Ermənistana bir zərbə də Kollektiv Təhlükəsizlik Müqaviləsi Təşkilatından gəlib. Belə ki, Ermənistanın təşkilatı 12 iyul təxribatına cəlb etmək cəhdi uğursuz olub.
Qeyd edək ki, rəsmi İrəvanın istəyi ilə KTMT baş katibi Stanislav Zas Ermənistan-Azərbaycan sərhədindəki vəziyyətlə əlaqədar olaraq iyulun 13-də KTMT Daimi Şurasının təcili iclasının çağırılması təşəbbüsü ilə çıxış edib. Ancaq KTMT Daimi Şurasının Ermənistan-Azərbaycan sərhədindəki vəziyyətlə bağlı təcili iclası qeyri-müəyyən vaxta təxirə salınıb. Təşkilatın rəsmi nümayəndəsi Vladimir Zainetdinov bunun səbəbini belə izah edib:“Görüş tərəflər arasında əlavə məsləhətləşmələr, həmçinin Ermənistan-Azərbaycan sərhədindəki vəziyyətin müzakirə ediləcəyi formatın müəyyənləşdirilməsi ilə əlaqədar təxirə salınıb”.
KTMT-nin Ermənistan-Azərbaycan sərhədindəki vəziyyətlə bağlı təcili iclası təxirə salması erməni tərəfini qıcıqlandırıb. Ermənistanın Rusiyadakı səfiri Vardan Toganyan KTMT Daimi Şurasının Ermənistan-Azərbaycan sərhədində baş verən hadisə ilə bağlı iclas keçirəcəyinə ümid etdiyini bildirib.Toganyanın sözlərinə görə, KTMT cavab vermək məcburiyyətindədir:“Bu, əslində KTMT üzvü olan dövlətin sərhədində münaqişə ilə əlaqəli olmayan hissəsinə gedən prosesdir. Ümid edirik ki, Təşkilatın Daimi Şurası bu mövzuda iclas keçirəcək”. Görünən odur ki, ermənilərin sözügedən xain planı gözlərində qaldı. Reallıq ondan ibarətdir ki, KTMT-də Azərbaycan Ermənistandan başqa bütün üzv dövlətlərlə dostluq münasibətlərinə malikdir. Həmin dövlətlərlə Azərbaycan arasında bütün sahələrdə sıx əlaqələr mövcuddur. Belə olan halda Ermənistan bunu niyə anlamır və KTMT-ni münaqişəyə cəlb etmək fikirlərindən əl çəkmir?
“Bunlar peşəkar təxribatçıdırlar və bu minvalla ictimai rəyi çaşdırırlar”
Ehtiyatda olan polkovnik-leytenant, hərbi ekspert İbrahim Rüstəmli Ermənistanın KTMT-ni münaqişəyə cəlb etmək fikirlərindən əl çəkməməsini bir sıra amillərlə əlaqələndirdi:“Əvvəla, Ermənistan provokator bir dövlətdir. Belə dövlətdən nə desən gözləmək olar. Ermənistan KTMT-yə üz tutmaqla oyun oynayır. Bununla görüntü yaratmaq istəyir ki, Rusiyaya stavka edir. Əslində Ermənistanın bu siyasəti informasiya təxribatıdır. Guya bu ölkənin təhlükəsizliyinə təhdid yaranıb, bu səbəbdən üzv dövlətlər hərəkətə keçməyə borcludur. Ermənistan rəhbərliyi yaxşı bilir ki, KTMT-də təmsil olunanlar Azərbaycanla sıx münasibətlərə malikdir. Sadəcə, Ermənistan rəhbərliyi hər dəfə buna cəhd etməklə KTMT-ni şantaj edir. Bax, məsələnin kökündə dayanan faktorlardan biri budur. Ermənistan riyakar informasiya siyasəti aparır. Bir tərəfdən Mnatsakanyan KTMT rəhbərinə müraciət edir, o biri tərəfdən Paşinyanın arvadı Anna Akopyan Azərbaycan qadınlarına müraciət edir. Sözügedən müraciət müxtəlif dillərdə yayılır. Bunlar peşəkar təxribatçıdılar və bu minvalla ictimai rəyi çaşdırırlar. Özlərini hərbi təcəvüzə məruz qalmış tərəf kimi təqdim etmək istəyirlər. Bu minvalla beynəlxalq ictimai rəyi öz xeyirlərinə dəyişmək istəyirlər. Zaman-zaman ermənilərin bu kimi fitnəkarlıqlarının şahidi olmuşuq. Ancaq bütün hallarda itirən tərəf Ermənistan olacaq. Azərbaycan işğalla barışmayacaq”.
Belə görünür ki, Ermənistan öz çirkin siyasətinə KTMT-ni alət etməkdən əl çəkmək istəmir. Baxmayaraq ki, onların bu istəkləri hər zaman fiaskoya uğrayır.
Vidadi ORDAHALLI
