Arzu Nağıyev: “Hazırda kəndlərdə əhval-ruhiyyə yüksək səviyyədədir, əhali arasında ciddi panika yoxdur”
İyulun 12-si və 13-də Ermənistan silahlı qüvvələri bölmələri Ermənistan-Azərbaycan sərhədinin Tovuz rayonu istiqamətində atəşkəs rejimini pozaraq təxribatlar törədib, rayonun Ağdam və Dondar Quşçu kəndlərini minaatanlardan və toplardan ağır artilleriya atəşinə tutublar. Lakin rəşadətli Azərbaycan Ordusunun sarsıdıcı cavab zərbələri ilə düşmən ağır tələfat verərək geri oturdulub.
İyulun 13-ü günün ikinci yarısında Azərbaycan Ordusunun bölmələrinin dəqiq atəşi və gördüyü sərt cəza tədbirləri nəticəsində düşmənin bir neçə hərbi obyekti, texnikası və 20 nəfərdən çox şəxsi heyəti məhv edilib.
Qeyd edək ki, döyüş getməsinə baxmayaraq, kənddə həyat öz axarında davam edir. Kənd sakinlərinin əhval-ruhiyyəsi olduqca yüksəkdir. Məlumat üçün bildirək ki, Tovuz rayonunun Ağdam kəndi düşmənə ən yaxın məsafədə yerləşən kəndlərdən biridir və uzun illərdir kənd sakinləri düşmən mövqeləri ilə üz-üzə dayanıb.
Kənd sakinləri sosial şəbəkə vasitəsilə bildirir ki, döyüş əhval-ruhiyyəsindədir. Onlar işğal altında olan torpaqlarımızın gec-tez azad ediləcəyini əmindir:“Biz bir addım da geri çəkilməyəcəyik. Hər birimiz silaha sarılıb Ali Baş Komandanımızın əmri ilə düşmənə qarşı vuruşmağa hazırıq”.
- “Böyükçaplı silahlar, eyni zamanda artilleriya qurğularından istifadə edirlər, kəndləri vururlar, dinc əhaliyə atəş açırlar”
Tovuz rayonundan millət vəkili seçilmiş Arzu Nağıyev bildirdi ki, hazırda kəndlərdə əhval-ruhiyyə yüksək səviyyədədir. Əhali arasında ciddi panika yoxdur. Hətta atışmanın, artilleriyanın səsi evlərə gəlir. Əhali ordusu ilə birgə olub köməklik göstərir. Lakin düşünürəm ki, buna da ehtiyac yoxdur. Ordu tam şəkildə öz üzərinə düşən funksiyanı yerinə yetirə bilir:“İki gündür Tovuzdayam. Hazırda intensiv atışma gedir. Artıq böyükçaplı silahlar, eyni zamanda artilleriya qurğularından istifadə edirlər. Kəndləri vururlar, dinc əhaliyə atəş açırlar. Ciddi atışma gedən kəndlər Ağdam və Dondar Quşçudur”.
Həmsöhbətimiz onu da vurğuladı ki, nəyin bahasına olursa-olsun, bu məsələyə son qoyulmalıdır. Müharibə tək səngərdə deyil, diplomatik səviyyədə də gedir. Azərbaycan öz ərazisində antiterror əməliyyatı keçirib, buna nail ola bilər. Düşünürəm ki, artıq bu istiqamətdə başqa yol yoxdur.
Qeyd edək ki, Azərbaycan əhalisi öz yurduna, torpağına bağlıdır. Hər kəs Ali Baş Komandanın əmrini gözləyir.
Günel CƏLİLOVA
