Ermənistanın təxribatı nəticəsində dövlət sərhədimizin Tovuz istiqamətində şiddətli döyüş əməliyyatları başlayıb. Artıq dünyanın bir çox ölkələri yaranmış vəziyyətlə bağlı öz mövqelərini ifadə ediblər. ABŞ və Rusiya kimi həmsədr ölkələr hər iki tərəfdən dərhal hərbi əməliyyatların dayandırılmasını tələb ediblər. Ölkələrin məsələyə münasibətilə bağlı bizim diqqətimizi Azərbaycanla çox yaxın starteji əməkdaşlığı olan Ukrayna və Gürcüstanın tamamilə fərqli münasibəti çəkdi.
Gürcüstan prezidenti Salome Zurabişvili Ermənistan-Azərbaycan sərhədində yaşanan gərginliklə bağlı narahatlığını bu sözlərlə ifadə edib. “Bu gün biz hamımız görünməz düşmənə qarşı vuruşarkən beynəlxalq həmrəylik və qlobal stabilliyin saxlanması olduqca önəmlidir. Regionumuzda sülh və təhlükəsizlik Gürcüstanın gələcək inkişafı baxımından, həmçinin bizim dost və tərəfdaş ölkələrimiz – Ermənistan və Azərbaycan üçün vacibdir”.
İndi isə Ukrayna Xarici İşlər Nazirliyinin yaydığı bəyanata diqqət edək:“Ukrayna münaqişənin sülh yolu ilə, beynəlxalq hüququn norma və prinsipləri əsasında, Azərbaycanın ərazi bütövlüyü çərçivəsində həllinin tərəfdarıdır. Münaqişə tərəflərini BMT Təhlükəsizlik Şurasının 822, 853, 874 və 884 saylı qətnamələri əsasında bütün səyləri göstərməyə çağırırıq. Ukrayna vəziyyətin beynəlxalq səviyyədə tanınmış sərhədləri daxilində Azərbaycan Respublikasının suverenliyinə və ərazi bütövlüyünə hörmət əsasında siyasi yolla həll olunmasının tərəfdarıdır". Göründüyü kimi, Ukrayna birmənalı şəkildə Azərbaycanın ərazi bütövlüyünü dəstəkləyir, Gürcüstan isə məsuliyyəti tərəflər arasında bərabər şəkildə bölür. Məsafəcə hazırda erməni təxribatının baş verdiyi əraziyə daha yaxın olan Gürcüstanın belə fərqli mövqeyini nə ilə izah etmək olar?
Politoloq Əhəd Məmmədli “Bakı-Xəbər”ə açıqlamasında bildirdi ki, Gürcüstanın məsələyə bu şəkildə reaksiya verməsi onda dərin təəccüb yaratmayıb:“Qeyd edim ki, bunun başlıca səbəbi Gürcüstan iqtidarında kimin təmsil olunması ilə bağlıdır. Təxmin edirəm ki, Gürcüstanda hakimiyyət Saakaşvilinin əlində olsaydı, o daha fərqli münasibət bildirərdi. Yəni obyektivliyə söykənərək, Azərbaycanın haqq səsinə dəstək verilərdi. Zurabişvili iqtidarının Rusiyaya daha meylli olduğu nəzərə çarpır. Onların Ermənistanla da münasibəti pis deyil. Bunun başqa bir səbəbi isə Gürcüstanın daxilindəki ermənilərin mövqeyi ilə bağlıdır. Onlar hakimiyyətə çox yeridiliblər. Əksəriyyəti soyadını dəyişib, erməni mahiyyətini qorumaqla Gürcüstanda vəzifələrdə təmsil olunurlar. Gürcüstan eyni zamanda hər iki ölkə ilə həmsərhəd dövlət kimi balansı qorumağa çalışır. Bu səbəbdən də güya neytral münasibət sərgiləyir. Həmçinin Gürcüstanın daxilində ermənilərlə bağlı Cavaxetiya problemi mövcuddur. Bir daha görünür ki, bizim sərhəddən uzaq olsa da, Ukrayna, Belarus kimi ölkələr Azərbaycana Gürcüstandan daha səmimi münasibət göstərir. Ukrayna və Gürcüstan üçün bu problemlər yad deyil. Hər iki ölkə separatçılıqdan əziyyət çəkir. Bu səbəbdən Gürcüstanın da məsələyə mövqeyi elə Ukraynanınkı qədər obyektiv olmalıydı. Nəzərə alaq ki, Ukraynanın daxilində də erməni diasporu güclüdür. Hətta onların daxili işlər naziri miliyyətcə ermənidir. Deməli, burada səmmiyyət böyük rol oynayır. Bunu da biz kritik məqamda hiss edirik. Biz kimdənsə yalan danışmağı, özünü risqə atmasını istəmirik. Həqiqəti dilə gətirmək lazımdır. Təəssüf ki, həlledici məqamlarda biz Gürcüstandan bunu görmürük. Azərbaycan Gürcüstan üçün daha önəmli ölkədir. Bizim bütün enerji layihələrimizdən həmin ölkə ciddi qazanc əldə edir. Ölkəmiz Gürcüstana böyük həcmdə investisiya yatırıb. Ən azından, bu səmimiyyətə adekvatlıq ortaya qoyulmalıdır”.
Doğrudan da, özü separatçılıqdan əziyyət çəkən Gürcüstanın yaxınlığında baş verən hadisəyə ütülü bəyanat verməsi təəccüblü görünməyə bilmir. Burada Gürcüstandakı erməni barmağı özünü açıq göstərir.
Məhəmmədəli QƏRİBLİ
