KTMT-dən Ermənistana tərs münasibət - Tovuz təxribatı günü təşkilatın xüsusi iclası ləğv edildi...
Azərbaycan və Ermənistan dövlət sərhədinin Tovuz rayonu istiqamətində son gərginliyin hərbi təhlili onu göstərir ki, təxribat Ermənistan tərəfindən başlanıb. Ermənistan məqsədyönlü şəkildə bu təxribata hazırlaşıb.
Ermənistan tərəfi qəflətən artilleriya qurğularından istifadə edib və nəticədə Azərbaycan hərbçiləri şəhid olublar. Ermənistan tərəfinin itkiləri daha sonrakı vaxtda Azərbaycan Ordusunun cavab atəşi nəticəsində baş verib. Görünən budur ki, Ermənistanın bu təxribatı törətməkdə məqsədi təkcə diqqəti ölkədə olan ağır sosial-iqtisadi vəziyyətdən və COVİD-19 ilə bağlı acınacaqlı durumdan yayındırmaq deyil. Məqsəd həm də sərhəddə gərginlik yaradaraq Kollektiv Təhlükəsizlik Müqaviləsi Təşkilatını (KTMT) münaqişəyə cəlb etmək idi. Ermənistan KTMT ölkələrini öz çirkin siyasətinin əsirinə çevirməyə və təşkilatın arxasında daldalanmağa çalışır. Lakin onların bu ümidləri də puç oldu. KTMT daxilində sağlam məntiq qalib gəldi və sözügedən məsələ ilə bağlı təşkilatın planlaşdırılan növbədənkənar daimi şura görüşü ləğv olundu. Bu barədə xəbər KTMT internet ünvanından silindi. Bəllidir ki, KTMT ölkələri də Ermənistanın məkrli niyyətini yaxşı başa düşür.
Xarici işlər naziri Zöhrab Mnasakyan dərhal Kollektiv Təhlükəsizlik Müqaviləsi Təşkilatının (KTMT) baş katibi Stanislav Zasa zəng edib təşkilatın Ermənistana dəstək verməsini istəyib. Bəlkə də insidentin Dağlıq Qarabağ istiqamətində deyil, Azərbaycanla sərhəddə baş verməsində məqsəd Ermənistana KTMT-nin və özəlliklə Rusiyanın dəstəyinin artırılmasına nail olmaqdır. Hələlik bu saata qədər KTMT üzvləri Ermənistana birmənalı dəstək ifadə etməyiblər. Məsələ burasındadır ki, Rusiyadan başqa KTMT-nin digər üzvləri işğalçı dövlətə dəstək vermir, çünki üzv ölkələrin Azərbaycanla tərəfdaşlıq münasibətləri var. Ermənistanın KTMT uğursuzluğu ilə bağlı ekspertlər nə düşünür?
Politoloq Rəşad Bayramov “Bakı-Xəbər”ə açıqlamasında bildirdi ki, Ermənistanın təxribatı törətdikdən sonra KTMT-yə şikayət etməsi onların niyyətindən xəbər verir:“Ermənistan rəhbərliyi dəfələrlə bəyan edib ki, Azərbaycan hərbi yolla münaqişənin həllinə başlasa KTMT öz sözünü deyəcək. Onlar hətta bunu işğal olunmuş ərazilərdə baş verə biləcək hərbi əməliyyatlara da şamil edirdilər. Sonradan KTMT rəsmiləri bəyanat verərək, üzv ölkələrin sərhədlərinin kollektiv qorunması kimi bir öhdəliyin olduğunu dilə gətirdilər. Təbiidir ki, Ermənistanın işğal edilən ərazilərdəki təxribatı baş tutmayandan sonra onlar bu təxribatı məhz dövlət sərhədində törətdilər. Məsuliyyəti Azərbaycanın boynuna qoymaqla, güya bizim Ermənistana hücum etdiyimiz rəyini formalaşdırıb, sonra KTMT-ni köməyə çağırmaq hiyləsini ortaya atdılar. Heç kimə sirr deyil ki, Azərbaycan heç zaman Ermənistanla sərhəddə döyüşə getməzdi. Çünki bizim hansısa dövlətin ərazisini işğal etmək kimi niyyətimiz yoxdur. KTMT-yə edilən şikayətin sonda ciddiyə alınmaması göstərdi ki, ermənilər bu təxribatı təkbaşına ediblər. Çünki Azərbaycanın yaxın dostları olan KTMT üzvləri: Belarus və Qazaxıstan asanlıqla bu təxribatda iştiraka qoşula bilməzdi. Bu məsələlərdə Rusiyanın maraqlı olduğunu təxmin edə bilərdik. İclasın ləğvi göstərdi ki, heç onlar da maraqlı deyil. Ermənistan uzun müddətdir ki, belə hərbi avantüralar yolu ilə üzv olduğu Kollektiv Təhlükəsizlik Müqaviləsi Təşkilatını Ermənistan-Azərbaycan münaqişəsinə cəlb etməyə, Azərbaycana qarşı törətdiyi işğal və təcavüzün məsuliyyətindən boyun qaçırmağa çalışır. Azərbaycanın, Ermənistan istisna olmaqla, bütün KTMT ölkələri ilə dostluq münasibətləri var. KTMT ölkələri Ermənistanın məkrli niyyətini yaxşı başa düşürlər. Azərbaycana belə bir hadisənin törədilməsi, ermənilərə dərs vermək lazım olsaydı, onu işğal edilmiş ərazilərlə sərhəd bölgələrində – təmas xəttində həyata keçirərdi. Proseslərin gedişi göstərir ki, ermənilərin bu təxribatı da fiaskoya uğradı”.
Azərbaycan öz ərazilərini istənilən yolla azad etmək hüququna sahibdir. Bununla yanaşı, dövlət sərhədlərində törədilən istənilən təxribatın qarşısını almaq da bizim hüququmuzdur. Hər hansı hərbi təşkilatın bu məsələyə müdaxiləsi yolverilməzdi və göründüyü kimi, onlar ermənilərin avantürasına getməkdə heç maraqlı da deyillər.
Məhəmmədəli QƏRİBLİ
