

Ermənistan Müdafiə Nazirliyinin nümayəndəsi Artsrun Ovannisyan erməni mediasına açıqlamasında bildirib ki, guya Azərbaycan Silahlı Qüvvələri Ermənistan silahlı qüvvələrinə qarşı Tavuş istiqamətində çoxsaylı "Qrad" raket sistemlərindən istifadə edib:"Tanklar Azərbaycanın istifadə etdiyi ən ağır silah deyil. Bəli, "Qrad"dan istifadə edilib".

Sözügedən məsələyə münasibət bildirən Müdafiə Naziliyinin Mətbuat Xidmətinin rəisi, polkovnik Vaqif Dərgahlı erməni tərəfinin bununla bağlı yaydığı informasiyanın həqiqəti əks etdirmədiyini deyib: "Ermənistan KİV-nin guya Azərbaycan Ordusunun bölmələri tərəfindən cəbhənin Tovuz istiqamətində Ermənistan silahlı qüvvələrinə qarşı “Qrad” yaylım atəşli reaktiv sistemlərdən istifadə etməsi barədə yaydığı məlumat dezinformasiyadır. Bildiririk ki, bölmələrimiz tərəfindən bu silah növü tətbiq edilməyib. Əgər Ermənistan tərəfində bu silah növünün tətbiq edilməsi barədə hər hansı bir sübut varsa, onu təqdim etsin".

Göründüyü kimi, ermənilərin növbəti yalanı rəsmən ifşa edildi. Deyilənlərin doğru olmadığı ortaya çıxdı. Maraqlıdır, Ermənistan tərəfi “Qrad”dan guya istifadə edildiyi xəbəri ilə nəyə nail olmaq istəyir?

  • “Onlar heç bilmir bizim o istiqamətdə diviziyalarımız var, yoxsa yoxdur”

Məsələyə münasibət bildirən hərbi ekspert Üzeyir Cəfərovun sözlərinə görə, erməni tərəfinin bu cür yalan informasiyalar yaymaqda məqsədi beynəlxalq ictimaiyyətdə çaşqınlıq yaratmaqdır: “Ümumilikdə, ermənilər birinci dəfə deyil bu cür dezinformasiya yayırlar. Zaman-zaman qarşı tərəf belə informasiyalar yaymaqla Azərbaycanı qaralamağa çalışıb. Biz öz haqq işimiz uğrunda mübarizə aparırıq. Bizim haqq işimiz də Azərbaycanın ərazi bütövlüyünün təmin olunmasına yönəlib. Ermənilər heç bilmir bizim o istiqamətdə diviziyalarımız var, yoxsa yoxdur. Ancaq şərəfsizcəsinə yalan informasiyalar yayırlar ki, Azərbaycan “Qrad” qurğularından istifadə edir. Bununla ermənilər beynəlxalq ictimai rəydə çaşqınlıq yaratmaq məqsədi güdürlər. Məhz bu məqsədlə belə əsası olmayan məlumatlar yayırlar. Ona görə də biz son dərəcə ayıq və diqqətli olmalıyıq. İki gün əvvəl erməni tərəfi bəyan edirdi ki, heç bir itkimiz yoxdur. Artıq dünəndən bəyan edirlər ki, itkiləri var. Əvvəl bir mayor və bir kapitanın öldüyünü etiraf etdilər, sonra bir çavuş və bir əsgərin öldüyünü açıqladılar. Bu gün isə artıq 10 nəfər yaralı olduğunu deyirlər. Onlardan 5-nin vəziyyəti ağırdır. Əslində ermənilərin itkiləri daha çoxdur, amma onlar itkilərini gizlədirlər. Bütün bunların fonunda Azərbaycanda bəzi məsulyyətsiz şəxslər sosial şəbəkələrdən düzgün istifadə etmir, kobud səhvlərə yol verirlər. O nöqteyi-nəzərdən hesab edirəm ki, biz son dərəcə diqqətli və ehtiyatlı olmalıyıq. Çünki bu müharibədir. Müharibənin öz tələbləri və qanunları var. Təəssüflər olsun ki, müəyyən məsuliyyətsiz şəxslər bunu anlamırlar. Sanki Ermənistana “pas” ötürürlər və ağılsız məlumatlarla çıxış edirlər. Belə hallara yol vermək olmaz. Bununla belə, biz imkan verməməliyik ki, Ermənistan tərəfi beynəlxalq ictimaiyyəti çaşdıra bilsin”.

Göründüyü kimi, Ermənistan bütün vasitələrlə çalışır ki, yalan informasiyalarla Azərbaycanı qaralasın. Dünyada son hadisələrlə bağlı çaşqınlıq yaratsın. Ona görə də hamı diqqətli olmalıdır.

Vidadi ORDAHALLI

Son xəbərlər