Cəbhənin Tovuz istiqamətində erməni təxribatlarının güclənməsi müşahidə edilir. Müdafiə Nazirliyinin yaydığı rəsmi məlumatda bildirilir ki, düşmən cəbhənin digər istiqamətlərində, xüsusilə də Naxçıvanda atəşkəs rejimini tez-tez pozur. Hər iki tərəfdən itikilərin olduğu bildirilir.
Belə həssas məqamda informasiya ilə iş sahəsində də həssas olmamız lazımdır. Təəssüflə qeyd etməliyik ki, bu istiqamətdə müəyyən özfəaliyyət, yanlışlıqlar nəzərə çarpır. Biz bunu Aprel döyüşləri zamanında da hiss etdik. Həmin vaxt hətta Prezident Administrasiyasında bu mövzu ilə bağlı xüsusi bir tədbir də keçirildi. Son hadisələrlə bağlı ənənəvi medianın peşəkar davranışını müşahidə edirik. Belə resurslar əsasən yalnız rəsmi mənbələrə istinadla xəbərlər verir. Təəssüf ki, bəzi sosial şəbəkə istifadəçiləri və özlərinə bloger deyənlərin bu yöndə yanlışlıqları nəzərə çapır. Məsələn, “itkilərimiz gizlədilir, ermənilərdə ölən yoxdu, niyə ancaq kasıblar ölür...” kimi yersiz statuslar tirajlanır. Vəziyyət hətta o həddə çatıb ki, Müdafiə Nazirliyi vətəndaşlara belə məlumatları yaymamaqla bağlı çağırış edib. Erməni dəyirmanına su tökən belə fərdlərlə bağlı xüsusi araşdırılmanın aparılması, onlara dövlət qurumları tərəfindən ciddi xəbərdarlığın edilməsi lazımdırmı?
Politoloq Yeganə Hacıyeva “Bakı-Xəbər”ə açıqlamasında bildirdi ki, iyulun 12- də ermənilər Azərbaycan-Ermənistan dövlət sərhədinin Tovuz istiqamətində növbəti hərbi təxribat törətdi: “Azərbaycan Ordusunun hərbi qulluqçularından şəhid olan və yaralananlar var. Sosial medianın erməni siqmentində onların özlərinin yazdıqlarına görə, 30-a yaxın erməni əsgəri məhv edilib. Təəssüflə qeyd etməliyik ki, bu günlər ərzində biz informasiya sahəsində sapı özümüzdən olan baltalar tərəfindən ardıcıl zərbələr alırıq.
Ümumiyyətlə, tarix boyu düşmənlər xalqları və dövlətləri təkcə kənardan deyil, həm də daxildə parçalamaqla məhv etmək siyasəti yürüdüblər. Məsələn, biz ordu döyüş aparanda Bakıda gecə insanları küçələrə səsləyən qruplara, sosial mediada Müdafiə Nazirliyinin açıqlamalarını şübhə altına almaq istiqamətində sistemli təbligat aparanlara və ən əsası, Ermənistan Müdafiə nazirliyinin erməni cəmiyyətinə yönəlik təbliğatını bizdə tirajlayaraq informasiya təxribatı edənlərlə çox rast gəldik. Maraqlıdır ki, bunu edənlərin arasında tanınmış ictimai simalar da az deyil.
Bir neçə ictimai sima var idi ki, onların açıqlamaları ya birbaşa Ermənistan Müdafiə nazirliyinin məlumatları idi, ya da onlarla sinxronluq təşkil edirdi. Paralel olaraq, daha əvvəl adı Azərbaycanda bu və ya diğər siyasi, müxalif qruplara bağlı olan simiların da bu antidövlət “ansamblına” qoşulduğunu gördük.
Birmənalı olaraq deyə bilərik ki, ordu döyüş aparanda Bakıda gecə insanları küçələrə səsləyən təxribatçı qruplar və sosial mediada informasiya diversiyası edənlərin əsas məqsədi cəmiyyətin və dövlətin diqqətini döyüş meydanlarından yayındırmaq, sərhəddə baş verən təxribatı ölkənin içərisinə çəkməkdən ibarət idi. Məsələ ondadır ki, Azərbaycan bir dəfə 90-cı illərdə ordu doyuş aparanda Bakıda təxribat edib dövlətin başını qatanları görüb. Məhz belə daxili təxribatların sayəsində biz 20 % torpaqlarımızı itirmişik. İstənilən cəmiyyətlərdə hökumətlərin bu və ya diğər sahədə siyasətini bəyənməyən, onunla razılaşmayan qruplar mövcuddur. Məsələ ondadır ki, hökümətə müxalif olmaqla dövlətə müxalif olmaq arasında çox böyük fərq var. Təəssüf etmək lazımdır ki, siyasi proseslərdə deyil, sosial media və internet resurlsarda formalaşan bəzi ictimai-siyasi fəallar bu fərqi ayırd edə bilmir. Hökümətlərə müxalif olmaq normal qarşılansa da, dövlətinə və doğulub boya-başa çatdığı olkəyə müxalif olmaq xəyanətdir. Ermənistan Müdafiə Nazirliyinin erməni cəmiyyyətinə yönəlik təbliğatı ilə təbliğatları sinxronluq təşkil edən simaların araşdırılması və onlarla bağlı müvafiq hüquqi addımların atılması lazımdır. Belə olsa, biz bəzi təxribatçıların əl-ayağını yığa bilərik”.
Doğrudan da, bu günlər ərzində biz sosial şəbəkələrdə bir pərakəndəlik müşahidə etdik. Bunu təsadüfən edənlərlə yanaşı, təcrübəli adamlara da çox rast gəldik. Deməli, burada hansısa qrupların dövlət əleyinə sistemli antitəbliğatından söhbət gedə bilər. Belə halların araşdırılması olduqca zəruridir.
Məhəmmədəli QƏRİBLİ
